قىتايدا قازاق كۇرەسىنەن الەم چەمپيوناتى باستالدى

قازاقتىڭ بەلىن كەمەرمەن بۋعان كورىكتى كۇرەسى قىتاي جەرىنە دە تۋىن تىگىپ جاتىر. كەشە وسى ەلدىڭ شىڭجاڭ-ۇيعىر اۆتونوميالى رايونىنداعى ىلە-قازاق وبلىسى اۋماعىنىڭ موڭعولكۇرە ەلدى مەكەنىندە قازاق كۇرەسىنەن جاھاننىڭ Vءى چەمپيونات جالاۋىن جەلبىرەتتى. نەگىزى, بۇل ايماقتىڭ تاڭداپ الىنۋى تەگىن ەمەس. بۇعان دەيىن وسى جەردە قازاق كۇرەسىنەن ازيا چەمپيوناتى وتكەن. ول ادام كورسە تاڭداناتىن تارتىستى تالاس بولىپ ورنەك تىزگەن. وسى جارىستىڭ قارساڭىندا دۇنيەجۇزىلىك قازاق كۇرەسى فەدەرا­تسيا­سىنىڭ پرەزيدەنتى سەرىك توكيەۆ­پەن كەزدەسكەنىمىزدە, ول ءبىز­گە قىتايدا وتەتىن الەم چەمپيو­نا­تىنا 30-عا جۋىق ەلدىڭ بالۋاندارى قاتىساتىنىن ايتقان. – بيىلعى چەمپيوناتقا كوپ­تەگەن ەلدەردىڭ بالۋاندارى قاتى­سا­دى. وعان ءبىز العاش رەت اۆسترا­ليا­نى شاقىرىپ وتىرمىز. سونىمەن بىرگە, جارىسقا يندونەزيا, گرۋزيا, يران ەلدەرىنەن بولەك, ەۋرو­پا­نىڭ بىرنەشە مەملەكەتىنەن كۇرەس شەبەرلەرى كەلەدى. باستى ماق­ساتىمىز – الەم چەم­پيو­­ناتىن ءوت­كىزىپ قانا قويماي, ءتول كۇرە­سى­مىز­دى جەر-جەرگە, ەل-ەلگە تاراتىپ, ءتورت­كۇل دۇنيەنىڭ ءتورت بۇرىشىنان فەدەراتسيالار اشۋ. ءسويتىپ, ونى 2018 جىلى وتەتىن جازعى ازيا ويىندارىنىڭ باعدار­لاماسىنا ەنگىزۋ, – دەدى س.توكيەۆ. وسى جەردە سەرىك ادام­ ۇلى جا­ھان­­دىق جارىستى ۇيىم­داس­تىرۋ­عا, وتكىزۋگە قولۇشىن بەرگەن قىتاي ەلىنە العىسىن جاسىرمادى. – قى­تايدا دۇنيەجۇزىلىك قازاق كۇرەسى فەدەراتسياسىنىڭ ىستەگەن جۇمى­سى ارقاسىندا شىڭجاڭ-ۇيعىر اۆتونوميالى رايونىنىڭ 10 اۋدانىندا, ىلە-قازاق اۆتونوميالى وبلىسىنىڭ 3 قالاسىندا قازاق كۇرەسىنەن فەدەراتسيالار اشىلدى. بۇعان ەلدەگى كۇرەس دەسە دەلەبەسى قوزاتىن قاۋىم قۋانىپ قالدى. بۇل ەلدەگى قانداستارىمىز الەم چەمپيوناتىنىڭ شىعىنىن دا وزدەرى كوتەرىپ وتىر. وسى جەردە مەن ەلىمىزدىڭ جانە فەدەراتسيانىڭ اتىنان قىتايدىڭ شۇار-داعى جوعارى لاۋازىم يەسى اسحات كەرىم­بايعا, ىلە-قازاق اۆتونوميا­لى وبلىسىنىڭ بۇرىنعى اكىمى قىزايجان سەيىلقوجا ۇلىنا العىس ايتقىم كەلەدى. بۇل ازاماتتار ءتول كۇرەسىمىزدەن جارىستاردىڭ وتۋىنە قولدان كەلگەنشە كومەكتەستى. سونى­مەن بىرگە, التايدىڭ ار جا­عىن­­داعى اعايىننىڭ اراسىندا ءتول كۇرە­سىمىزدىڭ دامۋىنا بارىنشا ۇلەس قوسىپ جۇرگەن باۋىرىمىز سەرىك كەنەنبايدىڭ ەڭبەگى ەرەن. ول قىتايدا سوڭعى ەكى جىلدا ءبىراز جۇمىستار جاسادى. سونىڭ ناتيجەسىندە قامالى بيىك شىن ەلىندە ۇلتتىق كۇرەسىمىزدىڭ جالاۋى جەلبىرەدى. بيىلعى دوداعا دايىن­دىق­تى دا وسى باۋىرىمىز اتقا­رىپ ءجۇر. قىتايداعى اعايىن افريكا مەن ازيا ەلدەرىنەن كەلە­تىن بالۋان­داردىڭ, سپورت دەلە­گا­تسيا­لارىنىڭ بارلىق جول شىعىنىن دا وزدەرىمىز كوتەرەمىز دەپ وتىر. بۇل, ارينە, ىلە-قازاق اۆتونوميا­لى وبلىسى موڭعولكۇرە اۋدانى باسشىلارىنىڭ قازاق كۇرەسىنە