قاتىسۋ شارتىنا قول قويدى

جاقىندا «استانا ەكسپو-2017» حالىقارالىق مامانداندىرىلعان كورمەسىنىڭ كوميسسارى ءراپىل جوشىباەۆتىڭ لاتۆيا رەسپۋبليكاسىنا ساپارى بولىپ ءوتتى. ساپار شەڭبەرىندە ونىڭ لاتۆيا كولىك ءمينيسترى ۋلديس اۋگۋليسپەن, لاتۆيا ساۋدا-ونەركاسىپ پالاتاسىنىڭ توراعاسى, ەلدىڭ ەكسپو-2017 كورمەسىنە قاتىسۋى ءۇشىن جاۋاپتى ۇلتتىق سەكتسيا كوميسسارى يانيس ەندزينشپەن, سونداي-اق, لاتۆيا ىسكەر توپتارىنىڭ جانە باق-تىڭ وكىلدەرىمەن كەزدەسۋلەرى بولدى. كەزدەسۋ بارىسىندا ر.جوشى­باەۆ پەن يا.ەندزينش ەكى ەل ارا­سىن­داعى ەكىجاقتى ءوزارا ءىس-قيمىل­دىڭ قازىرگى جاعدايى مەن پەرسپەك­تيۆالارىن, لاتۆيا ۇكىمەتى مەن جەرگىلىكتى كومپانيالاردىڭ ەكسپو-2017-گە «جاسىل» تەحنولوگيالار سالاسىندا قاتىسۋ شارتتارىن تالقىلادى. استاناداعى كورمەنىڭ تاقىرى­بىن ەسكەرە كەلە, يا.ەند­زينش لات­ۆيانىڭ 2020 جىلعا قاراي الەمدەگى ەڭ «جاسىل» ەل اتانۋعا ۇمتىلىپ وتىر­عانىن حابارلادى. لاتۆيادا جاڭعىر­تىلمالى ەنەرگيا كوزدەرىنىڭ ۇلەسى اقىرعى تۇتىنۋ ۇدەرىسىندە 37,1 پايىزدى قۇراپ, ەۋروپالىق وداقتا شۆەتسيادان كەيىنگى (52,1 پايىز) ەڭ جوعارى ەكىنشى ورىن بولىپ تابىلادى. لاتۆياعا ەو-نىڭ كليماتتىڭ وزگەرۋىمەن كۇرەس سالاسىنداعى ماقساتتارعا قول جەت­كىزۋ بويىنشا باعدارلاماسى شەڭ­بەرىندە 755 ملن ەۋرو بولىنگەن ەدى. لاتۆيا تاراپى ەلدىڭ گەو­گرا­فيالىق ورنالاسۋىنىڭ باسىم­دىعى مەن لاتۆيا كاسىپورىن­دارىنىڭ «جاسىل» ەنەرگەتيكا سالاسىنداعى پەرسپەكتيۆالى جوبالارىنىڭ ارتىقشىلىقتارىن اتاپ كورسەتەدى. وسىعان وراي لاتۆيا پاۆيلونى «كەزدەسۋ ورنى – لاتۆيا: ءبىزدىڭ تابيعاتىمىزداعى ەنەرگيا» دەپ اتالاتىن بولادى. ساۋدا-ونەركاسىپ پالاتاسى توراعاسىنىڭ سوزىنە قارا­عاندا, لاتۆيا كورمەلەردىڭ حالىق­ارالىق بيۋروسىنىڭ مۇشەسى بولىپ تابىلمايدى جانە ەكسپو كورمەلەرىنە بىرنەشە رەت قانا قاتىسقان. ال استاناداعى كورمە­گە قاتىسۋعا كەلىسىم بەرۋىن لات­ۆيانىڭ قازاقستانعا قاتىستى جوعا­رى قىزىعۋشىلىعى مەن ەرەكشە دوستىق قارىم-قاتىنا­سىن بىلدىرەدى. لاتۆيا قازاقستان پرەزيدەنتى نۇرسۇلتان نازار­باەۆتىڭ «جاسىل كوپىر» باستاماسىن ماقۇلداپ, وسى باع­دارلاما شەڭبەرىندە ارىپتەس­تىك حارتياسىنا قول قويعان العاشقى ەلدەردىڭ ءبىرى بولىپ تابىلادى. كەزدەسۋ قورىتىندىسى بويىنشا ر.جوشىباەۆ پەن يا.ەندزينش لاتۆيانىڭ ەكسپو-2017-گە قا­تىساتىنى تۋرالى شارتقا قول قويدى. «ەگەمەن-اقپارات»