بۇگىن الماتىدا قالانىڭ 1000 جىلدىق مەرەيتويىنا ارنالعان سالتاناتتى شارالار باستالدى دەپ حابارلايدى ەگەمەن-اقپارات. وسىدان از ۋاقىت بۇرىن شاھارداعى ءبىرىنشى پرەزيدەنت باعىندا الماfest-2016 اتتى الما فەستيۆالى اشىلدى. وعان قالا اكىمى باۋىرجان بايبەك تە قاتىستى. بايبەكتىڭ ايتۋىنشا, الماfest-2016 فەستيۆالى جىل سايىن جاقسى تانىلا تۇسۋدە, وسىلايشا ول قالانىڭ برەندىنە اينالىپ كەلەدى. بۇل فەستيۆال الماتىنىڭ الما وتانى رەتىندەگى اتاعىن قايتادان شىعاراتىن بولادى دەيدى قالا باسشىسى. اكىم 150 توننا الما قويىلعان جارمەڭكەنى ارالادى. بيىل جارمەڭكەگە 33 شارۋا قوجالىعى بۇرىن-سوڭدى بولماعان دارەجەدە كوپ الما تۇرلەرىن الىپ كەلدى. ءتىلشىمىزدىڭ حابارىنا قاراعاندا, تۇرعىندار بۇگىن المانى بازارداعى باعادان ءبىرشاما تومەن باعامەن ساتىپ الىپ جاتىر
الماfest-2016 2010 جىلدان بەرى وتكىزىلىپ كەلەدى. بۇل الماتىنىڭ قالا كۇنىندە بولاتىن ۇلكەن مادەني جانە ويىن-ساۋىق شاراسى. ءبىرىنشى پرەزيدەنت باعىندا فەستيۆال كەزىندە Alma Art, Alma Family, Alma Master, Alma Auen, Alma Bazar سياقتى بىرنەشە الاڭقايلار اشىلادى. وندا كونتسەرتتەر, كورمەلەر, جارمەڭكەلەر بولادى. ال Alma Drive اتتى الاڭدا ۇلتتىق سپورت سايىستارى وتەدى. Alma Bazar – فەستيۆالدىڭ باستى الاڭقايى. مۇنداعى كورمەگە المانىڭ جاڭا ءارى ءدامدى سۇرىپتارى قويىلىپ, كەلۋشىلەردىڭ ءدام تاتۋى ءۇشىن ۇسىنىلادى.
بۇگىن قالانىڭ ءار جەرىندە ءتۇرلى شارالار وتەدى. كەشكىسىن قالا تۇرعىندارى ءۇشىن Apple Fire وتشاشۋ مەرەكەلىك شوۋى كورسەتىلەدى. ساليۋتتەر قالانىڭ ءۇش نۇكتەسىندە – ساعات 21.00-دە كوكتوبەدە, "استانا" الاڭىندا جانە "الماتى ارەنا" مۇز ايدىنىندا اتىلادى. مەرەكەلىك ءىس شارالاردىڭ قاي جەردە وتەتىنىن تومەندەگى افيشادان كورۋگە بولادى.
