جەتىسۋدىڭ اجارىن ايشىقتاعان قۇرىلىس

الماتى وبلىسىندا ەكى جىلدا 280 نىسان بوي كوتەرىپ, 17 مىڭ 229 ادام جۇمىسپەن قامتىلدى جەتىسۋ جەرىندە بوي كوتەرگەن قۇرىلىستىڭ سانى دا, ساپاسى دا وزگە وڭىرلەردەن اسىپ تۇرعانىن ستاتيستيكالىق مالىمەت راستايدى. سالىستىرمالى تۇردە الساق, ءبىر جازدا تالدىقورعانداعى ەكى شاعىن اۋداندا 5-9 قاباتتى تۇرعىن ۇيلەر بوي كوتەرىپ, پايدالانۋعا بەرىلدى. مەكتەپ, بالاباقشادان تىس قوس-قوس قاباتتارىن ەرتە كوكتەمنەن بەرى كوتەرىپ ۇلگەرگەن سالتانات سارايى, كورمە كەشەنى سەكىلدى الەۋمەتتىك نىساندار مەن الداعى ايدا العاشقى قوناقتارىن قابىلدايتىن بەس جۇلدىزدى جەكەمەنشىك 12 قاباتتى قوناقۇي ءوز الدىنا. كۇنى كەشە عانا ەلباسى كىرىپ, ارالاپ كورگەن وقۋشىلار سارايى, كوپسالالى اۋرۋحانا جانە جاستار ساياباعى زاماناۋي وزىق ۇلگى ءۇردىسىن پاش ەتىپ تۇرعانى قانداي تاماشا. بۇل مەملەكەتتىك ساياساتقا ساي ارەكەت ەتە ءبىلۋدى كورسەتەدى. سوندىقتان قالاسىندا دا, دالاسىندا دا ەرەكشە قارقىنمەن سالىنىپ, كورگەن جاننىڭ كوزىن تويدىرعان نىسانداردى يگىلىگىنە جاراتىپ وتىرعان حالىقتىڭ قۋانىشى شەكسىز. جەتىسۋلىقتار قالادان دا, اۋىلدان دا پاتەر كىلتىن الىپ تۇرىپ اۋەلگى كەزەكتە سارابدال ساياساتىمەن وسى­ناۋ مۇمكىندىككە جول اشىپ بەرگەن ەلباسىنا العىستارىن ارناۋدا. شا­دىمان شاتتىققا بولەنگەن سول ەل تولا­يىم تابىسقا بولەنۋىنە سەبەپشى بولعان ءوڭىر باسشىسىنا دەگەن ىقىلىسىن دا ىرىكپەۋدە. بۇل – فاكت. ءسوز رەتى كەلگەندە ايتا كەتەر جايت – جەتىسۋ قۇرىلىسىنا ونىڭ ىشىندە تالدىقورعاننىڭ تۇرلەنۋىنە وبلىس اكىمى اماندىق باتالوۆ كوپ كۇش-جىگەر جۇمسادى. جەتىسۋدىڭ كىندىك قالاسىنىڭ باس جوسپارىن جاساۋداعى سالماعى, ىقپالى تاعى بار. سوندىقتان تالدىقورعان قالاسىنداعى تۇرعىن ۇي­لەر مەن الەۋمەتتىك جانە تاعى باسقا نىساندار ءار جىلدارى سالىنعانىمەن بىرتۇتاستىقتى ءارى ادەمىلىكتى ساقتاپ تۇر. مىسالى, قاراتال شاعىن اۋدانىنداعى 4, 5, 6, 9, 12 قاباتتى تۇرعىن ۇيلەر, تەننيس ورتالىعى, دوستىق ءۇيى, ءتىل سارايى, نازارباەۆ زياتكەرلىك مەكتەبى مەن جاتاق­حاناسى, كوپسالالى ءتورت كورپۋستان تۇراتىن اۋرۋحانا, پەرزەنتحانا قاراتال وزەنىن جاعالاي جارىسا بوي تۇزەگەن. گۇلجيەك دەپ تە اتالاتىن وسى جاعالاۋدا ەرەسەكتەر مەن بالالاردىڭ ەركىن سەرۋەندەپ, تىنىعۋىنا بارلىق جاعداي جاسالعان. ال