ەلباسى «شاعالا اگرو» جشس-نە باردى (فوتو)

قازاقستان پرەزيدەنتى نۇرسۇلتان نازارباەۆ اۋىل شارۋاشىلىعى داقىلدارىن وسىرۋمەن اينالىساتىن كاسىپورىن جۇمىسىمەن تانىستى, دەپ حابارلايدى ەگەمەن-اقپارات. مەملەكەت باسشىسىنا جيىن-تەرىن ناۋقانىنىڭ بارىسى, وڭىردەگى اگروونەركاسىپ كەشەنىنىڭ نەگىزگى كورسەتكىشتەرى جانە ونى دامىتۋ جولىندا اتقارىلىپ جاتقان شارالار تۋرالى باياندالدى. قازاقستان پرەزيدەنتىنە سولتۇستىك قازاقستان وبلىسىنداعى كاسىپورىندار شىعاراتىن اۋىل شارۋاشىلىعى تەحنيكاسى ۇلگىلەرى كورسەتىلدى. سونداي-اق, نۇرسۇلتان نازارباەۆ مەحانيزاتورلارمەن جانە وبلىستىڭ جەتەكشى اگرارلىق كومپانيالارى وكىلدەرىمەن اڭگىمەلەستى. كەزدەسۋ بارىسىندا ەلىمىزدىڭ تاۋەلسىزدىگى جىلدارى وسى سالادا بولعان وڭ وزگەرىستەر جونىندە ايتىلدى. «سىزدەردىڭ شارۋاشىلىقتارىڭىز سولتۇستىك قازاقستان وبلىسىنىڭ تەك قانا بيداي وندىرەتىن ءوڭىر ەمەس ەكەنىن دالەلدەپ بەردى. بۇل جەردە مايلى داقىلداردىڭ دا بارلىق ءتۇرى جاقسى وسەدى. بۇگىندە اگروونەركاسىپ سەكتورىندا نەگىزگى ماسەلەلەردىڭ ءبارى شەشىمىن تاپتى. ەندى ەڭبەك ونىمدىلىگىن جانە وندىرىلەتىن ءونىم ساپاسىن ارتتىرۋ قاجەت», – دەدى مەملەكەت باسشىسى. ەلباسىعا شارۋالار جان-جاقتى قولداۋى جانە اۋىل شارۋاشىلىعى سالاسىنداعى ءتيىمدى مەملەكەتتىك ساياساتى ءۇشىن العىستارىن ءبىلدىردى. سوڭىندا نۇرسۇلتان نازارباەۆ جينالعاندارعا جەمىستى جۇمىس, تابىس پەن باق-بەرەكە تىلەدى. ەگەمەن-اقپارات