قازاقستان پرەزيدەنتى نۇرسۇلتان نازارباەۆ الماتى قالاسىنىڭ 1000 جىلدىعىنا ارنالعان سالتاناتتى شارالارعا كەلدى. مەملەكەت باسشىسى جاڭا سالىنعان «الماتى ارەنا» مۇز ايدىنىنىڭ اشىلۋىنا قاتىستى. مۇز ايدىندا «الماتىنىڭ 25 شىڭى» اتتى سالتاناتتى شارا ءوتىپ جاتىر دەپ حابارلايدى ەگەمەن-اقپارات.
«الماتىنىڭ 1000 جىلدىعىن الماتىلىقتارمەن بىرگە قازاقستان عانا ەمەس, بۇكىل الەمدىك قاۋىمداستىق تا اتاپ وتۋدە. بۇل تاريحي داتا يۋنەسكو-نىڭ مەرەيتويلىق داتالار تىزبەسىنە ەندى. وسى شەشىمنەن الماتىنىڭ ايماقتىق, جاھاندىق دامۋداعى ايرىقشا ءرولى كورىنىپ وتىر. الاتاۋ بوكتەرىندەگى قاسيەتتى مەكەن ءوزىنىڭ ۇلكەن تاريحىندا تالاي وقيعالارعا كۋا بولدى. بۇل جەرمەن ۇلى جىبەك جولى ءوتتى. ول شىعىس پەن باتىستى, سولتۇستىك پەن وڭتۇستىكتى, ۇلانعايىر ەۋرازيانى جالعاعان العاشقى بۇكىل ادامزاتتىق ساۋدا جولى ەدى. بۇدان 550 جىل بۇرىن بۇكىل جەتىسۋ جەرى قازاق حاندىعىنىڭ التىن بەسىگى بولدى.
حح عاسىردا دا الماتى ەرەكشە ءرول اتقاردى. 1929 جىلى ول قازاقستان استاناسى بولدى. بىرتىندەپ ميلليون تۇرعىنى بار مەگاپوليسكە اينالدى. الماتى ەگەمەن, تاۋەلسىز قازاقستاننىڭ العاشقى استاناسى مارتەبەسىنە يە بولدى. سول سەبەپتى دە قالانىڭ 1000 جىلدىعىن ەل بولىپ وتانىمىز تاۋەلسىزدىگىنىڭ 25 جىلدىق مەرەيتويىمەن قاتار تويلاپ جاتقانىمىز سيمۆولدىق ءمانى بار نارسە», دەدى نۇرسۇلتان نازارباەۆ.
«الماتى ارەنا» ورتالىق ازيادا تەڭدەسى جوق كەشەن, ول جالپى الەم بويىنشا تەحنيكالىق تۇرعىدان ۇزدىك جابدىقتالعان ايدىندار قاتارىندا. كەشەن ءۇش بلوكتان تۇرادى: مۇز ايدىنى, جاتتىعۋ ايدىنى جانە ءجۇزۋ باسسەينى. مۇز ايدىنى 12 مىڭ ورىنعا ەسەپتەلگەن, مۇندا قىسقى ۋنيۆەرسيادانىڭ اشىلۋ جانە جابىلۋ سالتاناتى, سونداي-اق شورت-ترەك كونكيمەن جۇگىرۋ, مانەرلەپ سىرعاناۋ جانە حوككەي جارىستارى وتەدى.
بۇگىن ەلباسى اتلەتيكالىق اۋىل اتتى وبەكتىنى دە ارالاپ كوردى. ول 5 مىڭ سپورتشى مەن دەلەگاتسيا مۇشەلەرىنىڭ تۇرۋىنا لايىقتالعان تۇرعىن ءۇي كەشەنىنەن تۇرادى.
الماتى اكىمى باۋىرجان بايبەك ەلباسىعا ۋنيۆەرسيادا وتكەننەن كەيىن وعان ارناپ سالعان كەشەندەردىڭ قالاي پايدا اساتىنى تۋرالى ايتتى. ماسەلەن, ويىنداردان سوڭ «الماتى ارەنا» سپورت مەكتەپتەرىنىڭ, كاسىبي جانە اۋەسقوي كوماندالاردىڭ جاتتىعاتىن ورنىنا اينالادى. سونىمەن قاتار ول ادامدار سىرعاناق تەبەتىن ايدىن رەتىندە دە پايدالانىلادى. ويتكنى, كەشەن باستاپقىدا دەنە شىنىقتىرۋمەن اينالىسىپ, سالاماتتى ءومىر سالتىن ۇستانعىسى كەلەتىن ادامدار ءۇشىن سالىنعان.
28-ءشى دۇنيەجۇزىلىك قىسقى ۋنيۆەرسيادا الماتى قالاسىندا 2017 جىلدىڭ 28 قاڭتارى مەن 8 اقپانى ارالىعىندا وتەدى. ستۋدەنتتەر ويىنىندا 55 مەملەكەتتەن 2 مىڭعا جۋىق سپورتشى قاتىسادى دەپ كۇتىلۋدە.
ۋنيۆەرسيادا – حالىقارالىق ۋنيۆەرسيتەتتىك سپورت فەدەراتسياسىنىڭ (FISU) ۇيىمداستىرۋىمەن ستۋدەنتتەر اراسىندا وتەتىن حالىقارالىق جارىس. وليمپيادا ويىندارىنان ءبىر ەرەكشەلىگى – جازعى جانە قىسقى ۋنيۆەرسيادا ەكى جىل سايىن وتكىزىلەدى.
ۋنيۆەرسيادا-2017 قىسقى باعدارلاماسىنا 13 سپورت ءتۇرى ەندى: بياتلون, تاۋ شاڭعى سپورتى, كەرلينگ, كونكي تەبۋ سپورتى, شاڭعى قوسسايىسى, شاڭعى جارىسى, ترامپليننەن شاڭعىمەن سەكىرۋ جانە سنوۋبورد. سونىمەن قاتار, قازاقستان رەسپۋبليكاسىنىڭ ءوتىنىشى بويىنشا, قابىلداۋشى ەل رەتىندە, دوپتى حوككەيدەن جارىستار ەنگىزىلگەن بولاتىن.
ەگەمەن-اقپارات