قاراتالدىڭ ەكىنشى جاعالاۋىنداعى شىعىس شاعىن اۋدانى مەن وندىرىستىك ايماقتا, ودان ارىرەكتەگى جەكە تۇلعالار تۇرعىزعان كوتتەدج قالاشىعىندا دا قۇرىلىس قارقىندى جۇرۋدە. تۇتاستاي العاندا, تالدىقورعاننىڭ شىعىس شەڭ­بەرىنەن كىرگەندە قاراتال وزەنىنىڭ قوس جاعالاۋىندا تۇرعىزىلعان ادەمى عيماراتتار كوز جاۋىن الادى. نەگىزى قانداي دا ءبىر نىساننىڭ بوي كوتەرۋى وڭاي جۇمىس ەمەس. ون بەس جىلدان بەرى جەتىسۋ جەرىندە بوي تۇزەگەن قۇرىلىس نىساندارىنىڭ جەرتولەسىن ايتپاعاندا ىرگەتاسى, قابىرعاسى, شاتىرى, سىرتقى بوياۋى دەپ تىزبەلەنەتىن جۇمىستارىنىڭ جاي-جاپسارىن كوكەيگە ءتۇيىپ جۇرگەندىكتەن تالدىقورعاننىڭ وڭتۇستىك-باتىسىندا جاڭادان سالىنىپ جاتقان تۇرعىن ءۇي كەشەنىن تاعى ءبىر رەت ارالادىق. اۆتوكولىك پەن جاياۋ جۇرگىنشىلەر جولى جايلىلىق پەن ەر­كىندىكتى سەزدىرەدى. الماتى – وسكەمەن كۇرەجولىنان تال­دى­قورعان قالاسىنا كىرە­­بەرىستەگى 12 قاباتتى قوناقۇي قۇرى­لىسى اياقتالۋعا جاقىن قالىپتى. اسپان تۇستەس ءزاۋلىم عيمارات اينەگى التىن كۇن نۇرىمەن شاعىلىسا جارقىراپ تۇر. وڭىردە 2014 جىلى قۇرىلىس سالاسىنا بارلىعى 61,674 ملرد تەڭگە ءبولىنىپ, سول قاراجاتقا 297 نىسان قۇرىلىسىن سالۋ جوسپارلانعان ەدى. ناتيجەسىندە 189 نىسان سول جىلى پايدالانۋعا بەرىلىپ, 108 نىسان كەلەسى جىلعا وتكەن-ءتىن. ال 2015 جىلى قۇرىلىس سالاسىنا بولىنگەن 40,0 ملرد تەڭگەنىڭ 99,7%-ى يگەرىلىپ, بەلگىلەنگەن قۇرىلىس نىساندارى تولى­عىمەن پايدالانۋعا بەرىلگەن بولاتىن. اتقارىلعان جۇمىس­تىڭ تالاپقا ساي ەكەندىگى كاسىبي تۇرعىدا ساراپتالادى. بۇل رەتتە جەتىسۋ جەرىندە سالىنعان قۇرىلىس ساپاسىنا كەپىلدىك بەرۋگە بولادى. ال الماتى وبلىسىنىڭ ورتالىعى تالدىقورعان قالاسى بولسىن دەپ بەكىتكەن ەلباسى جارلىعى­نان كەيىن ءوڭىر قۇرىلىسىنىڭ تىزگىنىن امان­دىق باتالوۆ ۇستاعالى سالا­داعى ساپا ماسەلەسىنە سىن ايتىلعان جوق. «جاقسىنىڭ جاقسىلىعىن ايت, نۇرى تاسىسىن» دەگەندەي, ءوڭىر باس­شىسىنىڭ ۇستانىمى وسىعان سايادى. سونداي-اق, تالدىقورعان قالاسىندا بەيبەرەكەت سالىنعان قۇرىلىستى كەزدەستىرە المايسىز. سونىمەن, 2014 جىلى 40 دەن­ساۋلىق ساقتاۋ نىسانىنىڭ قۇرىلىسى مەن سەيسميكالىق نىعايتىلۋىنا رەس­پۋبليكالىق بيۋدجەتتەن 4 ملرد 628 ملن تەڭگە, جەرگىلىكتى بيۋدجەتتەن 4 ملرد 154 ملن تەڭگە بولىنگەن ەدى. ناتيجەسىندە ەڭبەكشىقازاق اۋدانىنىڭ قازاقستان, تاشكەنساز, تۇرگەن, تاۋقاراتۇرىق اۋىل­دارىندا, تالعار اۋدانىنىڭ بىرلىك, قىزىل تۋ اۋىلدارىندا, ىلە اۋدانىنىڭ جاپەك, قوسوزەن, ەكپىندى, پوكروۆكا, قويان­قۇس اۋىلدارىندا, الاكول اۋدانى­نىڭ بالاپانوۆ, توقجايلاۋ اۋىلدارىندا, جامبىل اۋدانىنىڭ دەگەرەس, اقسەڭگىر, تاڭبالىتاس, ىنتىماق اۋىلدارىندا, قاراتال اۋدانىنىڭ جاڭاتالاپ, كوكسۋ اۋدانىنىڭ مۇسابەك اۋىلىندا, ۇيعىر اۋدانىنىڭ سۇڭقار اۋىلىندا بارلىعى 20 دارىگەرلىك امبۋلاتوريا سالىنسا, رايىمبەك اۋدانىنىڭ كەگەن اۋىلىندا ەمحانا, پانفيلوۆ اۋدانىنىڭ جاركەنت اۋىلىندا اۋرۋحانا, تالدىقورعان قالا­سىندا كارديولوگيالىق ورتالىق سالىنىپ, دەنساۋلىق ساقتاۋ نىساندارىن سەيس­ميكالىق نىعايتۋ جۇمىستارى جۇر­گىزىلدى. سونىمەن قاتار, 2014 جىلى 714,4 مىڭ شارشى مەتر تۇرعىن ءۇي پايدالانۋعا بەرىلىپ, بەلگىلەنگەن جوس­پار 106,6 % ارتىعىمەن ورىندالۋىن حالىق قاجەتتىلىگىن وتەۋدىڭ ءبىر جولى دەپ تۇسىنگەن دۇرىس. ەندى وسى مالىمەتتى تاراتا ايتساق, 51 تۇرعىن ۇيدەن 921 پاتەر پايدالانۋعا بەرىلدى. ونىڭ ىشىندە 497,3 مىڭ شارشى مەتر جەكەمەنشىك تۇرعىن ءۇي, 79,8 مىڭ شارشى مەتر كوممەرتسيالىق تۇرعىن ءۇي بولدى. ءسويتىپ, بارلىعى رەسپۋبليكالىق جانە جەرگىلىكتى بيۋدجەتتەن 6449,6 ملن تەڭگە ءبولىنىپ, يگەرىلدى. «وڭىر­لەردى دامىتۋدىڭ جول كارتاسى-2020» مەملەكەتتىك باعدارلاماسىنا سايكەس 29,7 مىڭ شارشى مەتر تۇرعىن ءۇي, سونىمەن قاتار, «جەتىسۋ» الەۋمەتتىك كاسىپكەرلىك كورپوراتسياسى 4,4 مىڭ شارشى مەتر, «سامۇرىق-قازىنا» اق 170,6 مىڭ شارشى مەتر تۇرعىن ءۇي قۇرىلىسىن تولىعىمەن اياق­تاپ, تۇرعىندارعا پاتەر كىلتتەرىن تابىستادى. اتالعان باعدارلاما اياسىندا بيىل بارلىق قارجىلاندىرۋ كوزدەرى ارقىلى 544,1 مىڭ شارشى مەتر تۇرعىن ءۇي پايدالانۋعا بەرۋ قاراس­تىرىلعان. اعىم­داعى جىلى 4 ملرد 376 ملن تەڭگە قارجى ءبولىنىپ, سەگىز ايدا 2319 ملن تەڭگە يگەرىلدى. بيۋدجەتتىك قاراجات ەسە­بىنەن 23,0 مىڭ شارشى مەتر ءۇي, تۇرعىندار مەن مەملەكەتتىك ەمەس مەكەمەلەر ەسەبىنەن 465,5 مىڭ شارشى مەتر ءۇي سالۋ جوسپارلانعان. ال سەگىز ايدا 865,3 مىڭ شارشى مەتر ءۇي پايدالانۋعا بەرىلدى. سونىمەن قاتار, «بايتەرەك دەۆەلوپمەنت» اق ارقىلى «قازاقستان يپوتەكالىق كومپانياسى» اق جەلىسىمەن «نۇرلى جول» ينفراقۇرىلىمدى دامىتۋ باعدارلاماسىنا سايكەس تالدىقورعان قالاسىنىڭ وڭتۇستىك-باتىس شاعىن اۋدانىندا بىلتىر 290 پاتەر قۇرىلىسى باستالعان بولاتىن.  