* 5 قازاندا پرەزيدەنت نۇرسۇلتان نازارباەۆ بىرىككەن ۇلتتار ۇيىمى باس اسسامبلەياسىنىڭ 47-ءشى سەسسياسىندا ءسوز سويلەدى. ەلباسى بۇۇ مىنبەرىندە الەمدىك اۋقىمدا ويلاۋ قابىلەتىن اڭعارتتى. اسىرەسە, مەملەكەت باسشىسىنىڭ الەمدىك دەڭگەيدەگى كۇردەلى ماسەلەلەردى ساۋاتتى تالداي وتىرىپ, ونىڭ شەشىلۋ جولدارىنا قاتىستى ۇسىنىستارىن جاھان جۇرتشىلىعى جىلى قابىلدادى. قازاقستان پرەزيدەنتى وسى كۇنى بۇۇ باس حاتشىسى بۋتروس عاليمەن كەزدەستى.
ايتا كەتەيىك, نۇرسۇلتان نازارباەۆتىڭ بۇۇ باس اسسام-بلەياسىنىڭ 47-ءشى سەسسياسىندا سويلەگەن ءسوزى «ەگەمەندى قازاقستان» گازەتىنىڭ 8 قازانداعى نومىرىندە جاريالاندى.
* 10 قازاندا كوكشەتاۋدا قازاقستان مەن رەسەي پرەزيدەنتتەرى – نۇرسۇلتان نازارباەۆ پەن بوريس ەلتسيننىڭ كەزدەسۋى ءوتتى. باسقوسۋدا تاراپتار مەملەكەتارالىق قاتىناستارعا, سونىڭ ىشىندە استىق جەتكىزىلۋىنە بايلانىستى ماسەلەلەردىڭ كەڭ اۋقىمى بويىنشا كەلىسسوز جۇرگىزدى. كەلىسسوز ناتيجەلەرى بويىنشا بىرلەسكەن مالىمدەمە دە جاسالدى. وندا بۇدان ءارى دە ستراتەگيالىق كۇشتەرگە بىرىككەن كوماندوۆانيە مەن يادرولىق قارۋعا ءبىرتۇتاس باقىلاۋ جاساۋ, بايقوڭىر عارىش ايلاعىندا, سەمەي پوليگونىندا جانە ەكى مەملەكەتتەگى قورعانىس كەشەنىنىڭ باسقا دا نىساندارىندا قۇرىلعان عىلىمي-تەحنيكالىق پوتەنتسيالدى ساقتاۋ جانە دامىتۋ قاجەتتىگى ايتىلدى.
*11 قازاندا باتىس قازاقستان وبلىسىنىڭ سىرىم اۋدانىندا قازاقتىڭ 1783-1787 جىلدارداعى ۇلت-ازاتتىق كوتەرىلىسىنىڭ قولباسشىسى, باتىر ءارى شەشەن سىرىم دات ۇلىنىڭ تۋعانىنا 250 جىل تولۋى كەڭ كولەمدە اتاپ ءوتىلدى.
* 14 قازاندا پرەزيدەنت نۇرسۇلتان نازارباەۆ «شەۆرون» كورپوراتسياسى ديرەكتورلار كەڭەسىنىڭ توراعاسى, كورپوراتسيا باسشىسى كەننەت دەرر باستاعان دەلەگاتسيامەن كەزدەستى. باسقوسۋدا 18 مامىردا ۆاشينگتوندا قازاقستان مەن «شەۆرون» اراسىندا بىرلەسكەن كاسىپورىن قۇرۋ جونىندە قۇرىلتاي كەلىسىمىنە قول قويىلعاننان كەيىن ءىستىڭ ەداۋىر ىلگەرىلەگەنى ءسوز بولدى.
* 18 قازاندا الماتىدا رۋحاني تاتۋلىق جونىندەگى ءبىرىنشى دۇنيەجۇزىلىك كونگرەسس بولىپ ءوتتى. فورۋمعا الەمدەگى اسا ءىرى ءدىني اعىمداردىڭ وكىلدەرى, بەلگىلى رۋحاني ءىلىم باسشىلارى, عالىمدار, جازۋشىلار, وقۋ-اعارتۋ جانە مادەنيەت قايراتكەرلەرى, اقش-تان, ۇلىبريتانيادان, گەرمانيادان, اۆستريادان, يتاليادان, شۆەيتساريادان, ءۇندىستاننان جانە باسقا دا شەت مەملەكەتتەردەن, تمد-نىڭ كوپتەگەن ەلدەرىنەن كەلگەن شىعارماشىلىق ينتەلليگەنتسيا وكىلدەرى كەلدى. پرەزيدەنت نۇرسۇلتان نازارباەۆ كونگرەسكە قاتىسۋشىلارعا قۇتتىقتاۋ جولدادى.