دەگەن قامقورلىعىن ءبىل­دىرەدى, – دەدى سەرىك توكيەۆ. بۇعان دەيىن قىتايدا ەكى رەت ازيا چەمپيوناتى وتكەن ەدى. سوڭ­عىسى 2015 جىلى گانسۋ پرو­ۆين­­تسيا­سىنا قاراستى اقساي اۋدانىن­دا جالاۋىن جەلبىرەتتى. دۇنيە­جۇزىلىك قازاق كۇرەسى فەدەراتسياسى باسشىسىنىڭ ايتۋىنشا, ول قىتايداعى ەڭ ۇلكەن جارىستاردىڭ ءبىرى بولعان. بيىلعى الەم چەمپيو­ناتىنا دايىندىق ماسەلەسى سول جارىستان كەيىن شەشىلدى. «وسى دودادان كەيىن فەدەراتسيا قىتايدا الەمدىك باسەكەنى وتكىزۋگە بىلەك سىبانا كىرىسىپ, دايىندىقتى باستاپ كەتتى», دەدى ول. – ءبارى ازيا چەمپيوناتىنان باس­تالدى. بۇل جارىستىڭ وتۋىنە سەرىك كەنەنباي مەن ايدارحان قاب­دوللا دەگەن ازاماتتاردىڭ كومەگى كوپ ءتيدى. ولار 2012 جىلى گانسۋ پروۆينتسياسىنا بارىپ, سول جەردىڭ اتقامىنەر ازاماتتارىمەن كەزدەسىپ, ازيا چەمپيوناتىن وتكىزۋگە كەلىسىم الىپ كەلدى. سەرىك كەنەنبايدىڭ ءوزى قىتايدا تۋىپ-وسكەن. قازىر ازيا فەدەراتسياسىنىڭ باس حاتشىسى. سول كەزدە التايدىڭ ار جاعىندا ۇلتتىق كۇرەسىمىزدى ناسيحاتتاۋدا, شىنى كەرەك, ءبىراز قيىنشىلىقتار بولدى. شىڭجاڭ-ۇيعىر اۆتونوميا­لى رايونى – اۋماعى جاعى­نان قىتايداعى ەڭ ۇلكەن ءوڭىر. وندا 20 ملن-نان اس­تام حالىقتىڭ تۇراتىنىن بىلە­سىزدەر. ال قازاقتار شامامەن 2 ملن. وسىندا ۇرىمجىدەن 1 500 شا­قىرىم جەردە گانسۋ دەگەن پرو­ۆينتسيا بار. بۇل جەردە كەزىن­دە گيمالاي تاۋىنان اسىپ, ءتۇر­كيا­عا بەت العان كوشتەن قالىپ قوي­عان قانداستارىمىز تۇرادى ەكەن. جان سانى ازداۋ. سولارعا وتكەن عاسىر­دىڭ 50-ءشى جىلدارىندا اۆتونو­ميا بەرىلىپتى. وسى جەرگە ءبىز 2012 جىلى سەرىك كەنەنباي مەن ايدار­حان قابدوللانى اۋدان باسشىلارىمەن كەزدەسۋگە جىبەردىك. ولار گانسۋدەگى قانداستارىمىز كوپ تۇرا­تىن اقساي اۋدانىنا بارىپ, باس­شى­لارىمەن كەزدەسىپ, 2013 جىلى قازاق كۇرەسىنەن ازيا چەمپيونا­تىن وتكىزۋگە كەلىسىمدەرىن الىپ قايت­تى. ءسويتىپ, قۇرلىقتىق باسە­كەگە دايىندىق باستالىپ, ول وتە جاقسى دەڭگەيدە ءوتتى. ونىڭ اشى­لۋ سالتاناتىنىڭ ءوزى كەرەمەت اسەر قالدىردى. وندا 50 كيىز ءۇي تىگى­لىپ, 49 تايقازان قويىلدى. 700-دەي قىز-جىگىت قازاقتىڭ حالىق بي­لەرىن بيلەپ, ونەر كورسەتتى. سەرىك كەنەن­بايدىڭ ايتۋىنشا, ازيا چەم­پيو­ناتىنىڭ وسىنداي دەڭ­گەيدە وتۋىنە ۇلەس قوسۋ ارقىلى سول جەردەگى قانداس­تارى­­مىز ەلگە دەگەن سا­عى­­نىش­تارىن كورسەتكىسى كەل­گەن. ول نەنى ايتسا دا ءبىلىپ ايتا­دى. سول كەزدە مەنىڭ اق­ساي­­داعى باۋىرلارىمىزدىڭ ىشكى قى­تا­ي­­دا تۇرسا دا, حالقىمىزدىڭ سالت-ءداس­تۇرىن, ادەت-عۇرپىن جاقسى ساقتا­عانىنا كوزىم جەتتى, – دەيدى س.توكيەۆ. وسى جارىستان كەيىن قىتايدا قازاق كۇرەسىنە دەگەن كوزقاراس وزگەرەدى. سپورت مينيسترلىگىنىڭ رۇقساتىمەن ەل-ەلدە, جەر-جەردە ۇلتتىق كۇرەسىمىزدەن جارىستار وتكىزىلە باستايدى دەپ سەنەمىز. داستان كەنجالين, «ەگەمەن قازاقستان» – موڭعولكۇرە (قىتاي)