شىنى وڭدەۋدىڭ شەبەرلەرى

كۇندەلىكتى قىم-قۋىت تىرلىكتە اسا بايقالا بەرمەسە دە, تاپشىلىعىن تۇرمىس كوتەرە المايتىن, دەرەۋ ورنى ءبىلىنىپ قالاتىن زاتتار بولادى. سونىڭ ءبىرى – كادىمگى اينا, شىنى. ايناسىز بۇگىندە اينالانى ەلەستەتۋ قيىن بولار. شىنىندا دا سولاي. ءۇيدىڭ تەرەزەسىنەن باستاپ, شىنىنىڭ پايدالانىلمايتىن جەرى كەمدە-كەم. ءتىپتى, قازىر قۇرىلىستا دا شىنىنىڭ ورنى وزەكتى بولىپ تۇر. قوستاناي قالاسىنداعى «ستەكلوتسەنتر-2008» جاۋاپكەرشىلىگى شەكتەۋلى سەرىكتەستىگى ون بەس جىلدان بەرى تۇتىنۋشىلار قاجەتىن تابۋعا كومەكتەسىپ, كوڭىلدەن شىعىپ كەلەدى. جىل سايىن ولاردىڭ كورسەتەر قىزمەت تۇرلەرى دە, تاۋاردىڭ ءار الۋاندىعى دا كوبەيە تۇسكەن. كومپانيا تۇتىنۋشىعا شىنى تۇرلەرى مەن ونى وڭدەپ, فورماعا كەلتىرىپ بەرۋدىڭ ءتۇر-ءتۇرىن ۇسىنادى. اينانىڭ نەشە ءتۇرى, ونىڭ اينالاسىن ارلەندىرۋ, جازۋ, ويۋلاۋ سەكىلدى تۇرمىسقا ءساندى بۇيىمنىڭ بارلىعى «ستەكلوتسەنتر-2008» كاسىپورنىنىڭ قوستانايداعى تسەحىنان شىعىپ جاتىر. ونىڭ دۇكەنىنەن تۇتىنۋشى تەك اينا عانا ەمەس, تۇرمىستا قولدانىلاتىن شىنىدان جاسالعان تالاي بۇيىمدى تابادى, تاڭدايدى. ۇستەل, ورىندىق, اس ءۇيدىڭ قابىرعاسىن ارلەيتىن «الجاپقىش», ساعات دەيسىز بە, شىنىدان جاسالىپ سىڭعىرلاپ تۇرعان تالاي دۇنيەگە تاپ بولاسىز. مۇنىڭ بارلىعىن جاساۋ كاسىپورىن ماماندارى مەن باسشىلارىنا يتاليادان الدىرىلعان قىمبات جابدىقتىڭ ارقاسىندا مۇمكىن بولدى. كومپيۋتەرلەندىرىلگەن ستانوك بەلگىلەنگەن باعدارلامامەن اينەكتىڭ نەمەسە اينانىڭ بەتىنە تىرناق ىزىندەي ارتىق سىزاتسىز قالاعان سۋرەتتى, ويۋدى سالىپ, جازۋدى شىتىناتپاي جازىپ بەرەدى. سونداي-اق, وسى ستانوكتاردىڭ بىرىمەن ءمونوليتتى شىنىنى سىزاتسىز قالاعان كولەمدە, قالاعان فورمادا كەسەدى. ءوندىرىسى وزىق ەلدەردەن ۇيرەنگەندە عانا كاسىپتىڭ قادامى جۇرەتىنىن ىزدەنگەن كاسىپكەرلەر جاقسى ءبىلىپ قالعان. يتاليادان اكەلىنگەن شىنى كەسەتىن, ورنەكتەيتىن جابدىقتاردىڭ كەپىلدىگى بار. ەگەر باعدارلامانى وزگەرتۋ نەمەسە جاڭا ماتەريالدار كەرەك بولسا, كاسىپورىن ماماندارى يتاليالىق زاۋىتتىڭ ماسكەۋدەگى وكىلدىگىنە حابارلاسادى. – مىسالى, جىلىنا ەكى رەت ماسكەۋدەگى زاۋىت وكىلدىگىنە شىعىپ وتىرامىز. ويتكەنى, اينا مەن شىنىلاردى ورنەكتەگەندە ولاردىڭ استىنا قالىڭ اليۋميني تاقتا قويىلادى. ونىڭ ۇستىڭگى قاباتىن جارتى جىلدا ءبىر رەت وزگەرتىپ تۇرۋ كەرەك. وسىعان ماسكەۋلىكتەر كومەككە كەلەدى, – دەيدى «ستەكلوتسەنتر-2008» كاسىپورنىنىڭ مامانى پاۆەل اكسەنوۆ. تۇرمىس تا, قۇرىلىس تا