تۇجىرىمداما جوباسى تالقىلاندى

ەلورداداعى ۇلتتىق اكادەميالىق كىتاپحانادا مادەنيەت جانە سپورت مينيسترلىگى قازاق عىلىمي-زەرتتەۋ مادەنيەت ينس­تيتۋتىنىڭ ۇيىمداستىرۋىمەن ەلىمىزدە كينەماتوگرافيانى 2050 جىلعا دەيىن دامىتۋ تۇجىرىمداماسىنىڭ جوباسىنا قاتىستى دوڭگەلەك ۇستەل ءوتتى. وعان كينەماتوگرافشىلار, مەملەكەتتىك جانە ۇكىمەتتىك ەمەس ۇيىمداردىڭ وكىلدەرى, عىلىم مەن ونەر سالاسىنداعى زيالى قاۋىم قاتىستى. شارادا «قازاقستان رەسپۋب­ليكا­سىن­داعى كينەماتوگرافيانى 2050 جىلعا دەيىن دامىتۋ تۇجىرىمداماسى جوباسى» تالقىلاندى. ءىس-شارا بارىسىندا قازاقستان كينەماتوگرافياسىن 2050 جىلعا دەيىن دامىتۋ تۇجىرىمداماسىنىڭ جوباسىن جەتە ءارى تولىق تالقىلاۋ, كينو ءتۇسىرىلىمنىڭ كولەمىن ارتتىرۋعا قارايلاسۋ ماسەلەلەرى, كينو ونەرى­نىڭ دامۋىن قولداۋ جانە جوعارى ساپالى كينو تۋىندىلاردى ءتۇسىرۋ, كينوتەاترلار جەلىلەرىن كوبەيتۋ جانە جەتىلدىرۋ, كينو سالاسى ەكونوميكاسىنىڭ ءوسۋى جانە قازاقستاندىق كينو ونىمدەردىڭ ينۆەستيتسيالىق تارتىمدىلىعىن ارتتىرۋ ماسەلەلەرى قارالدى. دوڭگەلەك ۇستەل وتىرىسىندا مادەنيەت جانە سپورت ءمينيسترى ارىستانبەك مۇحامەدي ۇلى وتاندىق كينەماتوگرافيانى 2050 جىلعا دەيىن دامىتۋ تۇجىرىمداماسىنىڭ قابىلدانۋى ەلىمىزدەگى كينو ونەرى احۋالىن جاقسارتۋعا باعىتتالعان ماڭىزدى قادام بولاتىندىعىن باسا ايتتى. «ەلىمىزدىڭ تاۋەلسىزدىك جىلدارى ىشىندە مۇنداي تۇجىرىمداما العاش رەت ازىرلەنىپ وتىر. ەگەر ءبىز كينو تۋرالى جەكە زاڭ قابىلداي الساق, وتە قۋانىشتى وقيعا بولادى. وندا ونەردىڭ وسىناۋ تۇرىنە قاتىسى بار بارلىق قىزمەت تۇرلەرى جازىلار ەدى. بۇل ءبىز ءۇشىن وتە ماڭىزدى. بىزگە كينو تۋرالى جەكە زاڭ اسا قاجەت. مەن بۇل ماسەلەگە تۇسىنىستىكپەن قاراعان ءبىزدىڭ ەكسپەرتتىك قوعامداستىققا ريزامىن. سەبەبى, بۇل – قاراپايىم ماسەلە ەمەس. بۇگىندە ءبىز فرانتسيا, رەسەي جانە باسقا دا ەلدەردىڭ كينەماتوگرافيا تۋرالى زاڭدارىن زەردەلەدىك», – دەدى ول. سونىمەن قاتار, ا.مۇحامەدي ۇلى بۇگىنگى كۇنى ەلىمىزدە مادەنيەت تۋرالى وتە جاقسى زاڭ قابىل­دانعانىن, وندا كىتاپحانا ءىسىن, مۋزەي ءىسىن, كينەماتوگرافيانى جانە باسقا دا سالالاردى دامىتۋ تەتىكتەرى جان-جاقتى كورسەتىلگەنىن ەسكە سالدى. «ەگەمەن-اقپارات»