وڭتۇستىكتە رۇقساتسىز سالىنعان قۇرىلىستار بۇزىلدى

وڭتۇستىك قازاقستان وبلىسىندا رۇقساتسىز سالىنعان قۇرىلىستار بۇزىلدى. بۇل تۋرالى ايماقتىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ايتىلدى. جىل باسىنان بەرى 1034 نىساننىڭ قۇرىلىس مونتاج جۇمىستارىنا باقىلاۋ جاسالعان. «باسقارمانىڭ قۇرىلىس ينسپەكتورلارى وبلىستىڭ اۋدان, قالالارىندا سالىنىپ جاتقان قۇرىلىس نىساندارىنا 1453 رەت تەكسەرۋ جۇمىستارىن جۇرگىزىپ, انىقتالعان كەمشىلىكتەر بويىنشا 587 نۇسقاما بەردى, كەمشىلىكتەرى تۇزەتىلدى. سونىمەن قاتار, اكىمشىلىك قۇقىق بۇزۋشىلىق جونىندە 329 حاتتاما تولتىرىلىپ, 242 قاۋلىمەن 58,5 ملن تەڭگە اكىمشىلىك ايىپپۇل سالىندى. ال زاڭ تالاپتارىن بۇزا وتىرىپ سالىنعان نىساندار بويىنشا سوتتىڭ قاراۋىنا 120 نىسان جىبەرىلىپ, سوت شەشىمىمەن 6,4 ملن تەڭگە ايىپپۇل سالىندى», دەدى وبلىستىق مەملەكەتتىك-ساۋلەت قۇرىلىس باقىلاۋ باسقارماسىنىڭ باسشىسى قۇتتىبەك جاماشەۆ. سونىمەن قاتار, زاڭ تالاپتارىن ساقتاماي سالىنعان 106 نىسان بويىنشا ءىس سوتقا جولدانىپ, ونىڭ 32-ءسىن بۇزۋ جونىندە وكىم شىققان, 22 نىسانعا ايىپپۇل سالىندى. باقتيار تايجان