اۋماعى 18,1 مىڭ شارشى مەتر 5 ءۇيدىڭ قۇرىلىسىن دا اياقتاۋ مەجەلەنگەن. اعىمداعى جىلى 40 نىساننىڭ ينجەنەرلىك-كوممۋنيكاتسيالىق ينفرا­قۇرىلىمى جۇرگىزىلىپ, 19 نىسان پاي­دالانۋعا بەرىلەدى. جالپى بۇل شاعىن اۋداندا 2012-2016 جىلدارى قۇنى 9,3 ملرد تەڭگەگە باعالانعان 103 مىڭ شارشى مەترلىك 1411 پاتەردى قۇرايتىن 21 ءۇي پايدالانۋعا بەرىلدى. قازىرگى كەزدە 825 پاتەرلى 7 ءۇيدىڭ قۇرىلىسى جۇرگىزىلۋدە. الماتى وبلىسىندا بيىل ءۇش اۋىسىمدى جانە اپاتتىق جاعدايداعى مەكتەپ ماسەلەسى تولىعىمەن شەشىلەدى. وعان نەگىز بار. ءوڭىر باسشىسى ۇستىمىزدەگى جى­لى جامبىل اۋدانى, جاڭاقۇرىلىس اۋىلىندا ابدوللا قارساقباەۆ اتىنداعى جاڭا مەكتەپتىڭ اشىلۋىنا قاتىسىپ كوپشىلىكتىڭ قۋانىشىن ءبولىستى. «مەملەكەت باسشىسى «100 ناقتى قادام» ۇلت جوسپارىندا ءبىلىم بەرۋ جۇيەسىن جاڭعىرتۋعا ەرەكشە كوڭىل بولگەنى ءمالىم. ۇرپاققا ساپالى ءبىلىم بەرىپ, زامانعا ساي, الەمدىك باسەكەگە قابىلەتتى, تالانتتى جاستاردى دايىنداۋ – ورتاق مىندەتىمىز. ول ءۇشىن بارلىق جاعداي جاسالاتىن بولادى. قازىردىڭ وزىندە وبلىس بيۋدجەتىنىڭ ۇشتەن ءبىر بولىگى ءبىلىم بەرۋ سالاسىنا جۇمسالۋدا. جاڭا مەكتەپتەر سالۋ, ماتەريالدىق-تەحنيكالىق بازانى نىعايتۋ, كۇردەلى جانە اعىمداعى جوندەۋدەن وتكىزۋ, وقۋلىقتار ساتىپ الۋ, كومپيۋتەرلەندىرۋ ماسەلەلەرى وڭ شەشىمىن تابۋدا. وڭىردە بيىل 9 جاڭا مەكتەپ سالىنۋدا, سونىڭ العاشقىسى تامىزدا اشىلسا, 4 مەكتەپ وسى وقۋ جىلىنىڭ العاشقى ايىندا, 4-ەۋى جىل سوڭىنا دەيىن پايدالانۋعا بەرىلەدى. «نۇرلى جول» باعدارلاماسى بويىنشا بيىلعى جىلعا ۇلتتىق قور ەسەبىنەن 27 مەكتەپ جانە 3 بالاباقشا قۇرىلىسىنا 24 ملرد 272 ملن تەڭگە ءبولىندى», – دەگەن ەدى اماندىق باتالوۆ وسىعان وراي. ەلباسىنىڭ تاپسىرماسىمەن جۇزەگە اسىرىلىپ جاتقان «100 مەكتەپ, 100 اۋرۋحانا» باعدارلاماسى اياسىندا الماتى وبلىسىندا ون مەكتەپتىڭ قۇرىلىس جۇ­مىستارى تولىعىمەن اياقتالىپ, پاي­دالانۋعا بەرىلدى. بۇگىنگى كۇنى 7050 وقۋشى سول جاڭا مەكتەپتەردە ءبىلىم الۋدا. مەكتەپتەردەگى حيميا, فيزيكا جانە ينفورماتيكا پاندەرىنە ارنالعان سىنىپتار جاڭا جابدىقتارمەن قامتاماسىز ەتىلگەن. سپورت زالدارى قازىرگى زامانعا ساي سپورتتىق قۇرالدارمەن