رەسەيدە كاسپي ماڭى ەلدەرىنىڭ مەديا-فورۋمى ءوتىپ جاتىر

ەدىلدىڭ بويىن ەن جايلاپ, كاسپي تەڭىزىنىڭ جاعاسىنان قونىس تەپكەن استراحان ءوڭىرى بۇرىن كورشى مەملەكەتتەرمەن, اسىرەسە, قازاقستاننىڭ شەكارالاس وبلىستارىمەن ءوزارا ءىس­كەرلىك, ەكونوميكالىق بايلانىستار­دى جانداندىرۋعا نيەتتى بولسا, ەندى اقپاراتتىق قارىم-قاتىناستى دا ءورىس­تەتۋگە بەت بۇرىپ وتىر. سونىڭ ءدا­لەلىندەي, بىلتىر كاسپي ماڭى ەل­دەرىنىڭ بۇقارالىق اقپارات قۇرال­دارى وكىلدەرى ءۇشىن مەديا-فورۋم ءوت­كىزۋدى قولعا الدى. العاشقى مەديا-فورۋمعا كاسپي تەڭىزىن جاعالاي قو­نىستانعان قازاقستان, رەسەي, يران, ازەربايجان جانە تۇرىكمەنستان ەلدەرى­نەن 200 وكىل مەن 20-دان استام شە­تەلدىك باق قاتىسقان ەكەن. سول مە­ديا-فورۋمنىڭ اياسىندا اتال­عان ەلدەردىڭ بۇقارالىق اقپارات قۇ­رال­دارى اراسىنداعى ىنتىماق­تاستىق تۋرالى 16 كەلىسىمگە قول قويىلىپتى. كەشە استراحاندا ەكىنشى رەت جۇمىسىن باستاعان مەديا-فو­رۋم­دى ۇيىمداستىرۋشىلار كاسپي تەڭىزىنىڭ پروبلەمالارى ونىڭ جاعا­لاۋ­ىنداعى كورشىلەس ەلدەر جۋر­ناليستەرىن بىرىكتىرەتىن تاقىرىپقا اينالعانىن العا تارتتى. مۇنى كاسپي ماڭى ەلدەرىنىڭ مەديا رەسۋرس­تارىندا تەڭىزدىڭ بيورەسۋرستارىن ساقتاپ قالۋ جونىندە 43 ماتەريالدىڭ جارىق كورگەنىنەن بايقاۋعا بولادى. مەديا-فورۋم العاشقى كۇنىنەن-اق اقپارات بەرۋدىڭ ماڭىزدىلىعى مەن اشىقتىعى, قاۋىپسىزدىگى تۋرالى سان قيلى پىكىرتالاستىڭ الاڭىنا اينالدى. قازاقستان مەن رەسەيدىڭ اقپاراتتىق قارىم-قاتىناسىنىڭ پەرسپەكتيۆالارىن تالقىعا سالعان تەلەكوپىر ءوتتى. بۇل مەديا-فورۋمدا كاسپي تەڭىزى ەلدەردى بولمەيتىنى, كەرىسىنشە, بىرىك­تىرە تۇسەتىنى بايقالدى. ايت­قانداي, مەديا-فورۋمدى ۇيىم­داس­تىرۋشىلار «كاسپي ارمانى» تاقى­رىبىمەن ءتورت اتالىم بويىن­شا حالىقارالىق كونكۋرستىڭ جەڭىم­پازدارىن انىقتايدى. جولداسبەك شوپەعۇل, «ەگەمەن قازاقستان» – استراحاننان (رەسەي فەدەراتسياسى)