«جىبەك جولى» «پاريج-داكاردان» كەم تۇسپەيدى

ايگىلى «پاريج-داكار» راللي-مارافونى 36 جىلدىڭ ىشىندە بىردە-ءبىر رەت قايعىلى وقيعاسىز وتكەن ەمەس. ال بيىل 6-مارتە مارەگە جەتكەن «جىبەك جولى» حالىقارالىق راللي-مارافونىندا كىسى ءولىمى بولعان جوق. ورتالىق كوممۋنيكاتسيالار قىزمەتىندە وتكەن بريفينگتە وتاندىق اۆتومارافونشى ارتۋر ارداۆيچۋس وسىلاي دەدى. ارتۋر ءارداۆيچۋستىڭ ايتۋىنشا, ەكى مارافوننىڭ قايسىسى قيىن دەگەن ساۋالعا جاۋاپ بەرۋ قيىن. — «جىبەك جولىنىڭ» ترەكتەرىمەن دە ويناۋعا بولمايدى. تابيعاتى ادەمى, جايقالىپ تۇرعان جەرلەردىڭ وزىندە ءشوپتىڭ استىندا كوزگە كورىنبەيتىن قويتاستار تولىپ جاتۋى مۇمكىن. جاڭبىردان كەيىن تاۋ-تاستى جەرلەرى وتە تايعاق بولىپ كەلەدى. قىسقاسى, ەكەۋىنىڭ دە قاۋىپتى جاقتارى كوپ. بىراق, «جىبەك جولى» راللي-مارافونىندا ازىرگە قايعىلى وقيعا بولماعانى قۋانتادى. سەبەبى, سپورتشىلاردىڭ ءومىرىن ساقتاپ قالۋ جاعى جاقسى ويلاستىرىلعان, – دەيدى ول. ماسكەۋدەن شىعىپ, تاتارستان مەن باشقۇرتسانعا سوعىپ, قازاقستاننىڭ تەرريتورياسى ارقىلى ءوتىپ, بەيجىڭدە مارەگە جەتكەن مارافون الەمدەگى ەڭ قاشىق راللي-مارافون سانالاتىنىن ايتا كەتۋ كەرەك. بيىل جول تالعامايتىن كولىكتەر اراسىندا ايگىلى فرانتسۋز سيريل دەپرەنىڭ ەكيپاجى ءبىرىنشى كەلسە, جۇك كولىكتەرى اراسىندا رەسەيلىك ايرات ماردەەۆتىڭ ەكيپاجى جەڭىمپاز اتاندى. «Astana Motorsports» كومانداسىنىڭ مۇشەسى ارتۋر ءارداۆيچۋستىڭ ەكيپاجى جارىس قورىتىندىسى بويىنشا 5-ورىنعا تابان تىرەدى. اڭىزعا اينالعان «پاريج-داكار» كوپكۇندىگىنىڭ ءوزى 9 300 شاقىرىم بولسا, «جىبەك جولىنىڭ» قاشىقتىعى 10 700 شاقىرىمعا تەڭ. بيىل جارىسقا الەمنىڭ 39 ەلىنەن 92 جۇك تالعامايتىن كولىك پەن 24 جۇك كولىگى قاتىسقان بولاتىن. ولاردىڭ اراسىندا بۇعان دەيىن «داۆار» راللي-مارافونىندا بىرنەشە مارتە توپ جارعان سەباستەن ليوب, ستەفان پەترونسەل, سيريل دەپرە سىندى جۇلدىزداردىڭ بولۋى بۇل جارىستىڭ بەدەلىن ارتتىرا ءتۇستى. ارنۇر اسقاروۆ