جاساقتالعان. «جۇمىسپەن قامتۋدىڭ جول كارتاسى-2020» باعدارلاماسى شەڭبەرىندە بىلتىر 15 دارىگەرلىك امبۋلاتوريا مەن فەلد­شەرلىك-اكۋشەرلىك پۋنكت قۇرىلىسىنا رەسپۋبليكالىق جانە جەرگىلىكتى بيۋدجەتتەن 3 ملرد 034 ملن تەڭگە ءبولىنىپ, يگەرىل­دى. باعدارلاما اياسىندا 548 ادام جۇمىسپەن قامتىلدى. جالپى, الماتى وبلىسىندا 350 دارىگەرلىك امبۋلاتوريا, 40 دەنساۋلىق ساقتاۋ نىسانى پايدالانۋعا بەرىلگەن. قورىتا ايتقاندا, بۇل دەرەكتەر جەتى­سۋ­دىڭ قالاسىندا دا, دالاسىندا دا سوڭعى ەكى جىلدا قارقىن العان قۇرىلىستى راستايدى. ەڭ باستىسى, ەلباسى دا, ەل دە الماتى وبلىسىنىڭ اكىمى اماندىق باتالوۆتىڭ ءتول مىندەتىن كەمشىلىكسىز دەرلىك اتقارىپ وتىرعانىنا ريزا. ال ەل العىسىنا كەلسەك, تاياۋدا عانا رايىمبەك اۋدانى, نارىنقول اۋىلىنان 87 جاستاعى تاۋتاي ەستەۋسىزوۆ دەگەن قاريا تەلەفون سوعىپ, تاسادا قالىپ بارا جاتقان نارىنقولعا وبلىس اكىمىنىڭ جاقسى كوڭىل ءبولىپ وتىرعانىن تىزبەلەپ بەرگەندە ء«اپ, بارەكەلدى!» دەپ ءبىز دە قۋاندىق. نارىنقول اۋىلىنىڭ تۇرعىندارىن ساپالى اۋىزسۋمەن قامتۋ ماقساتىندا 2014 جىلى جالپى قۇنى 938,6 ملن تەڭگەگە سۋمەن جابدىقتاۋ جۇيەلەرىنىڭ قۇرىلىسى جانە قايتا جاڭعىرتۋ جوباسى ىسكە اسىرىلا باستاعان ەدى. بيىل قۇرىلىس-مونتاج جۇمىستارىن اياقتاۋعا رەسپۋبليكالىق جانە وبلىستىق بيۋدجەتتەن 382,6 ملن تەڭگە ءبولىنىپ, يگەرىلۋدە. بۇل جوبادا 34 شاقىرىم اۋىل ءىشى سۋ جەلىلەرىن قايتا جاڭعىرتۋ, تۇتىنۋدى جۇيەگە قوسۋ ءۇشىن 341 قۇدىق ورناتۋ, تاعى باسقا نىسانداردى تۇرعىزۋ ۇيعارىلعان. كەلىسىمشارت بويىنشا جۇمىستاردى اياقتاۋ مەرزىمى بيىلعى قاراشا ايىنا جوسپارلانعان. ءيا, جەتىسۋ جەرىندە جان جادىراتىپ, كوڭىل قۋانتاتىن جۇمىستار اتقارىلۋ ۇستىندە. ونىڭ ءبارى ەل يگىلىگىنە ارنالعان. وسىعان وراي وبلىس اكىمىنىڭ ورىنباسارى عالىمجان ابدى­رايىموۆ­پەن اڭگىمەلەسۋدىڭ رەتى تۇسكەن ەدى. – عالىمجان رايىل ۇلى, كاسىبي مامان رەتىندە جەتىسۋ جەرىندە جەدەل قارقىن العان قۇرىلىس جونىندە ايتىپ بەرسەڭىز. – ارينە, الدىمەن تاپسىرىلعان جۇ­مىستى جەتە ءتۇسىنىپ, جاۋاپكەرشىلىكپەن اتقارا ءبىلۋ كەرەك. ءبىز ءتول مىندەتىمىزدى كەمشىلىكسىز اتقارۋ ءۇشىن قولدان كەل­گەننىڭ ءبارىن جاسايمىز. مامان قۇرىلىس­شىلارمەن ءجيى كەزدەسىپ, جۇمىس بارىسىن كەڭىنەن تالقىلايمىز. كەمشىلىك بولدىرماۋدىڭ جولىن انىقتاپ, سوعان