استانادا ءوتىپ جاتقان جامبىل وبلىسىنىڭ اۋىلشارۋاشىلىق جارمەڭكەسىندە تاڭقۋراي مەن قۇرعاق جەمىستەرگە حالىقتىڭ سۇرانىسى جوعارى بولىپ تۇر, دەپ حابارلايدى ەگەمەن-اقپارات.
جارمەڭكەدە ساتىلىپ جاتقان اۋىلشارۋاشىلىق ونىمدەرىنىڭ باعاسى مىنانداي: جىلقى ەتىنىڭ كيلوسى – 1250, جايا – 1400, قازى – 1500 تەڭگە. سونداي-اق جىلان بالىق, سازان, جايىن سياقتى بالىقتاردىڭ كيلوسى 500 تەڭگەدەن ساتىلۋدا. تاۋىق ەتىنىڭ كيلوسى – 550, ال 10 تال جۇمىرتقا – 200 تەڭگە. كارتوپ پەن بۇرىشتىڭ كيلوسى – 60, الما – 150, قاۋىن – 60 تەڭگە. قىمىزدىڭ ءليترى – 400, ال بال 1800 بەن 2000 تەڭگە ارالىعىندا ساۋدالانىپ جاتىر.
جارمەڭكەگە وتباسىمەن كەلگەن سەرىك مۇراتاليەۆ ەسىمدى قالا تۇرعىنى كەيبىر تاۋارلاردىڭ باعاسى قالا باسشىلارى كەلىپ كەتكەننەن كەيىن كوتەرىلگەنىن ايتادى.
«ەتتىڭ باعاسى ارزان ەكەنىن كورىپ وتىرمىن. مىسالى, جىلقى ەتى بازارداعىدان 300 تەڭگەگە ارزان. كارتوپ پەن بۇرىشتىڭ باعاسى قالا اكىمى جۇرگەن كەزدە 40 تەڭگە ەدى, ال قازىر 60 تەڭگە بولىپ كەتكەن. تاڭقۋراي ءبىر-اق جەردە ساتىلىپ جاتىر, ونى الۋ ءۇشىن ادامدار ۇزاق كەزەكتە تۇر. مەنىڭ كەزەگىم جەتكەنشە ول 50 تەڭگەگە قىمباتتاپ كەتىپتى», – دەيدى قالا تۇرعىنى.
تاڭقۋراي جارمەڭكەنىڭ سىرتىندا دا ساتىلىپ جاتىر. بىراق ساتۋشىلار ونىڭ بىشكەكتەن اكەلىنگەنىن ايتادى.
بۇدان بولەك, جامبىل وبلىستىق فيلارمونياسى جانە «الاتاۋ» ءانسامبلى سياقتى ونەر ۇجىمدارى جارمەڭكەگە كەلگەن جۇرتقا اسەم ءان مەن ءتاتتى كۇي تارتۋ ەتتى.
ەگەمەن-اقپارات
