قىزعالداق قۇمدا دا قاۋىز جارادى

اراب مەملەكەتتەرى ليگاسى مەن بىرىككەن ايەلدەر ۇيىمى كاير قالاسىندا «اراب ايماعىندا بەيبىتشىلىك پەن قاۋىپسىزدىكتى قامتاماسىز ەتۋدەگى ايەلدەردىڭ ءرولى» اتتى تۇڭعىش كونفەرەنتسياسىن وتكىزدى. بۇل شارا بۇۇ قاۋىپسىزدىك كەڭەسىنىڭ 1325 قارارىنا سايكەس, ايماقتىق ستراتەگيانى ءوزارا بىرلەسە جۇزەگە اسىرۋعا باعىتتالدى. قارار شيەلەنىستەردىڭ الدىن الىپ, ونى شەشۋدەگى, بەيبىت كەلىسىمدەرگە كەلۋدەگى ايەلدەردىڭ ماڭىزدى ءرولىن بەكىتىپ, ولاردىڭ بەيبىتشىلىك پەن قاۋىپسىزدىكتى نىعايتۋدا تەڭدەي دارەجەدە بەلسەندى قاتىسۋىنا ءمان بەرەدى. القالى جيىنعا ايەلدەر ماسەلەسىمەن اينالىساتىن اراب مەملەكەتتەرى ليگاسىنىڭ باس حاتشىسى احمەد ابۋل گەيت, ەگيپەتتەگى ايەلدەر جونىندەگى ۇلتتىق كەڭەستىڭ پرەزيدەنتى مايا مورسي, يوردانيا الەۋمەتتىك دامۋ ءمينيسترى كحۆال يبراگيم ارموۋتي سەكىلدى بىرنەشە اراب مينيسترلەرى مەن ىقپالدى وكىلدەرى قاتىستى. 22 اراب ەلدەرى مينيسترلەرىنىڭ ىشىندە باس بايانداماشى رەتىندە شاقىرىلىپ, بەيبىتشىلىك ءۇشىن ءومىر ءسۇرىپ, جۇمىس ىستەۋگە دايىن 3,6 ملرد ايەلدىڭ انالىق جۇرەگىنىڭ تىلەگىن وزگە اي­ماق­تان كەلىپ قاتىسقان بەيبىتشىلىك جولىنداعى حالىق­ارالىق ايەلدەر توبىنىڭ ءتورايىمى (IWPG) كيم نام حي حانىم جەتكىزدى. ول الەمدەگى ىنتى­ماق­تاستىقتىڭ وركەندەۋىنە كۇش سالىپ جۇرگەن ايەلدەر قاۋىمىنىڭ بەيبىتشىلىك ورناتۋدا دا جەتەكشى ءرول اتقارۋىن باسا ايتتى. دۇنيەجۇزىلىك دامۋدا ءدال ءبىلىم سەكىلدى ءىل­گەرى جىلجىتاتىن كۇش كەمدە-كەم. گەندەرلىك تە­پە-تەڭدىك بىلىمنەن باستاۋ الۋى ءتيىس, الەمدىك پىكىر­تالاستاردا ايەلدەردىڭ دە ءۇنى ەستىلۋى كەرەك. ايەلدەردىڭ قاتىسۋىمەن وتكەن بەيبىتشىلىك كەلى­سىمدەرى, گۋمانيتارلىق قولداۋلار مەن ەكونوميكالىق دامۋدىڭ ۇزدىك ناتيجەلەرى ونىڭ وڭ سيپات تانىتا باستاعانىن كورسەتىپ وتىر. بىزدە ادام­زاتتى بەيبىتشىلىككە باستايتىن قۋاتتى كۇش بار. سول ارقىلى بەيبىتشىلىك ورناتىپ, ونى بالا­لارىمىزعا سىيلايىق, دەدى كيم نام حي كونفەرەنتسيادا. حي حانىم كونفەرەنتسياعا قاتىسقان اراب ايەلدەرى ۇيىمىنىڭ باس ديرەكتورى مەرۆات تاللاۋي, اراب ەلدەرى ليگاسىنىڭ ايەلدەر, بالالار مەن وتباسى ءىسى جونىندەگى دەپارتامەنتتىڭ ديرەكتورى ينايا مەكاۆي, پالەستينانىڭ ايەلدەر ءىسى جونىندەگى ءمينيسترى حايف ءال-اگا سەكىلدى جوعارى دارەجەلى رەسمي وكىلدەرمەن كەزدەسۋ وتكىزىپ, اراب ايماعىنداعى ايەلدەردىڭ مۇمكىندىگىن كەڭەيتۋ تۋرالى ماسەلەلەردى تالقىلادى. كونفەرەنتسيادان كەيىن كيم نام حي اراب ايەلدەرىنىڭ جاڭا بەتبۇرىسقا بەيىمدىلىگىن كورىپ قۋاتتانعانىن, ال مۇنىڭ بەيبىتشىلىك جولىنداعى حالىقارالىق ايەلدەر توبى (IWPG) قۇرعان الەمدىك جەلىلەرمەن ءوزارا ارەكەتتەستىكتە التىن كو­پىر بولا الاتىنىن ايتتى. باسقوسۋدا ۇسى­نىل­عانداي, بۇل ەگيپەتتەن بولىمشە قۇرۋعا نەگىز بولا الادى. ايتا كەتۋ كەرەك, IWPG بەيبىتشىلىككە جەتۋ جولىندا ايەلدەردىڭ جاسىنا, ناسىلىنە قاراماستان بىرىككەن, الەمدەگى بارلىق ايەلدەرمەن جۇمىس ىستەيتىن ۇكىمەتتىك ەمەس ۇيىم بولىپ سانالدى. ءتۇيىنىن ايتقاندا, اراب الەمىندە دە ايەلدەردىڭ بەيبىتشىلىك ءۇشىن قىزمەتى باستالدى. ايگۇل احانبايقىزى, «ەگەمەن قازاقستان» الماتى