سايكەس نىسان قۇرىلىسىن ساپالى ەتىپ سالۋدى باستى ماقسات تۇتامىز. جۇمىس قار­قى­نىن ارتتىرۋ ماسەلەسى قاشاندا كۇن تارتىبىنەن تۇسپەيدى. تاپسىرىلعان مىندەتتى مەرزىمىندە ورىنداۋ ءاربىر قۇرىلىسشىنىڭ قاعيداسىنا اينالعان. ەڭ باستىسى ءبىزدىڭ اتقارعان جۇمىس جونىندەگى ەسەبىمىزدى وبلىس باسشىسى مۇقيات تىڭدايدى. اراسىندا ۋاقىت تاۋىپ الگى قۇرىلىس نىسانىنا ءوزى بارىپ كورەدى. كەمشىن تۇستارى بولسا ءتيىستى تالاپ قويىپ, ۋاقتىلى ورىندالۋىن باقىلاۋعا الادى. ناتيجەسىندە جۇمىستىڭ قارقىنى دا, ساپاسى دا ارتادى. كەمشىلىك اتاۋلىعا كەڭشىلىك بەرىلمەيدى. – كورىكتى قۇرىلىس كوپشىلىكتىڭ كوزايىمى ەمەس پە. بۇل تۋرالى نە دەيسىز؟ – تالدىقورعاندا ءتورت كورپۋس­تان تۇراتىن كوپسالالى اۋرۋحانا قۇرى­­لى­سىنىڭ جەرتولەسىنەن باستاپ قا­بىر­عاسىن قالاپ, شاتىرىن جاۋىپ پاي­دالانۋعا وتكىزۋگە دەيىنگى جۇمىستىڭ باسى-قاسىندا ءجۇردىم. نەگىزگى باقىلاۋ جۇكتەلگەندىكتەن جاۋاپكەرشىلىگى دە زور بولدى. قۇرىلىس جۇمىستارى اياق­تالعاندا سىرتىن قوڭىرقاي تۇسپەن بوياپ ۇلگەرىپتى. كوڭىلىمە جاقپادى. سودان اماندىق عابباس ۇلى كەلدى. بىردەن سىرتقى بوياۋدى ۇناتپاي: «بۇل – اۋرۋحانا. مۇندا ادامدار ەمدەلۋ ءۇشىن جابىرقاۋ كوڭىلمەن كەلگەندە جاندارىن سەرپىلتەر اشىق ءتۇستى عيماراتقا كىرسە, تىڭايىپ, كوتەرىلىپ قالۋى كەرەك. بىلە-بىلسەڭىزدەر, بۇل – ءبىرىنشى ەم», – دەپ كوپسالالى جاڭا اۋرۋحانانىڭ ءتورت كورپۋسىن دا سارعىش تۇسكە, جوعارى بەلدەۋىن كۇلگىن تۇسكە بوياتقىزدى. بۇل ەكى ءتۇس ۇيلەسىپ كورىكتى ءارى كورگەن جان­نىڭ كوڭىلىن جادىراتار كورىنىس بەرىپ تۇر. وسى اۋرۋحانانىڭ قاتارىندا بۇدان كوپ جىل بۇرىن سا­لىنعان قوس كورپۋستى پەرزەنتحانانى دا ءدال وسىنداي تۇسپەن بوياتىپ, شاتىرىن اۋىستىرىپ ەدىك, ول عيمارات تا جاڭارىپ, جايناپ شىعا كەلدى. مۇنداي مىسالداردى جەتىسۋدىڭ وزگە قالالارى مەن اۋىلدارىنان دا كوپتەپ كەزدەستىرۋگە بولادى. جالپى,  جەتىسۋ ءوڭىرى ەكونو­ميكالىق جانە ەكونوميكالىق-مادەني دامۋدىڭ داڭعىل جولىنا ءتۇسىپ, وركەندى ىستەردى ورلەتۋگە جۇمىلعان. قالاسى مەن دالاسى قىزۋ تىرلىككە تولى. ءيا, راسىندا دا ونىڭ ءبارى ەل يگىلىگىنە ارنالعان. ال مۇنداي ۇمتىلىس بولاشاققا دەگەن سەنىمدىلىكتى نىعايتىپ, ىرىس-بەرەكەنى مولايتۋعا بەرىك نەگىز قالايتىنى ءسوزسىز. نۇربول الدىباەۆ, «ەگەمەن قازاقستان» الماتى وبلىسى