بالالار باعدارشاممەن دوستاستى

جۋىردا جامبىل وبلىستىق قا­زاق دراما تەاترىندا جازۋشى كو­سەم­الى ءساتتىباي ۇلىنىڭ «ەلگەزەك باع­دارشام, توق-قۋات جانە باسقا­لار» دەپ اتا­لا­تىن ەرتەگى-حيكايا­تى­نىڭ جەلىسى بوي­ىن­شا ءبۇل­دىرشىن­دەر­گە ارنالعان جاڭا قويى­لىمىنىڭ پرەمەراسى بولىپ ءوتتى. شىعارما بويىنداعى كوركەمدىك ساحنادا ارتىستەر شەبەرلىگىمەن استا­سىپ, قويىلىم تۇساۋكەسەرى ءساتتى شىق­تى. بالا قيالىن نازىك سەزىممەن شەبەر جىمداستىرا بىلگەن اۆتوردىڭ ويىن قويۋشى-رەجيسسەر انار سا­عىم­بەكوۆا ساحناعا شاشاۋ شىعار­ماي الىپ شىق­قان بولسا, قويۋشى-سۋرەتشى راحات ساپاراليەۆا ساحنانى بوياۋى قانىق سۋرەتتەرمەن اسەم بەزەندىرگەن ەكەن. ءرول­دەردى سومداعان ارتىستەردىڭ كوستيۋمدەرى مەن ساحنا دەكوراتسياسى ءوزارا ءۇي­لە­سىپ, بالعىن كورەرمەندەردى باۋراي ءتۇستى. سونىمەن, ماكىش اجەيدىڭ نەمەرەسىن جول قيىلىسىندا كولىك قاعىپ كەتىپ, اۋرۋحاناعا ءتۇسىپ قالعان سوڭ, تولەن شال باسشىلارعا قايتا-قايتا بارىپ ءجۇرىپ, كوشەگە باعدارشام ور­ناتتىرادى. بۇرىن زاۋىت جۇمىسشى­لا­رىنىڭ قولىنان شىعىپ, قوراپ ىشىندە جاتقان باعدارشام كەڭ كو­شەگە كەلگەندە «ەسىن» بىردەن جيناي العان جوق بولاتىن. دەگەنمەن اق­ىلدى توق-قۋات كەلىپ, كەڭەس بەرگەن كەزدەن باستاپ ول اينالاسىن «تاني» باستايدى. كوشەدەگى ءتۇرلى ادامدار مەن جان-جانۋارلاردى كورىپ, نەنىڭ جاقسى, نەنىڭ جامان ەكەنىن تۇسىنگەن ەلگەزەك باعدارشام ما­ماقاز جانە ونىڭ قازمويىن, اققانات, اقمامىق سياقتى بالاپاندارمەن تا­نى­سادى. اۋسار-الماستىڭ بۇزاقى­لى­عى­نان جا­نى تۇرشىگە شوشىسا, ءتىل تا­بىسىپ كەتكەن جاڭا دوستارىنىڭ قىل­ىق­­تا­رىنا سۇيسىنەدى. ساحناداعى وقيعا اۋسار الماستىڭ ەلگەزەك باعدار­شام­نىڭ «كوزىن» تاسپەن اتىپ, سىندى­رۋى­مەن شيەلەنىسە تۇسەدى. جەتكىنشەكتەر قىزىعا تاماشا­لاعان قويىلىمدا جاس اكتەرلەر عا­زيز سۇ­راپ­پا­ەۆ (ەلگەزەك باعدارشام), جاس­ۇلان قام­با­تىروۆ (توق-قۋات), شا­پا­عات ەر­عا­زيەۆا (ماماقاز), ماق­پال قۇدايبەر­گە­نوۆا (اق­قانات), گۇل­دەراي الىمقۇلوۆا (اقمامىق), جۇل­دىز ول­جاباەۆا (قاز­موي­ىن), جاندار قى­رىق­­باەۆ (تولەن شال), ەرسىن قا­لى­باەۆا (ماكىش اجە) جانە سۇلتان وما­روۆ (اۋسار-الماس) اتا-انالار مەن بال­عىن كورەرمەندەر كوڭىلىنەن شىقتى. قورىتا ايتقاندا, بالالارعا ار­نالعان «باعدارشام» سپەكتاكلى ءسا­بي­لەرگە باعىت-باعدار كورسەتۋمەن بىرگە بۇلدىرشىندەر جانىنا رۋحاني-مادە­ني تۇرعىدان ازىق تا بولدى. دەمەك, جا­زۋشىنىڭ جاقسىدان ۇيرەنۋ كەرەكتىگىن العا تارتا وتىرىپ, جاماننان جيرەندىرەتىن ەرتەگى-حيكاياتى قويىلىم رەتىندە دە ءساتتى شىقتى, دەمەكپىز. ارداق ۇسەيىنوۆا.  جامبىل وبلىسى.