ولگا سەرگەەۆنا رىپاكوۆا
جەڭىل اتلەت. ەڭبەك سىڭىرگەن سپورت شەبەرى.
وسكەمەن قالاسى
1984 جىلى 30 قاراشادا وسكەمەن قالاسىندا تۋعان.
– وليمپيالىق ويىنداردىڭ چەمپيونى (لوندون, 2012), ءۇش قارعىپ سەكىرۋ;
– وليمپيالىق ويىنداردىڭ قولا جۇلدەگەرى (ريو-دە-جانەيرو, 2016), ءۇش قارعىپ سەكىرۋ;
– الەم چەمپيوناتىنىڭ كۇمىس جۇلدەگەرى (تەگۋ, 2011), ءۇش قارعىپ سەكىرۋ;
– الەم چەمپيوناتىنىڭ قولا جۇلدەگەرى (بەيجىڭ, 2015), ءۇش قارعىپ سەكىرۋ;
– جابىق زالدا وتكەن الەم چەمپيوناتىنىڭ جەڭىمپازى (دوحا, 2010), ءۇش قارعىپ سەكىرۋ;
– جابىق زالدا وتكەن الەم چەمپيوناتىنىڭ كۇمىس جۇلدەگەرى (ىستانبۇل, 2010), ءۇش قارعىپ سەكىرۋ;
– ازيا ويىندارىنىڭ چەمپيونى (ينچحون, 2014), ءۇش قارعىپ سەكىرۋ.
«بارىس» وردەنىنىڭ يەگەرى.
جاتتىقتىرۋشىسى: سەرگەي دميترەۆيچ الەكسەەۆ.
جەڭىل اتلەتيكادان لوندون وليمپياداسىنىڭ چەمپيونى ولگا رىپاكوۆا ريو-دە-جانەيرودان دا جۇلدەسىز قايتپادى. ول ءۇش قارعىپ سەكىرۋدەن سىنعا ءتۇسىپ, العاشقى ۇشتىكتىڭ قاتارىنان تابىلدى.
ءوزىنىڭ ءبىرىنشى تالپىنىسىن جاقسى پايدالانعان جەرلەسىمىز وسى كەزەڭنەن كەيىن كوش باستاپ تۇردى. ونىڭ الدىمەن 14,47 مەتردى, سوڭىنان 14,73 مەتردى كورسەتكەن كورسەتكىشى الدىڭعى قاتارعا شىقتى. بىراق كەيىنىرەك كولۋمبيالىق كاترين يبارگۋەن بىردەن 17,15 مەترگە سەكىرىپ, العا شىعانداپ كەتىپ قالدى. وسىدان كەيىن رىپاكوۆا ەكىنشى ورىنعا جىلجىپ كەتتى. الايدا, سوسىن ۆەنەسۋەلالىق يۋليمار روحاس 14,98 مەترگە جەتىپ, ولگانى ءۇشىنشى پوزيتسياعا قاراي جىلجىتىپ جىبەردى. وسى سوڭعى كورسەتكىش رىپاكوۆانى لوندوندا التىن مەدالعا جەتكىزىپ ەدى.
البيون جەرىندەگى الاماننان كەيىن ولگا رىپاكوۆا ءوزىنىڭ ەكىنشى بالاسىن ومىرگە كەلتىردى. بۇل ونىڭ وتباسىنا كوبىرەك الاڭداۋىنا الىپ باردى. دەگەنمەن, وسى ارالىقتا ءجۇرىپ-اق ولگا ءبىراز الەمدىك جانە حالىقارالىق جارىستارعا قاتىسىپ, جۇلدەلى ورىنداردان كورىنىپ ءجۇردى.
ايتا كەتەيىك, ولگانى ءوز اكەسى سەرگەي الەكسەەۆ جاتتىقتىرادى. ول كۇيەۋى دەنيس رىپاكوۆپەن بىرگە قازىر ءبىر ۇل, ءبىر قىز تاربيەلەپ وتىر.
دۋمان اناش,
«ەگەمەن قازاقستان»
وسكەمەن
ەكاتەرينا الەكسەەۆنا لاريونوۆا
بالۋان. سپورت شەبەرى.
ورال قالاسى
باتىس قازاقستان وبلىستىق ىشكى ىستەر دەپارتامەنتى جىلدام ارەكەت ەتۋ ارنايى جاساعىنىڭ قىزمەتكەرى, پوليتسيا كىشى لەيتەنانتى.
1994 جىلى 23 قاڭتاردا باتىس قازاقستان وبلىسى, ءبورلى اۋدانى, پريۋرال اۋىلىندا تۋعان.
