كەشە قىرعىزستاننىڭ ىستىقكول وبلىسىندا ءوتىپ جاتقان كوشپەلىلەردىڭ بۇكىلالەمدىك II ويىندارى ءتورتىنشى جارىس كۇنى سايىس قىزدىردى. وسى كۇنى قىرعىزدىڭ كۇروشى مەن تۇرىكتىڭ ابا گيۋرەشى ءوزىنىڭ جەڭىمپازدارى مەن جۇلدەگەرلەرىنىڭ ەسىمدەرىن انىقتادى. وسىمەن ءبىر مەزگىلدە ازەربايجاننىڭ گيۋلەشى مەن ءتۇرىكمەننىڭ گورەشىنىڭ بەلدەسۋلەرى دە باستالىپ كەتتى. بۇدان ءارى 80 شاقىرىمدىق قاشىقتىقتى قۇرايتىن الامان بايگەنىڭ دە قورىتىندىسى شىقتى.
ال توعىزقۇمالاقتىڭ قىرعىزشا نۇسقاسى – توگۋز-كورگوولۋ, تۇرىكشە نۇسقاسى – مانگالا جانە قىرعىزدىڭ اسىق ويىنى – وردا جارىستارى ءالى جالعاسىپ جاتىر. سونىمەن بىرگە, كوكپاردان جارتىلاي فينالدىق ويىندار دا وينالدى.
ەندى ساداق اتۋ (جاا اتۋ), ات ۇستىنەن نايزا اتۋ (دجيريتۋ), اۋدارىسپاق (ەر ەنيش) جانە يت جارىستىرۋ (تايگان جارىشۋ) سايىستارىنىڭ ىرىكتەۋ سىناقتارى باستالعالى تۇر.
جالپى, II ويىندارعا 62 ەلدىڭ مىڭعا تارتا سپورتشىسى قاتىسۋدا. ولار باعدارلاماعا ەنگەن 26 ءتۇرلى سايىس بويىنشا كۇش سىناسۋدا.
ازىرگە كوماندالىق ەسەپتە رەسەي كومانداسى ءبىرىنشى ورىندا كەلەدى. بۇل ەلدەن كەلگەن سايىسكەرلەر ويىندارعا ءۇش كوماندا بولىپ قاتىسۋدا. ال ەكىنشى ورىندا قازاقستان قۇراماسى تۇر. ءۇشىنشى ورىنعا گرۋزيا كومانداسى ورنالاسسا, تورتتىكتى الاڭ يەلەرى تۇيىقتاپ وتىر.
كوشپەلىلەردىڭ بۇكىلالەمدىك ويىندارىنىڭ كەلەسى ءۇشىنشى جارىسى 2018 جىلى تۇركيانىڭ ىستانبۇل قالاسىندا وتەتىن بولىپ بەلگىلەندى.
دامير قوجامقۇل
