الماتى قالاسىنىڭ 1000 جىلدىق مەرەيتويىنا قاتىستى شارالارعا قاتىسىپ ءسوز سويلەگەن مەملەكەت باسشىسى نۇرسۇلتان نازارباەۆ ۇلكەن الماتى اينالما اۆتوجولى تۋرالى دا ايتتى دەپ حابارلايدى ەگەمەن-اقپارات. «كەلەسى جىلى «نۇرلى جول» باعدارلاماسى اياسىندا ۇلكەن الماتى اينالما اۆتوجولىنىڭ قۇرىلىسى باستالادى. بۇل مەملەكەت ءۇشىن 2017 جىلدىڭ باستى شارۋالارى قاتارىنان بولعالى وتىر» دەدى ەلباسى. سونىمەن قاتار نۇرسۇلتان نازارباەۆ اتالعان جوبانىڭ ماڭىزدىلىعىنا توقتالدى. «بىرىنشىدەن, قالاعا كىرەتىن ماشينالار سانى ازايادى. ەكىنشىدەن, قىتاي مەن باتىس ەۋروپانى جالعايتىن ماگيسترال الماتى ارقىلى وتەتىن بولادى. بۇل قالانىڭ دامۋىنا ۇلكەن سەرپىن بەرەدى. ۇلكەن الماتى اينالما جولى باتىس ەۋروپا-باتىس قىتاي دەپ اتالعان حالىقارالىق ماگيسترالدىڭ ءبىر بولىگى بولماق», دەدى پرەزيدەنت.
ۇلكەن الماتى اينالما اۆتوجولى
الماتى قالاسى كوشەلەرىندەگى ماشينالار سانىن ازايتۋعا باعىتتالعان اۆتوكولىك جولىنىڭ جوباسى. جول قاراساي, ىلە جانە تالعار اۋداندارىنىڭ تەرريتورياسىمەن وتەدى. باستاپقى ەسەپ بويىنشا, جوبانىڭ قۇنى 79 ملرد تەڭگە. ۇزىندىعى – 65,5 كيلومەتر. تەحنيكالىق كاتەگورياسى – 1 «ا», اقىلى.
اينالما جول 14 كوپىر, ەكى دەڭگەيلى 8 اۆتوكولىك اينالماسىنان (رازۆيازكا) تۇرادى. سونىمەن قاتار ول ەكى جەردە تەمىر جولدى, رەسپۋبليكالىق دەڭگەيدەگى 5 اۆتوكولىك جولىن, جەرگىلىكتى دەڭگەيدەگى 14 جولدى جانە 8 دالا جولىن باسىپ ءوتۋى ءتيىس. جوبا كەي جەرلەردە ەلەكتر لينيالارىن, سۋ قۇبىرلارىن, كارىز جۇيەلەرىن اۋىستىرۋدى قاجەت ەتەدى.
جول الماتىنىڭ باتىسىنداعى قىرعاۋىلدى اۋىلىنىڭ تۇسىنان باستالىپ, شىعىس جاعىندا الماتى-تالعار تراسساسىنىڭ 22-ءشى كيلومەترىنەن اياقتالادى. ساياجايلار, شارۋا قوجالىقتارى ورنالاسقان ايماقپەن وتەدى.
ۇلكەن الماتى اينالما جولىن سالۋ ءۇشىن 724 جەر ۋچاسكەسىن ساتىپ الۋ كوزدەلگەن بولاتىن. ونىڭ 714-ءى ساتىپ الىندى.
العاشقى جوسپار بويىنشا 2014 جىلى سالىنىپ ءبىتۋى ءتيىس-ءتى. الايدا, قارجى داعدارىسىنا بايلانىستى جوبانى ىسكە اسىرۋ ۋاقىتشا توقتاتىلدى.
ەگەمەن-اقپارات