*21 قازاندا قازاقستان مەن رەسەي اراسىندا ديپلوماتيالىق قارىم-قاتىناس ورناتىلدى. ەكى ەلدە ءوز ەلشىلىكتەرى اشىلدى.
* 22 قازاندا پرەزيدەنت نۇرسۇلتان نازارباەۆ قازاق تەلەديدارى ارقىلى ءسوز سويلەپ, دەموكراتيالىق قوعام قۇرۋ, نارىقتىق ەكونوميكا قالىپتاستىرۋ باعىتىندا تۋىنداپ وتىرعان كۇردەلى ماسەلەلەر, ۇكىمەت ءۇش جىلعا ەسەپتەپ, جاساپ شىققان رەفورمالار سيپاتى جونىندە ەل حالقىن حاباردار ەتتى.
ەلباسى ءسوزى «ەگەمەندى قازاقستان» گازەتىنىڭ 24 قازانداعى نومىرىنە باسىلدى.
* 23 قازاندا پرەزيدەنت ن.ءا.نازارباەۆتىڭ توراعالىق ەتۋىمەن قاۋىپسىزدىك كەڭەسىنىڭ كەزەكتى ءماجىلىسى ءوتتى. ماجىلىستە رەسپۋبليكانىڭ اسكەري دوكتريناسى مەن اسكەري قۇرىلىسىنىڭ تۇجىرىمداماسى قارالدى.
* 28 قازاندا تۇركيادا تۇڭعىش رەت ەلىمىزدىڭ ديپلوماتيالىق وكىلدىگى – قازاقستان ەلشىلىگى رەسمي تۇردە اشىلدى.
* 29 قازاندا قازاقستان پرەزيدەنتى ن.ءا.نازارباەۆ تۇرىك رەسپۋبليكاسىنىڭ قۇرىلۋىنىڭ 69 جىلدىعىنا ارنالعان انكاراداعى سالتاناتقا قاتىستى.
*30 قازاندا انكاراداعى ۇلى ۇلتتىق ءماجىلىس ۇيىندە تۇركى تىلدەس مەملەكەتتەر مەن ۇكىمەتتەر باسشىلارىنىڭ كەڭەسى اشىلدى. ال ەرتەڭىنە ءتۇركيا, ازەربايجان, قازاقستان, قىرعىزستان, تۇرىكمەنستان جانە وزبەكستان پرەزيدەنتتەرى «انكارا دەكلاراتسياسىنا» قول قويدى.
* 31 قازان – 2 قاراشا ارالىعىندا ەلباسى ن.ءا.نازارباەۆ يران يسلام رەسپۋبليكاسىندا رەسمي ساپارمەن بولدى. ساپار بارىسىندا قازاقستان مەن يران پرەزيدەنتتەرىنىڭ بىرلەسكەن مازمۇنداماسى جاريالاندى.
* 10 قاراشا الماتىدا اۋداندار, قالالار مەن وبلىستار اكىمدەرى جانە حالىق دەپۋتاتتارى كەڭەستەرى توراعالارىنىڭ رەسپۋبليكالىق كەڭەسى باستالدى. كەڭەستە ەل پرەزيدەنتى, كونستيتۋتسيالىق كوميسسيانىڭ توراعاسى نۇرسۇلتان نازارباەۆ بايانداما جاسادى. «مەن قوعامدى قايتا وزگەرتۋدەگى ءبىزدىڭ بارلىق تابىستارىمىزدىڭ نەگىزى – بارلىق قازاقستاندىقتاردىڭ بىرلىگى, كەلىسىمى مەن تاتۋلىعى ەكەنىن قايتالاۋدان ەشقاشاندا جالىقپايمىن», – دەدى ءوز بايانداماسىندا ەلباسى.
