بەسىنشى ءماجىلىستىڭ بىرلەسكەن مالىمدەمەسى

نيۋ-يوركتە قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ پەن اقش مەملەكەتتىك حاتشىسى دجون كەرري بۇۇ باس اسسامبلەياسى 71-ءشى سەسسياسىنىڭ الاڭىندا وتكەن قازاقستان–امەريكا ستراتەگيالىق سەرىكتەستىگى جونىندەگى كوميسسيانىڭ بەسىنشى ءماجىلىسىنىڭ اشىلۋىنا قاتىستى. قازاقستان تاۋەلسىزدىگىنىڭ 25 جىل­دى­عىن مەرەكەلەۋ مەن قازاقستان مەن اقش اراسىنداعى ديپلوماتيالىق قا­رىم-قاتىناستىڭ ورناعانىنا 25 جىل تولۋى قارساڭىندا ەكىجاقتى سترا­تە­گيا­لىق سەرىكتەستىكتىڭ اسا جوعارى دەڭ­گەيى ساقتالىپ وتىرعانى اتاپ كور­سە­تىلدى. تاراپتار ءتۇرلى ەكىجاقتى جانە كوپ­جاقتى پلاتفورمالار شەڭبەرىندە جاڭا ءوزارا ءىس-قيمىل سالالارىن دامىتۋ ءۇشىن ۇستالىپ كەلە جاتقان جوعارى سەر­پىندى جالعاستىرۋ كەرەك دەگەن ۇستا­نىمدارىن ءبىلدىردى. بۇۇ قاۋىپسىزدىك كەڭەسىنە ورتا­لىق ازيا مەملەكەتتەرىنىڭ ىشىنەن تۇڭ­عىش سايلانعان قازاقستان قۇراما شتات­تار­مەن تىعىز ىنتىماقتاستىعىن ورتاق باسىم­دىقتاردى ىلگەرىلەتۋ ءۇشىن ءارى قاراي دامىتۋ نيەتى بارىن قۋاتتادى. قۇراما شتاتتار قازاقستاننىڭ اۋ­عانستاندا قاۋىپسىزدىكتى جانە ەلدى دامى­تۋدى قامتاماسىز ەتۋ, سونداي-اق, ور­تالىق ازيادا, ونىڭ ىشىندە «س5+1» پىشىمىندەگى ءوزارا ءىس-قيمىل ارقى­لى دا وڭىرلىك ەكونوميكالىق ينتەگرا­تسيانى ىلگەرىلەتۋ ماسەلەلەرىندە كوش­باسشى بولىپ تابىلاتىنىنا قۇر­مەتپەن قا­رايدى. قازاقستان مەن قۇراما شتات­تار جاپپاي قىرىپ-جوياتىن قارۋ­لاردى تاراتۋدىڭ الدىن الۋعا ور­تاق جا­قىن­دىقتارىن قۋاتتاپ بەردى. تا­راپتار تەر­رو­ريزم مەن زورلىق ەكسترە­ميزم قاتەر­لەرىنە قارسى ءىس-قيمىل تانى­تۋدا­عى ىنتىماقتاستىعىن تەرەڭ­دەتۋگە ماقۇلداستى. قازاقستان مەن قۇراما شتاتتار كليماتتىڭ وزگەرۋىنە قارسى كۇرەس­كە جاقىندىقتارىن قۋاتتاسا, قۇرا­ما شتاتتار قازاقستاننىڭ قوس تاراپقا قا­تىستى كونفەرەنتسيانىڭ  21-ءشى سەس­سيا كەلىسىمدەرىن ءۇستىمىز­دەگى جىل­دىڭ سوڭىنا دەيىن راتيفي­كا­تسيا­لاۋ­عا دەگەن نيەتىن قۋانا قۇپتا­دى. ەكى جاق ەنەرگەتيكالىق قاۋىپ­سىز­دىكتىڭ ماڭىز­دىلىعىن اتاپ ءوتتى, ال قۇراما شتاتتار استانا­دا «جاسىل» ەكونوميكاعا باعىت­تال­عان ەكسپو-2017 كورمەسى ۇيىم­داس­تى­رىلاتىنىنا ريزاشىلىعىن ءبىلدىردى. قازاقستان سىرتقى ىستەر مي­نيسترى­نىڭ ورىنباسارى ەرجان اشىق­باەۆ پەن اقش مەملەكەتتىك حاتشى­سى­نىڭ وڭتۇستىك جانە ورتالىق ازيا ماسە­لەلەرى بويىنشا كومەكشىسى نيشا بيس­ۆال جەتەكشىلىك ەتەتىن دەلەگاتسيا­لار كوپجاقتى قازاقستان-امەريكا ىنتى­ماقتاستىعىنا, حالىقارالىق جانە وڭىرلىك سىن-قاتەرلەرگە, ورتاق قىزى­عۋشىلىق تۋعىزاتىن قاۋىپسىزدىك, ەكونوميكا, قورشاعان ورتا, ادام قۇقى جانە باسقا دا سالالارداعى پروبلەمالار بويىنشا شولۋ وتكىزدى. ە.اشىقباەۆ, سونداي-اق, اقش مەم­لەكەتتىك حاتشىسىنىڭ حا­لىق­ارالىق ۇيىمدار ىستەرى بويىنشا كومەكشىسى باتشيبا كروكەرمەن, اقش-تىڭ دەموكراتيا, ادام قۇقى جانە ەڭبەك بويىنشا كومەكشىسى توماس مالينوۆسكيمەن, حالىقارالىق ءدىني بوستاندىق جونىندەگى ەلشى دەۆيد ساپەرستينمەن, مۇسىلمان قاۋىم­داستىعىمەن بايلانىس جونىندەگى ارنايى وكىل شااريك زافارمەن جانە يسلام ىنتىماقتاستىعى ۇيىمىنداعى ارنايى ەلشى ارسلان سۋلەمانمەن ورتاق كۇن تارتىبىندەگى ماسەلەلەردى ىلگە­رى­لەتۋ جانە ىنتىماقتاستىقتىڭ ەكىجاقتى, وڭىرلىك جانە جاھاندىق بار­لىق ماسەلەلەرى بويىنشا جولدارىن تال­قى­لاۋ ءۇشىن جەكە كەزدەسۋلەر وتكىزدى. تاراپتار ستراتەگيالىق سەرى­ك­تەس­تىك جونىندەگى كوميسسيانىڭ ۆە­دومس­تۆو­ارالىق كەزەكتى ءماجىلىسىن تولىق قۇ­رامدا 2017 جىلى وتكىزۋگە شە­شىم قا­بىلداپ, ءوزارا ءىس-قيمىلدى جوعا­رى دەڭ­گەيدە باسقا دا الاڭداردا جال­عاس­تى­رۋعا ۋاعدالاستى. «ەگەمەن-اقپارات»