ەلباسى اقپارات جانە كوممۋنيكاتسيالار ءمينيسترى داۋرەن اباەۆتى قابىلدادى

كەزدەسۋ بارىسىندا مەملەكەت باسشىسى ءتيىمدى اقپاراتتىق ساياسات جۇرگىزۋدىڭ, ەلدەگى مەديا كەڭىستىكتىڭ قاۋىپسىزدىگىن قامتاماسىز ەتۋدىڭ ماڭىزدىلىعىن اتاپ ءوتتى, دەپ حابيۋارلادى پرەزيدەنتتىڭ ءباسپاسوز قىزمەتى. – جاڭادان قۇرىلعان مينيسترلىكتىڭ ماڭىزى زور. بۇگىندە باستى مىندەتتەردىڭ ءبىرى – اقپارات كەڭىستىگىندەگى ءتۇرلى سىن-قاتەرلەرگە ءتيىمدى قارسى تۇرا ءبىلۋ. سونىمەن قاتار, حالىق اراسىندا ەكونوميكالىق ءوسىمدى جانە تۇرعىنداردىڭ ءال-اۋقاتىن ارتتىرۋدى قامتاماسىز ەتۋ باعىتىندا مەملەكەت قابىلداپ وتىرعان شارالار تۋرالى ءتۇسىندىرۋ جۇمىسىن ءتيىستى دەڭگەيدە جۇرگىزۋ قاجەت, – دەدى قازاقستان پرەزيدەنتى. بۇدان بولەك, نۇرسۇلتان نازارباەۆ مەملەكەتتىك باق-تىڭ باسشىلىق قۇرامىن قالىپتاستىرۋ ىسىنە مۇقيات بولۋ قاجەتتىگىنە نازار اۋداردى. – جوعارعى تالاپتارعا ساي كەلەتىن, شەتەل تىلدەرىن مەڭگەرگەن جانە اقپارات كەڭىستىگىنىڭ باستى ۇردىستەرىنە ساپالى تالداۋ جاساي الاتىن ادامداردى تاڭداۋ كەرەك. جالپى, مەملەكەتتىك اقپارات ساياساتىنىڭ ماسەلەلەرى مەنىڭ باستى نازارىمدا. مينيسترلىكتىڭ قىزمەتىنە تىكەلەي ءوزىم جانە پرەزيدەنت اكىمشىلىگىنىڭ باسشىسى باقىلاۋ جاسايدى. باسقا تۇلعالاردىڭ ارالاسۋىنا جول بەرىلمەيدى, – دەدى مەملەكەت باسشىسى. اقپارات جانە كوممۋنيكاتسيالار ءمينيسترى باق جۇمىسىنىڭ تيىمدىلىگىن ارتتىرۋ, سونداي-اق «ءبىر تەرەزە» قاعيداتى بويىنشا حالىققا مەملەكەتتىك قىزمەتتەر كورسەتۋ ءىسىن ىلگەرىلەتۋ جونىندە قابىلدانىپ وتىرعان شارالار تۋرالى باياندادى. سونداي-اق, د.اباەۆ قازاقستان پرەزيدەنتىن تەلەكوممۋنيكاتسيا سالاسىنىڭ قىزمەت ەتۋ ساپاسىن ارتتىرۋداعى مينيسترلىكتىڭ قىزمەتى, سونىڭ ىشىندە «ساندىق قازاقستان» باعدارلاماسىن ازىرلەۋ جۇمىسى تۋرالى حاباردار ەتتى.