كوپىر ورناپ, كوڭىل ورنىنا ءتۇستى

بۇل كۇندەرى جۇرت بۇرىنعىداي اكىمدىككە ءوز جەكە باسىنىڭ قا­مىن كۇيتتەيتىن شارۋالارىن ازايتىپ, ەل يگىلىگىنە جارايتىن ماسەلەلەرمەن كەلەتىن بولعان. «ەل­دە بولسا ەرىنگە تيەدى» دەگەندەي, ءبىردىڭ ەمەس, مىڭنىڭ شارۋا­سى قاشاندا جوعارى. قازى­عۇرت اۋدانى تۇربات اۋىل­دىق وكرۋگى اقساقالدارىنىڭ تۇربات اۋىلى مەن قىزىلديقان ەلدى مەكەندەرى ارالىعىن قوساتىن كوپىر سالۋ جونىندەگى باستاماسى تاۋەلسىزدىگىمىزدىڭ 25 جىلدىعى اياسىندا جۇزەگە اسىرىلدى. ەكى اۋىل اراسىنان تاستاقساي تاۋ وزەنى وتەدى. جازدىڭ كۇندەرى موماقان بولعانىمەن ەرتە كوكتەمدە جاۋىن-شاشىن جانە ەرىگەن قار سۋىنان اعىل-تەگىل بولىپ, دولى كۇيگە ءتۇ­سەتىن وزەن وتكەل بەرمەي, ەكى اۋىل تۇرعىندارىن ابىگەرگە سالاتىن. ەل اعا­لارى, كاسىپكەرلەر قارجى جيناپ, وتكەل جاساعانىمەن, كەي جىلدارى اشۋىنا مىنگەن دولى وزەن جاڭقاداي اعىزىپ كەتەر ەدى. ەندى ەكى اۋىل تۇرعىندارى تاۋ وزەنىنىڭ گۇرىلىن تىڭداپ, الاڭسىز ۇيىقتايتىن بولدى. جاقىندا تۇربات اۋىلى مەن قىزىلديقان ەلدى مەكەنىنىڭ اراسىنداعى كوپىر پايدالانۋعا بەرىلدى. ۇزىندىعى 66, ەنى 8 مەتر بولاتىن كوپىردى سالۋعا قار­جى وبلىستىق بيۋدجەتتەن ءبو­لىندى. ەكى اۋىلدى قوسقاندا ءۇش مى­ڭنان استام حالىق تۇرادى. وسى ۋاقىتقا دەيىن ەكى اۋىلدىڭ قولدان جاسالعان وتكەل ارقىلى امالداپ كەلگەنىن ايتتىق. وقىس وقيعا بولماسا دا اللا تاعالا «ساقتانساڭ – ساقتايمىن» دەگەندەي, ءتۇبى ءبىر وپىق جەگىزەرى حاق ەدى. ەندى تاۋەلسىزدىگىمىزدىڭ 25 جىل­دىعى قارساڭىندا پايدالانۋعا بەرىلگەن كوپىر جۇرەككە ۇيالاعان ۇرەيدى جەڭدى, ەل تىنىشتالدى. بۇ­رىنعى «شايتان كوپىردەن» اللا ساقتاسىنىن ايتىپ, امالداپ وتە­تىن اعايىن العىسىن ەڭ الدىمەن ەلباسىنا, تۇرعىنداردىڭ ءوتىنى­شىن ورىنداعان وبلىس, اۋدان اكىم­دى­گىنە ايتىپ جاتىر. باقتيار تايجان, «ەگەمەن قازاقستان» وڭتۇستىك قازاقستان وبلىسى