عاسىرلاردان سىر شەرتكەن اتىراۋ (فوتو)

ەلورداداعى بەيبىتشىلىك جانە كەلىسىم سارايىندا اتىراۋ وبلىسىنىڭ ەلورداداعى كۇندەرى اياسىندا «عاسىرلاردان سىر شەرتكەن اتىراۋ» دەگەن تاقىرىپپەن اتىراۋ وبلىستىق تاريحي-ولكەتانۋ مۋزەيى كورمە ۇيىمداستىردى. اتالعان كورمەگە ورتا عاسىرلىق سارايشىق قالاشىعىنان تابىلعان ارحەولوگيالىق بۇيىمدار, تاريحي تۇلعالاردىڭ مۇراعاتتىق قۇجاتتارى مەن جەكە زاتتاي جادىگەرلەرى شىعارىلادى. ەتنوگرافيالىق تۇرمىستىق بۇيىمدار, قولونەر شەبەرلەرىنىڭ تۋىندىلارى, اعاش ىدىستار, زەرگەرلىك اشەكەي بۇيىمدارى جۇرتشىلىق نازارىنا ۇسىنىلدى. ارحەولوگيالىق بۇيىمداردىڭ اراسىندا اسىرەسە كۇمىستەن جاسالعان اشەكەيلەر مەن بەلبەۋلەر, ەتنوگرافيالىق تۇرمىستىق بۇيىمدار ەرەكشە كوزگە ءتۇستى. اتىراۋ قازاق تاريحىنا, مادەنيەتى مەن ادەبيەتىنە وشپەستەي ءىز قالدىرعان, مۇرالارى جۇزجىلدىقتارمەن ولشەنەتىن, ەڭبەكتەرى ەل ەسىندە ماڭگى قالعان تاريحي تۇلعالاردى شىعارعان قاسيەتتى مەكەن. كورمە بارىسىندا ەدىل-جايىق پەرزەنتى, مىسىر ەلىن 17 جىل بيلەگەن داڭقتى بەيبارىس سۇلتاننان باستاپ كىشى ءجۇزدىڭ حانى ءابىلحايىر, ىشكى وردانىڭ نەگىزىن قالاۋشى بوكەي حان, بوكەي ورداسىنىڭ سوڭعى بيلەۋشىسى جاڭگىر حان جايىندا مالىمەتتەر العا تارتىلدى. سونداي-اق, ماحامبەت وتەمىس ۇلى, يساتاي تايمان ۇلى, سىرىم دات ۇلى سىندى جاۋجۇرەك باتىرلار مەن قۇرمانعازى ساعىرباي ۇلى, دينا نۇرپەيىسوۆا سياقتى ءيسى قازاققا ءماشھۇر كۇيشىلەر جايلى مالىمەتتەر, ودان بەرىرەك حح عاسىر تاريح ساحناسىنا شىعارعان اقىن-جازۋشىلار مەن عالىمدار, كۇيشىلەر مەن ارتىستەر جايلى مالىمەتتەر دە كورمەدەن ورىن الدى. ولاردىڭ اراسىندا ءابۋ سارسەنباەۆ, حاميت ەرعاليەۆ, تاۋمان اماندوسوۆ, زەينوللا قابدولوۆ, جۇمەكەن ناجىمەدەنوۆ, ءابىش كەكىلباەۆ, فاريزا وڭعارسىنوۆا, نۇرماحان ءجانتورين, قارشىعا احمەدياروۆتاي تۇلعالار بار. كورمە سوڭى اتىراۋ وبلىسىنىڭ ونەر شەبەرلەرى قاتىسقان گالا-كونتسەرتپەن قورىتىندىلاندى. ايگۇل سەيىلوۆا فوتو: ورىنباي بالمۇرات