* 24 قاراشادا قازاق ادەبيەتىنىڭ كلاسسيگى عابيت مۇسىرەپوۆتىڭ تۋعانىنا 90 جىل تولۋىنا وراي اباي اتىنداعى وپەرا جانە بالەت تەاترىندا سالتاناتتى كەش ءوتتى. ايتا كەتەيىك, «ەگەمەندى قازاقستان» گازەتىنىڭ 25 قاراشاداعى نومىرىندە اكادەميك زەينوللا قابدولوۆتىڭ «مۇسىرەپوۆ تۋرالى ءسوز» تاقىرىبىمەن كولەمدى ماقالا جاريالاندى.
* 25 قاراشادا يۋنەسكو شتاب-پاتەرىندە ءباسپاسوز جانە بۇقارالىق اقپارات ءمينيسترى قۋانىش سۇلتانوۆ وسى بەدەلدى حالىقارالىق ۇيىمنىڭ باس ديرەكتورى فەدەريكو مايورعا قازاقستان پرەزيدەنتى ن.ءا.نازارباەۆتىڭ ابايدىڭ تۋعانىنا 150 جىل تولۋىن يۋنەسكو شەڭبەرىندە تويلاۋ ماسەلەسىنە بايلانىستى جەكە حاتىن تابىس ەتتى. فەدەريكو مايور ابايدىڭ 150 جىلدىق مەرەيتويىنا تىكەلەي قولداۋ كورسەتەتىنىنە سەندىردى. بۇل ماسەلەنىڭ ەلباسىنىڭ تىكەلەي ارالاسۋىمەن عانا شەشىلەتىن ءجونى دە بار: يۋنەسكو ءتارتىبى بويىنشا الەمدىك اۋقىمدا ۇلى تۇلعالاردىڭ تەك عاسىرلىق مۇشەل تويلارى عانا اتالىپ وتەدى. ەرەجە تالاپتارىنىڭ تىلىمەن ايتساق,
«داتانىڭ كەمىندە ەكى نولمەن ءبىتۋى», مىسالى, 100, 200, 500, 1000 دەگەن سياقتى بولىپ كەلۋى شارت. اباي تويى وسىدان كەيىن ءۇش جىل وتكەندە, 1995 جىلى يۋنەسكو شەڭبەرىندە كەڭىنەن اتالىپ ءوتتى.
* 26 قاراشادا م.اۋەزوۆ اتىنداعى تەاتردىڭ عيماراتىندا «قازاق ءتىلى» قوعامىنىڭ ءىى قۇرىلتايى ءوتتى. پرەزيدەنت ن.ءا.نازارباەۆ قۇرىلتايعا قاتىسۋشىلاردىڭ الدىندا ءسوز ءسويلەدى. قۇرىلتايدا قوعامنىڭ جارعىسىنا ۋاقىت تالابىنا وراي تۇزەتۋلەر مەن تولىقتىرۋلار ەنگىزىلدى. قوعامنىڭ قىزمەت اۋقىمى رەسپۋبليكا شەڭبەرىنەن شىعىپ, جالپى قازاق ءتىلىنىڭ تاعدىرىنا قاتىستى ماسەلەلەردى شەشۋگە اتسالىسا باستاعانىنا بايلانىستى مۇنان بىلاي ونى حالىقارالىق «قازاق ءتىلى» قوعامى دەپ اتاۋ ۇيعارىلدى. قوعامنىڭ پرەزيدەنتى بولىپ ءابدۋالي قايداروۆ سايلاندى. ەلباسىنىڭ قۇرىلتايداعى ءسوزى «ەگەمەندى قازاقستان» گازەتىنىڭ 28 قاراشاداعى سانىندا «حالىق ماڭگىلىگىنىڭ ماسەلەسى» تاقىرىبىمەن جارىق كوردى.
* 27 قاراشادا قازاقستاننىڭ, قىرعىزستاننىڭ, رەسەيدىڭ جانە تاجىكستاننىڭ بىرىككەن دەلەگاتسياسى مەن قىتايدىڭ ۇكىمەت دەلەگاتسياسى اراسىندا شەكارا اۋداندارىندا قارۋلى كۇشتەر مەن قارۋ-جاراقتى ءوزارا قىسقارتۋ جانە تمد-نىڭ اتالعان ءتورت ەلى مەن قىتاي حالىق رەسپۋبليكاسى اراسىندا اسكەري سالاداعى ءوزارا سەنىمدى نىعايتۋ تۋرالى ماسەلەلەر بويىنشا وتكىزىلگەن كەلىسسوزدىڭ بەيجىڭدە وتكەن سەگىزىنشى كەزەڭى اياقتالدى.
