تۇركىتىلدەس ەلدەردى ورتاق تاريح, ورتاق تاعدىر بىرىكتىرەدى

پارلامەنت ماجىلىسىندە تۇركىتىلدەس ەلدەر پارلامەنتتىك اسسامبلەياسىنىڭ (تۇركپا) الەۋمەتتىك-مادەني سالاسىنداعى بەيىندىك كوميتەتتەرىنىڭ بىرلەسكەن ءۇشىنشى وتىرىسى ءوتتى. وتىرىس استانادا وتكەن عىلىم, تەحنولوگيا جانە يننوۆاتسيا جونىندەگى ازيا پارلامەنتارالىق فورۋمى شەڭبەرىندە ۇيىمداستىرىلدى. جيىنعا قازاقستان,  ازەربايجان, قىرعىزستان جانە تۇركيا پارلامەنتشىلەرى,  حالىقارالىق تۇركى اكادەمياسىنىڭ, ەلورداداعى ۇلتتىق مۋزەيدىڭ باسشىلارى  قاتىستى. جيىنعا توراعالىق ەتكەن پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ: «ەلباسىمىز بۇۇ-نىڭ باس اسسامبلەياسىنىڭ سەسسياسىندا الەمنىڭ ەكونوميكالىق دامۋى ءۇشىن ازيا ەلدەرىنىڭ ىقپالى زور ەكەنىنە ەرەكشە نازار اۋداردى. سوندىقتان, قازىر الەمدەگى بىلىكتى ساراپشىلار XXI عاسىردى «ازيا عاسىرى» بولادى دەپ بولجايدى. دەمەك, ءبىز جاڭا زامان العا جاڭا مىندەتتەر قويىپ وتىرعان كەزەڭدە تۇركتىلدەس ەلدەردىڭ ىنتىماعىنىڭ ماڭىزى ەرەكشە ەكەنىن قايتالاپ ايتا الامىز. ءبىر جولى تۇركياعا بارعانىمىزدا «قۇداي قوسقاندى ادام اجىراتا المايدى» دەگەن ءسوزدى ايتقانىمىز بار. سىزدەر مەن بىزدەردى قۇداي قوسقان. سەبەبى, ءبارىمىزدىڭ تاعدىرىمىز دا, تاريحىمىز ورتاق», – دەدى س. ابدراحمانوۆ. جيىندا ءسوز العان حالىقارالىق تۇركى اكادەمياسىنىڭ پرەزيدەنتى وسى ۇيىم تۇركى الەمىندەگى عىلىمي ينتەگراتسياعا ۇيىتقى بولىپ جۇرگەنى, بۇل رەتتە تۇركپا-مەن بىرلەسە كوپتەگەن ءىس-شارا اتقارىلعانى تۋرالى بايانداپ بەردى. ال پارلامەنت ءماجىلىسىنىڭ دەپۋتاتى بەكبولات تىلەۋحان قازاقستاننىڭ قاي ەلمەن دە ساياسي بايلانىسى بەرىك ەكەنىن,  بىراق باۋىرلاس اعايىننىڭ ءجونى قاشان دا بولەك بولاتىنىن جەتكىزدى. «تۇركىتىلدەس ەلدەردىڭ پارلامەنتتىك اسسامبلەياسى اياسىندا ءوزارا بايلانىسىمىزدى جانداندىرىپ, ەلدەرىمىزدىڭ الەۋمەتتىك-مادەني جاعىنان دامۋىنا ۇلەس قوسۋ – بۇل بارىمىزگە ورتاق شارۋا», – دەسە, ازەربايجان رەسپۋبليكاسى ميللي مەدجليسى عىلىم جانە ءبىلىم جونىندەگى تۇراقتى كوميتەتى توراعاسىنىڭ ورىنباسارى باحتيار اليەۆ تۇركپا-نىڭ كەزدەيسوق قۇرىلماعانىن, ونىڭ نەگىزىنىڭ قالانۋىنا ۇزاق ۋاقىت كەتكەنىن اتاپ ءوتتى. «ارينە, ءتۇرلى قيىندىقتى باستان وتكەردىك, بىراق بۇگىندە ءبىز ارىپتەستىكتىڭ جاڭا بەلەسىن باعىندىردىق», – دەدى ول. ءلايلا ەدىلقىزى, «ەگەمەن قازاقستان»