گوتو ءتورت رەت ۇيلەنگەن ەكەن. ايەلدەرى جانە باۋىرلارى تۇگەل قايتىس بولعان. «قاشاندا شىدامدى, سابىرلى بولۋعا تىرىستىم, ۇزاق جاساۋىمنىڭ سىرى وسىندا. جانە ءوزىمدى كۇتىمگە الاتىن ادامداردىڭ بولاتىنىنا سەندىم. ونداي جاقىندارىم بار. بۇل دا جاسىمدى ۇزارتىپ جاتىر» دەيدى ول. ءبىر تاڭعالارلىعى, اقساقال شىلىمقور بولعان, قازىر دە تەمەكىنى كوپ تارتادى. جەكە كۋالىگىندە گوتونىڭ 1870 جىلعى 31 جەلتوقساندا تۋعانى كورسەتىلگەن. جەرگىلىكتى بيلىك وكىلدەرى قۇجاتتاعى دەرەكتەر راس دەيدى. دەرەكتەر رەسمي قۇجاتتار جانە گوتونىڭ ءوز ءسوزى نەگىزىندە جاسالىپتى. الايدا, يندونەزيادا جاڭا تۋىلعان ادامداردى تىركەپ قۇجات بەرۋ 1900 جىلى باستالدى. ال وعان دەيىن دۇنيەگە كەلگەندەردىڭ تۋعان جىل دەرەكتەرىندە قاتەلىكتەر كەتكەن كەزدەر بولعان. دەگەنمەن, جەرلەستەرى گوتونىڭ 145-كە كەلگەنىنە كۇماندانبايدى. جانە ونى ەرەكشە قۇرمەتتەيدى. گوتو تاۋەلسىزدىك مەيرامىنا بايلانىستى شارالارعا ارنايى شاقىرۋمەن كەلىپ, وتكەن زاماندار تۋرالى قىزىق اڭگىمەلەر ايتادى. مىسالى, جاپونيامەن سوعىس جانە گوللاند وتارشىلارى جايىندا باياندايدى. نەمەرەسى سيۋريانتو «اتام ەشقاشان كىرپياز بولعان ەمەس, ەشكىمنىڭ مازاسىن المايدى, بەرگەن تاماعىمىزدى جەپ, باردى قاناعات تۇتادى» دەيدى. تەك ولمەي تۇرعاندا قابىرىنە قوياتىن قۇلپىتاس ساتىپ الىپ قويۋدى ءوتىنىپتى. «بۇرىنعىداي قۋات جوق, قازىر ارەڭ ءجۇرىپ-تۇرام, ءومىر سۇرۋدەن شارشادىم دا. قۇلپىتاس دايىنداپ قويعىم كەلەتىنى سودان. مەن ولگەندە ءبارى تۇرعانىن قالايمىن. شىنىمدى ايتسام, ولگىم دە كەلەدى, بىراق ۋاقىتىم كەلگەن جوق» دەيدى. مباح گوتو بۇرىن شارۋا بولعان, بالىقشىلىقپەن اينالىسقان ادام ەكەن.
