استراحانداعى مەديا-فورۋمعا قاتىسۋشىلار استانادا وتەتىن ەكسپو-2017 كورمەسىنىڭ ماڭىزىنا ەرەكشە ىقىلاس تانىتتى
ءار ەلدىڭ ەكونوميكالىق وركەندەۋ جولى وزگەشە. ساياسي تۇراقتىلىعىن ايتپاعاندا, دەموكراتيالىق تالاپتارى ارقيلى بولاتىنى داۋسىز. وسى ورايدا, استراحاندا ەكىنشى ءمارتە ءوتىپ جاتقان كاسپي ماڭى ەلدەرىندەگى بۇقارالىق اقپارات قۇرالدارى وكىلدەرىنىڭ مەديا-فورۋمىنا قاتىسۋشىلار تاراپىنان قازاق ەلىنىڭ ەكونوميكالىق دامۋ ۇدەرىسىنە قىزىعۋشىلىعى انىق بايقالدى. مۇنى, اسىرەسە, مەديا-فورۋمعا قاتىسۋشىلارعا استانادا الداعى جىلى وتكىزىلۋى جوسپارلانعان ەكسپو-2017 كورمەسىنە دايىندىق بارىسى تانىستىرىلىمىنان اڭعاردىق.
بۇكىل الەم نازار اۋدارىپ وتىرعان كورمەنى وتكىزۋگە دايىندىق بارىسى, ونىڭ نەگىزگى تاقىرىبى – جاسىل ەكونوميكا تۋرالى ارنايى بەينەروليككە كاسپي جاعالاۋىنداعى بەس ەلدىڭ 300-گە جۋىق ءجۋرناليسى ەرەكشە ىقىلاس تانىتتى. ولاردىڭ ءبارى دە قازاقستاننىڭ قۋاتتى قادامىنا قىزىعىپ قارايدى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ الەمدە ءبىر-ءبىرىمەن ارازداسقان ەلدەردىڭ تاتۋلاسۋىنا, ءسويتىپ, ەكونوميكالىق, ىسكەرلىك بايلانىسىن قايتا جالعاۋىنا ارااعايىندىق جاساپ, بىتىمگەرشىلىكتى كوزدەگەن ماقساتىن قۋاتتايتىنىنا ەكپىن ءتۇسىردى.
– ەل مەن ەلدىڭ, حالىق پەن حالىقتىڭ اراسىنداعى ءوزارا سىيلاستىقتىڭ بۇرىنعىدان دا بەكي تۇسۋىنە بۇقارالىق اقپارات قۇرالدارىنىڭ تيگىزەر پايداسى وراسان زور, – دەدى مەديا-فورۋم قاتىسۋشىلارىنا ساتتىلىك تىلەگەن قازاقستان رەسپۋبليكاسىنىڭ كونسۋلى اسحات سىزدىقوۆ. – سول سەبەپتەن, اقپاراتتىق بايلانىستىڭ كەڭي تۇسكەنى ءجون.
مەديا-فورۋمدا ءسوز العانداردىڭ بارلىعى دەرلىك اقپاراتتىڭ شىنايى بولعانىن قالايدى. ماسەلەن, استراحان وبلىسىنىڭ گۋبەرناتورى الەكساندر جيلكيننىڭ پىكىرىنشە, كاسپي ماڭى ەلدەرىنىڭ اراسىندا ەشقاشان دۇردارازدىق تا, كەلىسپەۋشىلىك تە بولعان ەمەس. سان عاسىرلار تەڭىز جاعالاۋىنداعى ەلدەر ءبىر-بىرىمەن ەكونوميكالىق دامۋ تۇرعىسىنان قارىم-قاتىناسىن بايىتا ءتۇستى. اتا-بابالارىمىز سالعان دوستىق, ارىپتەستىك بايلانىس بۇگىندە تەك ەكونوميكالىق قانا ەمەس, اقپاراتتىق سالادا دا قارقىن الا باستادى.
ازەربايجان رەسپۋبليكاسىنىڭ بايلانىس جانە جوعارى تەحنولوگيالار ءمينيسترىنىڭ ورىنباسارى ەلمير ۆەليزادە, يران يسلام رەسپۋبليكاسىنىڭ باس كونسۋلى الي موحامادي, سونىمەن بىرگە, «نەيترالنىي تۋركمەنيستان» گازەتىنىڭ وكىلى يرينا يمامكۋلوۆا, «كومسومولسكايا پراۆدا» گازەتىنىڭ باس رەداكتورى ۆلاديمير سۋنگوركين جانە «National Geographic Russia» جۋرنالىنىڭ عىلىمي رەداكتورى اندرەي جۋراۆلەۆ كاسپي ماڭى ەلدەرىندەگى جاڭالىقتار مەن پروبلەمالاردىڭ باق-تاردا كورىنىس تابۋى ورتاق اقپاراتتىق كەڭىستىك قالىپتاستىرۋعا العىشارت جاسايتىنىنا توقتالدى.
ال مەديا-فورۋم بارىسىنداعى پىكىرتالاستا بەلسەندىلىك تانىتقان باق وكىلدەرى كاسپي تەڭىزىندەي تۇيىقتىق تانىتقان جوق. ءبىر-بىرىمەن ارىپتەس بولۋعا, اقپاراتپەن بولىسۋگە قۇلشىنىپ تۇردى. ماسەلەن, اتالعان مەديا-فورۋمدا اتىراۋ وبلىسىندا تىركەلگەن ATPress.kz اقپاراتتىق پورتالىنىڭ تانىستىرىلىمىنان سوڭ, ونىمەن سەرىكتەستىك بايلانىس ورناتۋعا الدىمەن ازەربايجان مەن قالماقيادان كەلگەن ارىپتەستەرىمىز ىقىلاس ءبىلدىردى.
سونداي-اق, «كاسپي ارمانى» تاقىرىبىمەن جاريالانعان حالىقارالىق كونكۋرستىڭ ءجۇلدەگەرلەرى انىقتالدى. ولاردىڭ اراسىندا اتىراۋداعى «پريكاسپيسكايا كوممۋنا» گازەتىنىڭ ءتىلشىسى نادەجدا شيلمان دا بولدى.
جولداسبەك شوپەعۇل,
«ەگەمەن قازاقستان» –استراحاننان
(رەسەي فەدەراتسياسى)
سۋرەتتى تۇسىرگەن
راحىم قويلىباەۆ
