قىرعىزدار وزىپ تۇر

قىرعىزستاننىڭ ىستىقكول وبلىسىندا ءوتىپ جاتقان كوشپەلىلەردىڭ دۇنيەجۇزىلىك II ويىندارى بۇرناعى كۇنگى سايىستارىنىڭ قورىتىندىسىندا الاڭ يەلەرى العا شىقتى. ولاردىڭ قورجىندارىندا قازىر 13 التىن, 12 كۇمىس جانە 13 قولا مەدال بار. ەكىنشى ورىنعا 10 التىن, 5 كۇمىس جانە 6 قولا مەدالمەن رەسەي قۇراماسى جايعاستى. ال 5 التىن, 6 كۇمىس جانە 7 قولا مەدالى بار قازاقستان سپورتشىلارى ءۇشىنشى بولىپ كەلەدى. بۇل كۇنگى جارىستار قىرچىنداعى ات بايگەسىنەن باستالدى. سپورت كەشەنىندە قىرعىز كورەشى مەن تۇرىكتىڭ ابا-گيۋرەشى وينالدى. «كوگىلدىر ىستىقكول» پانسيوناتىندا قىرعىزدىق وردو اتتى اسىق ويىنى, «اۆرورادا» توعىزقۇمالاقتىڭ قىرعىزشا نۇسقاسى – توگۋز-كورگوول مەن تۇرىكشە ءتۇرى – مانگالا شايقاستارى جالعاستى. قىرچىن شاتقالىندا وتكەن 80 شاقىرىمدىق الاماندا قىرعىزستاندىق جەنيش باتىركۋلوۆتىڭ اققۇلاسى كومبەگە ءبىرىنشى بولىپ كەلدى. كورەرمەندەر وسى جەردە كيىز ءۇيدى جىلدام جيناستىرۋدان قۇرالعان جارىستى دا قىزىعا تاماشالادى. وعان قىرعىزستاننىڭ بارلىق 7 وبلىسىنان 33 كوماندا قاتىستى. سول كۇنى جايلاۋدا قىرعىز تازىلارى – تايعانداردى جارىستىرۋ دا بولىپ ءوتتى. ساداق اتۋدان قىرعىزستاندىق ازامات اكۋنوۆ ءبىرىنشى ورىندى جەڭىپ الدى. ال چولپون-اتا يپپودرومىندا كوكپاردىڭ توپتىق ويىندارى اياقتالدى. وندا ا توبىنان قازاقستان قۇراماسى كوش باستادى. ۆ توبىندا قىرعىزستان كومانداسى ەشكىمدى شاق كەلتىرمەدى. ەندى وسى كوماندالار اراسىنداعى فينالدىق سايىس بۇگىن وتەدى. ءۇشىنشى ورىننىڭ تاعدىرى باشقۇرت جانە قىتايلىقتار اراسىنداعى ويىنمەن شەشىلەدى. مۇندا اسپاناستى ەلىنىڭ نامىسىن سوندا تۇراتىن قانداستارىمىز قورعاپ جۇرگەنىن دە ايتا كەتەيىك. قىرعىز كۇرەسى 7 سالماق دارەجەسى بويىنشا ءوتتى. الاڭ يەلەرى بارلىق ءبىرىنشى ورىندى وزدەرى جەڭىپ الدى. قازاقستان بالۋاندارى 3 كۇمىس, 1 قولا مەدالعا يە بولدى. اتاپ ايتقاندا, كۇمىس مەدالدى ايىلبەك ايتكالى (60 كگ), قۋانىش ىسقاقوۆ (66 كگ), سۇڭعات زاكارياەۆ (96 كگ), قولا مەدالدى وسپان داۋىلباي (55 كگ) اكەلدى. ويىندار بۇگىن ءوزىنىڭ مارەسىنە جەتەدى. دامير قوجامقۇل