الماتىداعى «التىن وردا» بازارىنىڭ جانىنداعى جولدى كەڭەيتۋ جۇمىستارى 2017 جىلدىڭ ماۋسىم ايىندا باستالادى. وعان دەيىن جول بويىنداعى 25 ساۋدا نۇكتەسى الىنىپ تاستالادى. قازىر «بارلىق» بازارىنداعى ساۋدا ورىندارىن بۇزۋ جۇمىستارى باستالىپ كەتتى. بۇل تۋرالى الماتى قالالىق جولاۋشىلار كولىگى جانە اۆتوكولىك جولدارى باسقارماسىنىڭ باسشىسى ماقسۇت يساقوۆقا سىلتەمە جاساعان Tengrinews.kz حابارلادى.
ونىڭ ايتۋىنا قاراعاندا, بۇل ماسەلە 15 قىركۇيەك كۇنى ۆيتسە-پرەمەر اسقار ءماميننىڭ قاتىسۋىمەن تالقىلانعان. وتىرىستا الماتى-بىشكەك تراسساسىنىڭ «التىن وردا» جانىنداعى بولىگىن جاڭارتۋدىڭ جوباسىن دايىنداۋ جانە شىعىنىن ەسەپتەۋ تاپسىرىلعان.
ەندى جولدىڭ قاي بولىگى قايتا جاسالادى جانە قالاي وزگەرەدى دەگەن ماسەلە تۋرالى.
- قازىرگى ەسەپ بويىنشا ۇزىندىعى 3,5 كيلومەتر جول كەڭەيتىلەدى.
- ول – قالقامان شاعىن اۋدانى تۇسىنداعى كەرى اينالۋ ۇزىگى مەن «اسىل ارمان» تۇرعىن ءۇي كەشەنى ارالىعى.
- جول 10 جولاقتى (10 كولىك سياتىنداي) – ءار باعىتتا بەس-بەس جولاقتى بولىپ سالىنادى. ونىڭ ءۇش جولاعى – ترانزيتتىك, ياعني تۋرا وتەتىن كولىكتەرگە ارنالادى. ءبىر جولاعى ارى-بەرى بۇرىلاتىن سول ماڭايدىڭ كولىكتەرى ءۇشىن بولسا, تاعى ءبىر جولاق قوعامدىق كولىككە ارناپ سالىنادى. بۇل جولاق «باراحولكا» ماڭىنداعى سياقتى باسقا كولىكتەر كىرە المايتىنداي ەتىپ بولىنەدى.
- جولدىڭ بۇل بولىگىندە ءۇش جەردەن كەرى اينالۋ ۇزىگى قالدىرىلادى. ولاردىڭ بىرەۋى قالقاماننىڭ تۇسىندا, ەكەۋى «اسىل ارمان» جاقتا بولادى.
- «التىن وردا» بازارى سول ورنىندا قالادى.
- جولدى جاڭارتۋ جۇمىستارى 2017 جىلدىڭ ماۋسىمىندا باستالادى.
- جاسالىپ بولعاننان كەيىن جاڭارتىلعان جول بولىگى الماتى قالاسىنىڭ قاراماعىنا وتەدى.
- كەلەسى جىلعى رەسپۋبليكالىق بيۋدجەتتەن جولدى جاڭارتۋدىڭ جوبالىق-سمەتالىق قۇجاتتاماسىن دايىنداۋعا 150 ميلليون تەڭگە ءبولۋ قاراستىرىلعان.
- «التىن وردا» جانىنداعى 3,5 كيلومەترلىك جولدى كەڭەيتۋگە بارلىعى 10 ميلليارد تەڭگە قاجەت.
