الماتى وبلىسىندا ءىس-ساپارمەن جۇرگەن ەلباسى بىرقاتار الەۋمەتتىك ماڭىزى بار نىسانداردى ارالادى. بۇل تۋرالى ەگەمەن-اقپارات اقوردانىڭ ءباسپاسوز قىزمەتىنە سىلتەمە جاساپ حابارلايدى.
ەلباسى «نام گ.ن.» شارۋا قوجالىعىندا بولدى
مەملەكەت باسشىسى اۋىل شارۋاشىلىعى داقىلدارىن كۇتىپ-باپتاۋعا ماماندانعان كاسىپورىننىڭ جۇمىسىمەن تانىستى.
قازاقستان پرەزيدەنتىنە وبلىستىڭ اگروونەركاسىپ كەشەنىنىڭ نەگىزگى كورسەتكىشتەرى جانە قانت قىزىلشاسى ءوندىرىسىن دامىتۋ ءۇشىن قابىلدانىپ جاتقان شارالار تۋرالى باياندالدى.
نۇرسۇلتان نازارباەۆ قازىر اۋىل شارۋاشىلىعىن مەملەكەتتىك سۋبسيديالاۋعا دەگەن كوزقاراستىڭ وزگەرگەنىن اتاپ ءوتتى.
– مەنىڭ شارۋالارعا ايتىپ جۇرگەن وي-پىكىرىمنىڭ بارلىعىنىڭ نەگىزگى ءتۇيىنى – ەڭبەك ونىمدىلىگىن سۋبسيديالاۋ قاجەتتىگى. ياعني, قاراجات ەڭ اقىرعى ءونىم ءوندىرىسى ءۇشىن بولىنەتىن بولادى, – دەدى مەملەكەت باسشىسى.
بۇدان بولەك, نۇرسۇلتان نازارباەۆ وڭدەۋ كاسىپورنىنىڭ اگرارلىق تەحنيكالارى مەن اۋىل شارۋاشىلىعى ونىمدەرى كورمەسىن ارالادى.
سوڭىندا ەلباسى ءوڭىردىڭ شارۋالارىمەن اڭگىمەلەسىپ, الداعى جۇمىستارىنا تابىس تىلەدى. بۇدان كەيىن پرەزيدەنت تەكەلى تاۋ-كەن وڭدەۋ كەشەنىندە بولىپ, كاسىپورىننىڭ جۇمىسىمەن تانىستى.
تالدىقورعان قالاسىنىڭ كوپسالالى اۋرۋحاناسىندا بولدى
قازاقستان پرەزيدەنتىنە وبلىستىڭ دەنساۋلىق ساقتاۋ جۇيەسىن دامىتۋدىڭ باستى باعىتتارى جانە ءتيىستى مەملەكەتتىك باعدارلامالاردىڭ ىسكە اسىرىلۋ بارىسى تۋرالى باياندالدى.
سونداي-اق, نۇرسۇلتان نازارباەۆ اۋرۋحانا قىزمەتكەرلەرىمەن كەزدەستى. ولار جۇرگىزىلىپ جاتقان الەۋمەتتىك ساياساتقا قولداۋ ءبىلدىرىپ, دەنساۋلىق ساقتاۋ سالاسىنا قامقورلىعى ۇشىن ەلباسىعا العىستارىن ايتتى. 300 ادام سياتىن مەديتسينالىق مەكەمە ستاتسيونارلىق, ستاتسيوناردى الماستىراتىن جانە جوعارى مامانداندىرىلعان مەديتسينالىق كومەك كورسەتەدى. كوپسالالى اۋرۋحانا جاڭا مەديتسينالىق قۇرىلعىلارمەن جابدىقتالعان.
وقۋشىلار سارايىندا بولدى
مەملەكەت باسشىسى بيولوگيا, فيزيكا كابينەتتەرىن, تەحنيكالىق شىعارماشىلىق مودەلدەرى كورمەسىن, حورەوگرافيا زالىن, ۇلكەن كونتسەرت زالىن ارالاپ كورىپ, كوركەمونەر گالەرەياسىنداعى سۋرەتتەر ەكسپوزيتسياسىمەن تانىستى.
ەلباسى نازارىنا ءان جانە بي ونەرى بويىنشا بالالاردىڭ كونتسەرتتىك نومىرلەرى ۇسىنىلدى.
بۇدان بولەك, نۇرسۇلتان نازارباەۆ وقۋشىلار سارايىنا كەلەتىن بالالارمەن جانە ولاردىڭ اتا-انالارىمەن اڭگىمەلەسىپ, شىعارماشىلىق تابىس پەن باق-بەرەكە تىلەدى.
سوڭىندا مەملەكەت باسشىسى وقۋشىلار سارايىنا جايلى اۆتوبۋس تارتۋ ەتتى.
عيماراتتىڭ جالپى الاڭى – 13 مىڭ شارشى مەتردەن استام. مەكەمە ينفراقۇرىلىمى شەبەرحانا, زەرتحانا, كورمە جانە ءماجىلىس زالدارىن, سونداي-اق مۋزەي, مەدياتەكا, دىبىس جازۋ ستۋدياسى مەن وبسەرۆاتوريانى قامتيدى.
سونىمەن قاتار نۇرسۇلتان نازارباەۆ تالدىقورعان قالاسىنىڭ دامۋ جوباسىمەن تانىستى. تالدىقورعاندا بيىل 12 كوپقاباتتى تۇرعىن ءۇي سالىنسا, الداعى جىدى تاعى 14 ءۇيدىڭ قۇرىلىسى باستالماق. سونداي-اق, بولاشاقتا قالادا بىرنەشە الەۋمەتتىك نىساندار جانە 8, 9, 10 ىقشام اۋداندار تۇرعىزىلادى. بۇل تۋرالى ەلباسىنا قالا اكىمى باعدات قاراساەۆ اڭگىمەلەدى دەپ حابارلادى تالدىقورعان قالاسى اكىمىنىڭ ءباسپاسوز حاتشىسى دانيار سەيسەنباەۆ.
