شەتەل جۋرناليستەرى قازاقستان تۋرالى جازدى

«قازاقستان شەتەلدىك باق كوزىمەن» بايقاۋىن ۇيىم­داس­تىرۋ كوميتەتىنە كەلىپ تۇسكەن ماتەريالداردىڭ ساپاسى كوڭى­لى­مىزدەن شىقتى. جىل وتكەن سايىن كونكۋرسقا قاتىسۋعا نيەت جانە قىزىعۋشىلىق تانى­تۋ­شىلاردىڭ قاتارى ءوسىپ كەلەدى. ياعني, بۇل – ءوسۋ ديناميكاسى بار دەگەن ءسوز. وسىنداي بايقاۋلار ارقىلى الەم جۇرتشىلىعى قازاق حالقى, ونىڭ بولمىسى, ۇلتتىق قۇندىلىقتارى مەن ەرەكشەلىكتەرى, قازاقستاننىڭ ۇستانىپ وتىرعان ساياساتى تۋرالى تەرەڭىرەك بىلۋگە مۇمكىندىك الادى». كەشە سىرتقى ىستەر مينيسترلىگى مەن قازاقستان باس رەداكتورلار كلۋبى ۇيىم­داستىرعان «قازاقستان شەتەلدىك باق كوزىمەن» بايقاۋىنىڭ جەڭىمپازدارىن ماراپاتتاۋ ءراسىمى كەزىندە ەلىمىزدىڭ سىرتقى ىستەر ءمينيسترى ەرلان ىدىرىسوۆ وسىلاي دەدى. وسىمەن ءۇشىنشى مارتە ۇيىم­داستىرىلىپ وتىرعان بايقاۋعا دۇنيە ءجۇزىنىڭ 30-عا جۋىق ەلىنەن 60-قا تارتا ءوتى­نىم كەلىپ ءتۇسىپتى. بۇل جولى يور­دانيا, رەسەي, اقش, تۇركيا جانە فرانتسيا ەلدەرى جۋرناليس­تەرىنىڭ باعى جانىپ, بايقاۋ جەڭىم­پازدارى دەپ تانىلدى. ءما­سەلەن, قازىلار القاسى تمد ەلدەرىنىڭ اراسى­نان رەسەي ءجۋرناليسى ماري­نا نابات­نيكوۆانىڭ جازعان ما­قالا­سىن ۇزدىك دەپ باعالاپتى. «ارگۋمەنتى ي فاكتى» اپتا­لىق گازەتىنىڭ ءتىلشىسى «دامۋ ءۇشىن جا­رالعان. قازاقستانمەن ساۋدا-ەكو­نوميكالىق قارىم-قاتىناس قالاي دامىپ كەلەدى؟» تاقىرىبى بويىنشا جارىق كورگەن ماقالاسىندا ول قازاقستان مەن رەسەي اراسىنداعى ساۋدا-ەكونوميكالىق جانە مادەني ىقپالداستىق ماسەلەلەرىن جان-جاقتى تالداۋعا تىرىسقان ەكەن. سونداي-اق, فرانتسياداعى «HuffingtonPost.fr» ونلاين-باسىلىمىندا شىققان «ەكسپو-2017: بولاشاق ەنەرگيا قانداي بولادى؟» ماقالاسى ءۇشىن پاۋلين گاۆريلوۆ, ال اقش-تىڭ «Washington Times» گازەتىندە قازاقستاننىڭ «بولاشاق» باعدارلاماسى تۋرالى جاريالانعان ماتەريالى ءۇشىن دۋگلاس بارتون جەڭىمپازدار قاتارىن تولىقتىردى. بۇل جولى تاياۋ شىعىس جانە افريكا ەلدەرى ۇمىتكەرلەرىنىڭ اراسىنان يوردانيالىق جۋرناليست موحاممەد گازالدىڭ «The Jordan Times» باسىلىمىندا شىققان «يوردانيا مەن قازاقستاننىڭ الەمگە دەگەن كوزقاراسى ورتاق» تاقىرىبىنداعى ماقالاسى مەن ازيا ەلدەرى جۋرناليستەرىنىڭ اراسىنان تۇركيانىڭ بەلگىلى ءجۋرناليسى كۋرشاد زورلۋدىڭ «Yeni Cag» گازەتىندە جارىق كورگەن «ەۋرازيانىڭ كىلتى – قازاقستاننىڭ دامۋى مەن تۇراقتىلىعىندا» اتتى جازباسى قازىلاردىڭ جوعارى باعاسىن الدى. ماراپاتتاۋ ءراسىمىنىڭ سوڭىندا سىرتقى ىستەر ءمينيسترى ەرلان ىدىرىسوۆ اتالعان شارانى ۇيىمداستىرۋعا دەمەۋشىلىك تانىتىپ, قولداۋ كورسەتكەندەرى ءۇشىن «قازاقستان تەمىر جولى ۇك» اكتسيونەرلىك قوعامىنا, قازاق­ستاننىڭ ۇلتتىق وليمپيادالىق كوميتەتىنە, «Rixos President» جانە «Rixos Borovoe» قوناقۇيلەرىنە, «ارعىماق» كولىك كومپانياسىنا, سونىمەن قاتار, بايقاۋدىڭ حالىقارالىق سەرىكتەسى سانالاتىن «KLM گوللانديا كورولدىگى اۋەجەلىلەرى» ءىرى اۋە تاسىمالداۋشىسىنا العىسىن ءبىلدىردى.  

 لايلا ەدىلقىزى, «ەگەمەن قازاقستان»