شىنىسىز بولمايدى دەدىك. سوڭعى كەزدەرى تريپلەكس, ياعني «شىڭدالعان» شىنىعا نارىقتا سۇرانىس كوپ. ونىڭ ءمانىسى دە, ساپاسى دا قانشا بالتالاساڭ دا شىنىنىڭ جارىقشاقتارى ۇشپايتىندىعىندا, قاۋىپسىزدىگىندە. تسەح مامانى وسىنداي شىنىنىڭ ءبىر بولىگىن بالتالاپ كورسەتتى. مۇنداي شىنى ءتۇرىن اس ءۇيدىڭ قابىرعاسىن ارلەۋگە قولدانادى, سونىمەن قاتار اۆتوبۋستاردىڭ تەرەزەسىنە دە وسىنداي قاۋىپسىز شىنىلار سالىنادى. بۇل جاراقاتتىڭ بولۋىن ازايتۋعا ىقپال ەتەدى. قۇرىلىستا قازىر ءىرى عيماراتتاردىڭ ەسىك, تەرەزەسىن دە «شىڭدالعان» شىنىدان سالۋ تالاپ ەتىلەدى. ول كادىمگى شىنىنىڭ بىرنەشە بەتىن اراسىنا ارنايى پلەنكا سالىپ قاباتتاپ, ەكى ساعات جوعارى تەمپەراتۋرادا «ءپىسىرىپ» جاسالادى. مۇنداي ۇلكەن سۇرانىسقا يە تاۋاردى جاساۋ ءۇشىن «ستەكلوتسەنتر-2008» كاسىپورنىنا تاعى دا شەتەلدىك جەتىلدىرىلگەن ستانوك كەرەك. ونى كاسىپورىن باسشىلىعى «دامۋ-ءوندىرىس» باعدارلاماسى بويىنشا الۋعا قاجەتتى قۇجاتتار دايىنداۋ ۇستىندە. باعاسى 95 ميلليون تەڭگە تۇراتىن ستانوك قوستانايدا تريپلەكس شىنىسىن وندىرۋگە مۇمكىندىك جاسايتىن بولادى. جالپى, «ستەكلوتسەنتر-2008» جاۋاپ­كەرشىلىگى شەكتەۋلى سەرىكتەستىگى مەملەكەتتىك باعدارلامانىڭ ارقاسىندا تۇتى­نۋشى قاجەتىن وتەيتىن كاسىپورىن دارەجەسىنە كوتەرىلدى, نارىقتى بايىتتى. شاعىن جانە ورتا كاسىپكەرلىكتى قولداۋ جونىندەگى «دامۋ» قورىنىڭ باعدارلاماسى بويىنشا 49 ميلليون تەڭگەنى جىلىنا 6 پايىزدىق ۇستەمەمەن العان بولاتىن. سونىڭ ارقاسىندا اسەم بۇيىمدار ءوندىرىپ, تۇتىنۋشىلار كوڭىلىنەن شىعىپ, نارىقتا ءوزىن سەنىمدى سەزىنە ءبىلدى. ەندى ولار كاسىپورىندى كەڭەيتۋدى جوسپارلاپ وتىر. – مەملەكەتتىك باعدارلامانىڭ قولداۋى ءبىزدىڭ كاسىپورىننىڭ نارىققا كەلۋىنە تولىق مۇمكىندىك جاسادى. اتتەڭ, قازاقستاندا شىنى وندىرەتىن ءوندىرىس جوق.               ءبىز شىنىنى رەسەي مەن قىرعىزستاننان تاسيمىز. قىرعىزستاندا نەمىس ينۆەستورلارى شىنى زاۋىتىن سالعان, شىنىسىنىڭ ساپاسى جامان ەمەس. ءبىز ءوز شىنى زاۋىتىمىزدى سالۋدى ارماندايمىز, – دەيدى پاۆەل اكسەنوۆ. ءاۋ باستا جالعا العان كىشكەنتاي تسەحتا تەرەزە جەلدەتكىشىنە شىنى كەسۋمەن اينالىسقان دەربەس كاسىپورىن ءوزىنىڭ جەكە عيماراتى بولۋىن, ۇلكەن كاسىپورىنعا اينالۋدى ماقسات تۇتقان ەدى. مىنە, قازىر 150 ادامعا جۇمىس بەرىپ وتىرعان, استانا, كوكشەتاۋ, پەتروپاۆل قالالارىندا فيليالدارى بار ءىرى كاسىپورىنعا اينالدى. كاسىپورىننىڭ شىنى شىعارار ۋاقىتى دا كەلەر. ءنازيرا جارىمبەتوۆا, «ەگەمەن قازاقستان» قوستاناي