بيزنەستىڭ جابىلىپ قالماۋىنا جول اشادى

وتاندىق كاسىپورىنداردى بانكروت دەپ تانىلعاننان كەيىن دە جابىلىپ قالۋدان امان ساقتاپ قالۋ مۇمكىندىكتەرى بار. مۇنداي مۇمكىندىكتەر «قر كەيبىر زاڭنامالىق اكتى­لە­رىنە وڭالتۋ جانە بانكروتتىق ماسەلەلەرى بويىنشا وزگە­رىستەر مەن تولىقتىرۋلار ەنگىزۋ تۋرالى» زاڭىندا قاراس­تى­رىلعان. كەشە ورتالىق كوممۋنيكاتسيالار قىزمەتىندە وتكەن بريفينگتە وسى زاڭنىڭ ءتيىمدى تۇستارى ءسوز بولدى. قازىرگى تاڭدا ەلىمىزدە بانكروت بولۋدىڭ الدىندا تۇرعان كاسىپورىنداردىڭ جالپى بورىشى 286 ميلليارد تەڭگەدەن اسىپ جىعىلادى ەكەن. 2 مىڭعا تارتا كاسىپورىن وسىنداي قيىن جاعدايعا تاپ بولعان. جىل باسىنان بەرى 9 اي ىشىندە 2 247 كاسىپورىن بانكروت بولىپ ۇلگەرگەن. ال جوعارىدا ايتىلعان زاڭ ولاردى تاراپ كەتۋدەن ساقتاپ قالۋعا جول اشىپ وتىر. بۇل شارا ەكونوميكالىق داعدارىس كارىنە مىنگەن تۇستا جۇمىس ىستەپ تۇرعان ءوندىرىس ورىندارى مەن جۇمىس ورىندارىن ساقتاپ قالۋ ءۇشىن قولعا الىنعانى تۇسىنىكتى. – زاڭ بويىنشا, بورىشكەرگە كرەديتورمەن مامىلەگە كەلىپ, قارىزىن قايتارۋ جولدارى مەن مەرزىمىن كەلىسۋگە بولادى. سونداي-اق, بانكروت بولعان كاسىپورىندى ساتۋعا جانە مەنشىك يەسىن اۋىستىرۋعا دا مۇمكىندىك بار, – دەيدى قارجى مي­نيسترلىگى مەملەكەتتىك كىرىستەر كوميتەتى سالىق دەپارتامەنتىنىڭ ديرەكتورى ەرلان نۇرلانباەۆ. ونىڭ ايتۋىنشا, بورىشكەر مەن كرەديتوردىڭ بىتىمگە كەلۋى ءۇشىن كەلىسسوز جۇرگىزۋىنە  2 اي ۋاقىت بەرىلەدى. وسى كەزەڭدە بورىشكەرگە ايىپپۇل سالۋ, بەرە­شەكتەرى ءۇشىن سىياقى ەسەپتەۋ توقتاتىلادى. تاعى ءبىر ايتا كەتەر­لىگى, ەكى تاراپتىڭ بىتىمگە كەلۋى ءۇشىن قويىلاتىن باستى تالاپتاردىڭ ءبىرى – جۇمىسكەرلەرگە بەرەشەك ەڭبەكاقى الدىن الا تو­لىقتاي وتەلۋگە ءتيىس. زاڭعا ءتيىستى وزگەرىستەر ەن­گى­زىلمەي تۇرعان كەزدە سوتتا قارا­لاتىن بانكروتتىق راسىمدەر­دىڭ جارتىسىنا جۋىعى ءۇش ايعا دەيىن سوزىلعان ەكەن. ءتىپتى ءاربىر ونىنشى ءىس ءبىر جىلعا دەيىن قارالىپتى. جاڭادان ەنگىزىلگەن وزگەرىستەردىڭ ارقاسىندا بۇل مەرزىم 2 ايمەن شەكتەلىپ وتىر, ياعني, ۋاقىت ۇنەم­دەۋگە جول اشىلدى دەۋگە بولادى. الەمدىك ەكونوميكادا ورىن العان كۇردەلى احۋال قازاقستان نارىعىنا دا اسەر ەتىپ جاتقا­نى بەلگىلى. بۇگىنگى تاڭدا نەسيە بەرۋشىلەردىڭ الدىنداعى مىندەتتەمەسىن ورىنداي الماي, قيىن جاعدايعا تاپ بولعان بيزنەس نىساندارى از ەمەستىگىنە وسى بريفينگتە كوز جەتكىزدىك. سوعان قاراماستان, كاسىپكەرلەر جۇمىس ىستەپ تۇرعان بيزنەسىن ساقتاپ قالۋعا نيەتتى ەكەنى تۇسىنىكتى. مەملەكەت باسشىسى ن.نازارباەۆتىڭ «100 ناقتى قادام» ۇلت جوسپارىنىڭ اياسىندا ازىرلەنگەن زاڭ كاسىپكەرلەر­گە وسى مۇمكىندىكتى ۇسىنىپ وتىر. مەملەكەتتىك كىرىستەر كوميتە­تى قازىر ونى وتاندىق بيزنەس وكىل­دەرىنە ءتۇسىندىرۋ جۇمىستارىن جۇرگىزىپ جاتىر. ارنۇر اسقار, «ەگەمەن قازاقستان»