الداعى ماقسات – اق وليمپيادا

الماتىدا 2017 جىلى وتەتىن 28-ءشى قىسقى ۋنيۆەرسياداعا دايىندىق اياقتالىپ كەلەدى. وسىعان وراي گازەت  ءتىلشىسى ۋنيۆەرسياداعا دايىندىق جانە ونى وتكىزۋ جونىندەگى ديرەكتسيانىڭ جەتەكشىسى نايل نۇروۆپەن اڭگىمەلەسكەن ەدى. – نايل فاريد ۇلى, ۇيىم­داس­تىرۋ كوميتەتىندە ۋنيۆەر­سيادا­نىڭ تۇمارى مەن مەدالدار لوگوتيپىن بەكىتتىرىپ الدى­ڭىز­دار. قانداي ۋايىمى­ڭىز بار؟ – مەن اڭگىمەنى ۋايىمدامايتىن ماسەلەلەردەن باستايىن: ەڭ الدىمەن, قۇرىلىسشىلارىمىزدىڭ ۋنيۆەرسياداعا ارناپ عاجايىپ سپورت عيماراتتار تۇرعىزعانىن اتاپ وتكىم كەلەدى. اسا ماڭىزدى سپورت­تىق ءۇش نىسان 95 پايىز دا­يىن. ولاردىڭ ىشىندە 12 مىڭ ورىن­دىق امبەباپ «الماتى-ارەنا», 3 مىڭ ورىندىق «حالىق-ارە­نا» جانە الماتىدا تۇڭعىش رەت بوي كوتەرگەن وليمپيادا قالا­شى­عى بار. ال ەندى مەن نە ءۇشىن ۋايىم جەيدى دەڭىز؟ ۋني­ۆەرسيا­داعا قىزمەت كورسەتۋ شارتتارى بويىنشا سپورت ويىندارى ءمۇم­كىن­دىگىنشە ايقىن ءارى تازا ءوتۋى ءتيىس, ساتىپ الىنعان قۇرىلعىلار مەن بۇيىمداردىڭ, – ولاردىڭ شا­ماسى 1000 لوتتان اسادى, – بار­لى­عى دا ۋنيۆەرسيادانىڭ پور­تالىندا جۇكتەۋلى تۇر. بۇگىن ءبىز­دىڭ الدىمىزعا پايدالاناتىن ونىمدەردىڭ 60 پايىزدان اس­تامى وتان­دىق بولۋى كەرەكتىگى ءمىن­دەت­تەلگەن. ولاردىڭ بارلىعى باي­قاۋ قورىتىندىسى بويىنشا انىق­تالادى. سول بايقاۋدا ەڭ ۇزدىك­تەر جەڭىمپاز اتانسا ەكەن, بۇل باسەكەدە ەلىمىزدە سپورتتىق قۇرال-ساي­ماندار جاسايتىن جانە قىزمەت كور­سەتەتىن وزىق كومپانيالاردىڭ جولى بولسا ەكەن دەيمىن. بۇل – ءبىر. ەكىن­شىدەن, الاتاۋدىڭ ەتەگىنە قار جىل­داعىدان قالىڭ تۇسسە ەكەن دەپ تە ارمانداپ وتىرمىن. – بۇقارالىق اقپارات قۇرال­دارىنا بەرگەن ءبىر سۇحباتىڭىزدا ۋنيۆەرسيادا-2017 الەمدىك سپورت جارىستارىنىڭ ىشىندەگى ەڭ ءتيىمدى جولىن, باعىتىن, باع­دارلاماسىن ويلاستىرعان سپورت ويىندارى بولىپ وتىر دەدىڭىز... – قالا اكىمى باۋىرجان بايبەك بىزبەن ءار كەزدەسۋىندە ستۋ­دەنت­تىك سپورت ويىندارىنىڭ ءمۇم­كىن­دىگىنشە تيىمدىلىگى جاعىنا باسىم­دىق بەرۋ كەرەكتىگىن ۇنەمى ەسكەر­تەدى. ءبىز بۇل ويىندار نەعۇر­لىم قىمباتقا تۇسسە, سوعۇرلىم ءۇز­دىك وتەدى دەگەن ويدان اۋلاقپىز. الىس-جاقىننان كەلگەن سپورتشىلار مەن تۋريست قوناقتاردى شىعىستىڭ ەرتەگىسىنە ءتان استا-توك تويمەن دۋمانداتىپ قارسى الۋ­دى نەمەسە شاشىلىپ-توگىلىپ, بارى­مىزدى كورسەتۋدى ماقسات ەت­پەيمىز. قالانى ءتۇرلى-ءتۇستى جار­نا­ماعا بوياپ, قىمبات قاتىناس كولىك­­تەرىن زاۋلاتىپ جۇرگىزىپ قويۋ دا ويىمىزدا جوق. ءبىز قوناق­تارى­­مىزدى مۇمكىندىگىنشە قىسقى سپورت ويىندارىنىڭ ۇيىمداستىرۋ شارالارىنىڭ كوڭىل كونشىتەتىندەي عۇرىپتارىمەن تاڭداندىرۋعا ۇم­تى­­لامىز. وتكەن ازيا ويىن­دارىن­داعىداي ەمەس, بۇل جولى قاتى­ناس كولىكتەرى جالعا الىنادى. بيۋدجەت ۇنەمدەيمىز. تەك قانا تەستىلىك جارىستان جارتى ميلليارد تەڭگە ۇنەمدەي الاتىنىمىز تۋرالى دا ايتقىم كەلەدى. كونكيمەن جۇگىرۋ مەن ترامپليننەن سەكىرۋدە, حوككەي ويىنى مەن سالتاناتتى قابىلداۋلار سانىن شەكتەۋدە, شەتەلدەرگە جارناما شىعارۋدا ىلكىمدىلىك تانىتتىق. ماسەلەن, ازيا ويىندارىندا مادەني شارالارعا مەيلىنشە قوماق­تى قاراجات بولىنگەن, ءبىز بۇل جوبا­لاردان دا ۇنەم جاسادىق. ۋنيۆەر­سيادا الاۋى ەستافەتاسىن الىپ ءجۇرۋ ءىس-شارالارىن دا قاي­تا قارادىق. مۇنىڭ ءبارى جاپ­پاي قىس­قارتۋ جاسالدى دەگەن ءسوز ەمەس, كەرى­سىنشە, قارجىنىڭ ءبارى دە ءوز ورنى­مەن, مازمۇنىمەن جۇم­­سا­لاتى­­نىن كورسەتەدى. بىراق, شارا­لار­­دىڭ تيىمدىلىك جاعىنا ەرەكشە كوڭىل ءبولىن­دى. كوپتەگەن دەكورا­تسيا­لىق قويى­لىمدار مەن ايرىقشا پافوس­تىق شەكپەن-شەرۋلەر دە جوبادان سىزىلىپ تاستالدى. – ۋنيۆەرسيادانىڭ ديرەكتورىنا, سپورتشىعا جانە قازاقستاننىڭ قاتارداعى ازاماتىنا ساۋال: «ۋنيۆەرسيادا-2017» بىزگە – قازاقستانعا نە بەرەدى؟ – الدىمەن ازامات رەتىندە ايتارىم: ۋنيۆەرسيادا سپورت الەمىندە جاڭا ەسىمدەردى شىعارۋى ءتيىس. بارشاعا ءمالىم ءبىر جايت بار: جاس جەتكىنشەك سەرىك ساپيەۆكە ۇقساعىسى كەلەدى, مەسسيدى ءپىر سانايدى. سولاي ەمەس پە؟! سپورت – جاس ۇرپاق ءۇشىن بىردەن-ءبىر تاربيە مەكتەبى. ەكىنشىدەن, ەلىمىز ۋني­ۆەرسيادا ارقىلى عاجايىپ سپورت­تىق قۇرىلىس نىساندارىن يەلەندى. ءوزىمىزدىڭ تانىمال سپورت كەشەندەرىمىزدى دە كۇرد­ەلى جوندەۋدەن وتكىزىپ الامىز. ماسەلەن, بيىك تاۋداعى «مەدەۋ سپورت كەشەنىنىڭ» تۇرعىزىل­عانىنا قانشا جىل ءوتتى؟ شىم­بۇلاق سپورت كۋرورتى مەن «الا­تاۋ» بياتلون كەشەنى جەدەل جوندەۋ جۇمىستارىنا ءزارۋ ەدى. «تاباعان» ۇمىتىلا باستاعان. ۋنيۆەرسيادانىڭ ارقاسىندا ولاردىڭ بارلىعىنىڭ قايتادان ءوڭى كىرىپ, ارلەنە باستادى. ۇشىنشىدەن, ءبىز ارمان قاناتىنداعى جاس مەم­لەكەتپىز. ۋنيۆەرسيادانىڭ بۇل ساتىسى وليمپيادالىق ويىندارعا باستاپ الىپ كەلە جاتىر. ءبىرىنشى باسپالداقتا ءبىز ازيادا وتكىزدىك, ەكىنشىدە ۋنيۆەرسيادا وتكەلى تۇر, ءۇشىن­شىدە... مۇمكىن تاعى ءبىر قىس­قى ازيا ويىندارى نەمەسە جابىق عي­ماراتتار تالابى بويىنشا سپورت تۇرىنەن جارىس شىعىپ قالار... قالاي دەگەندە دە, ءتۇپتىڭ ءتۇبىن­دە قازاقستانعا وليمپياداعا جول اشىلادى. مىنە, مەن سوعان سەنەمىن. اڭگىمەلەسكەن تالعات ءسۇيىنباي, «ەگەمەن قازاقستان»  الماتى سۋرەتتى تۇسىرگەن نۇرمانبەت قيزاتوۆ