– وليمپيالىق ويىنداردىڭ قولا جۇلدەگەرى (ريو-دە-جانەيرو, 2016), 63 كگ;
– الەم چەمپيوناتىنىڭ قولا جۇلدەگەرى (بۋداپەشت, 2013), 63 كگ;
– ازيا چەمپيوناتىنىڭ قولا ءجۇلدەگەرى (استانا, 2014), 63 كگ;
– ازيا چەمپيوناتىنىڭ قولا جۇلدەگەرى (دوحا, 2015), 63 كگ.
جاتتىقتىرۋشىسى: الەكسەي ستانيسلاۆوۆيچ لاريونوۆ.
تەگىندە, «بالاسى اتقا شاپسا, اناسى ۇيدە تاقىمىن قىسادى» دەگەن راس. ەكاتەرينا لاريونوۆا ريو كىلەمىنىڭ شاڭىن قاعىپ جۇرگەندە, ونىڭ ورالداعى اتا-اناسى الەكسەي جانە ناتاليا لاريونوۆتار دا سونداي كۇيدى باستان كەشتى. ويتكەنى, ولاردىڭ تۇلا بويى تۇڭعىشتارى, وتباسىنداعى بەس پەرزەنتتىڭ ۇلكەنى, جالعىز دارا قىزعالداعى كاتيا بەلدەسۋ كەزەڭىن كوبىرەك كۇتىپ قالدى.
ءبىز مۇنى كاتەرينا جۇلدە العان كۇنى لاريونوۆتار وتباسىنا باس سۇققاندا, انىق بايقادىق.
– قازىرگى ساتتەگى كوڭىل-كۇيلەرىڭىز جونىندە ايتىپ بەرمەس پە ەكەنسىزدەر؟
وسى ساۋال بەرىلگەن ساتتە قۋانىشتان جۇزدەرى الاۋلاپ جانىپ تۇرعان ەرلى-زايىپتى الەكسەي جانە ناتاليا لاريونوۆتار ءبىر-بىرىنە قاراپ قالدى. بۇل, ارينە, قايسىمىز باستاپ ايتامىز دەگەن يشارا مەن بەلگى بولاتىن. قاي وتباسىندا دا اكە – اسقار تاۋ, قامقورشى ەمەس پە؟ ال كاتيا ءۇشىن اكەنىڭ ورنى ءتىپتى بولەك دەۋگە بولادى. سەبەبى, الەكسەي ستانيسلاۆوۆيچ ونىڭ اكەسى عانا ەمەس, وليمپياداعا قالتقىسىز ازىرلەگەن جاتتىقتىرۋشىسى دا. سوندىقتان قىزدارى جونىندەگى العاشقى اتا-انالىق ىقىلاس ءسوزدى اكەنىڭ باستاۋى قاي تۇرعىدان دا ورىندى ەكەنى انىق ەدى. اكە ءسوزى وتە قىسقا بولدى. مۇنى دا تۇسىنۋگە بولاتىن سەكىلدى. باستى ماسەلە ۇزىن سوزدە ەمەس, جۇرەكتەن شىققان قىسقا پەيىل مەن تۇپكى ناتيجەدە عوي.
ال اناسى اقتارىلدى. بىراق بۇلاردىڭ ءبىر-بىرلەرىنە ۇقسايتىن ءبىر نارسەلەرى بار ەدى. ول – ەكەۋىنىڭ دە تولدەرىنىڭ باسى, سۋلارىنىڭ تۇنىعى – كاتيانى جانىنداي جاقسى كورەتىندەرى جانە ونىڭ ءالى تالاي اسۋدان اساتىنىنا سەنىمدەرى ەدى.
قىسقاشا ءتىل قاتىسۋ ءساتى اياقتالىپ, كوشەگە شىقتىق. قۋانىش پەن شاتتىق كەرنەگەن, ءار بۇرىشىنا مەيىرىم مەن مامىراجاي تىرلىك ۇيالاعان لاريونوۆتار ءۇيى ارتىمىزدا قالىپ بارادى. ومىرگە كاتيۋشاداي جانى جومارت, بايىپتى دا بايسالدى, رياسىز ك ۇلىمسىرەي قاراعانداعى ايداي ديدارىنان جىلى نۇر توگىلىپ سالا بەرەتىن قايسار دا كوركەم قىزدى دۇنيەگە كەلتىرىپ, تاربيەلەگەن ەرلى-زايىپتى الەكسەي جانە ناتاليا لاريونوۆتارعا دەگەن سۇيىسپەنشىلىك سەزىم قالدى كوكەيدە.
