الماتى وبلىسىندا اعايىندى ءۇش جىگىت ءىز-ءتۇسسىز جوعالدى

الماتى وبلىسى ۇزىناعاش اۋىلىنداعى مال بازارعا 40 باس ءىرى-قارانى الىپ شىققان اعايىندىلار سول كۇيى اۋىلدارىنا ورالماعان. جىگىتتەردىڭ الدەبىرەۋلەرمەن باعاعا كەلىسىپ, مال تيەلگەن ەكى جۇك كولىگىمەن تاۋعا قاراي كەتكەنىن كورگەندەر بار. تەك سول كولىكتەردىڭ ءبىرى بوس كۇيىندە تاۋ اراسىنان تابىلسا, ەكىنشىسىن ءتىپتى ورتەپ جىبەرىپتى. بۇل تۋرالى كتك تەلەارناسى حابارلادى. جوعالعانداردىڭ بازاردان مالدارىن تيەپ ءمىنىپ كەتكەن كولىكتەرىنىڭ ءبىرى قازىر الماتى وبلىسىنداعى اۋىل اراسىنداعى جولداردىڭ بىرىنەن تابىلعان. جەم-ءشوبى ىشىندە سول كۇيى جاتىر. قازىر پوليتسيا قىزمەتكەرلەرى كولىكتەن ساۋساق ىزدەرىن الۋدا. كولىكتىڭ الدىڭعى مەملەكەتتىك ءنومىرى الىپ تاستالىنعان. ارتقى ءنومىرىن دە شەشپەك بولعانى كورىنىپ تۇر. ىشىندە كيىم-كەشەك, مالدىڭ قورشاۋى دا تۇر. تەك ءىرى-قارانىڭ ءوزى مەن يەلەرى جوق. جارقىنبەك, قادىلبەك, مۇقيات ەسىمدى ءۇش اعايىندى جىگىت بازارعا 40 باس سيىردى وتكەن دەمالىستا اكەلگەن ەكەن. سودان بەرى ەشقايسىنان حابار جوق. «مالىن قايتەمىز ەندى.  ول ادامدار قاتەلەسكەن شىعار, جازا باسقان شىعار. ولاردى جازاعا تارتپايمىز. ۇلدارىمىز وتباسىنا امان-ەسەن ورالسا بولعانى. بالالارى ۋلاپ- شۋلاپ جاتىر, وتە اۋىر حالدە, انالارى اۋرۋحاناعا ءتۇسىپ قالدى», دەيدى جوعالعانداردىڭ اكەسى تۇرسىن ءامىرباي ۇلى. كۋاگەرلەردىڭ ايتۋىنشا, اعايىندىلار 40 باس ءىرى-قارانى تۇگەل ساتىپ الامىن دەگەن اداممەن 6 ميلليون تەڭگەگە كەلىسكەن ەكەن. بىراق, الگى ساتىپ الۋشى «اقشا ۇيدە» دەگەن سىلتاۋمەن جىگىتتەردى وزىمەن ەرتە كەتكەن. ەگەمەن-اقپارات