تەمىر قۇسايىن,
«ەگەمەن قازاقستان»
ورال
يۆان فيودوروۆيچ دىچكو
بوكسشى. ەڭبەك سىڭىرگەن سپورت شەبەرى.
رۋدنىي قالاسى, قوستاناي وبلىسى.
رۋدنىي يندۋستريالدى ينستيتۋتىنىڭ ستۋدەنتى.
1990 جىلى 11 تامىزدا قوستاناي وبلىسى, رۋدنىي قالاسىندا تۋعان.
– وليمپيالىق ويىنداردىڭ قولا جۇلدەگەرى (لوندون, 2012), +91 كگ;
– وليمپيالىق ويىنداردىڭ قولا جۇلدەگەرى (ريو-دە-جانەيرو, 2016), +91 كگ;
– الەم چەمپيوناتىنىڭ كۇمىس جۇلدەگەرى (الماتى, 2013), +91 كگ;
– الەم چەمپيوناتىنىڭ كۇمىس جۇلدەگەرى (دوحا, 2015), +91 كگ;
– الەم چەمپيوناتىنىڭ قولا جۇلدەگەرى (باكۋ, 2011), +91 كگ;
– ازيا ويىندارىنىڭ كۇمىس جۇلدەگەرى (گۋانچجوۋ, 2010), +91 كگ;
– ازيا چەمپيونى (اممان, 2013), +91 كگ.
«قۇرمەت» وردەنىنىڭ يەگەرى.
جاتتىقتىرۋشىلارى: ۆلاديمير يۆانوۆيچ شايرەر, يۋري اناتولەۆيچ يانوۆ, ساپابەك مىرزاعالي ۇلى مۇقىشەۆ.
ريو وليمپياداسىنىڭ بوكسشىلار تۋرنيرىندە اسا اۋىر سالماقتا سىنعا تۇسكەن جەرلەسىمىز يۆان دىچكو بريتانيالىق دجوزەف دجويسپەن قولعاپ ءتۇيىستىرىپ, 1:2 ەسەبىمەن جەڭىلىس تاپقاندا, كوڭىلدە «اتتەگەن-اي» بولعانىمەن, جاندى جۇباتارلىق جاعدايىمىز دا بار ەدى. سەبەبى, قاتارىنان ەكى وليمپيادادا قولا جۇلدە الىپ جاتقان بىلعارى قولعاپ شەبەرلەرى تىم كوپ تە ەمەس.
ال جەكپە-جەكتىڭ باسى ءبىزدىڭ بوكسشى ءۇشىن جامان باستالعان جوق. بىزدىڭشە تەڭ كورىنگەن ۇرىستا تورەشىلەر جەڭىستى يۆاننىڭ قارسىلاسىنا بەرىپ جىبەردى. ەسەسىنە, قوستانايلىق قىران ەكىنشى راۋندتا ءبىراز ەسە قايىردى. بۇل ەسەپتى تەڭەستىرۋگە مۇمكىندىك بەردى. سوندىقتان سوڭعى راۋندتان كۇتكەن ءۇمىتىمىز كوپ بولدى. الايدا, وسى تۇستا شارشاعانى بىلىنگەن يۆان جەڭىستىڭ سالماعىن وزىنە قاراي بۇرىپ كەتەتىندەي ارتىق قيمىل جاساي المادى.
مۇنى بوكسشىنىڭ ءوزى كەيىن ايتاتىنداي, ول راسىندا بارىن سالدى, بىراق شارشاپ قالۋى ويلاعانىن بولدىرمادى. بۇل جەردە ەكى بىردەي وليمپيالىق ويىنداردىڭ جارتىلاي فينالىندا ونەر كورسەتۋ مۇمكىندىگىنە قول جەتكىزگەن دىچكونىڭ پسيحولوگيالىق جاعىنان دا قيىندىق كورگەنى اڭعارىلدى.
جالپى, بۇل ريو جەرىندە قوستانايلىق بوكسشى وتە جاقسى ونەر كورسەتتى. ول شيرەك فينالدا نيگەريالىق كۇشتى قارسىلاسى ەفە ادجاگبانى جەڭۋگە ءبىراز كۇش جۇمساپ قويدى.
ەل-جۇرتى يۆاننىڭ بۇل تابىسىن قۋانا قارسى الدى. ونى اۋەجايدان وبلىس اكىمى ارحيمەد مۇحامبەتوۆ باستاعان ۇلكەن قاۋىم كۇتىپ الدى. ايماق باسشىسى وعان ءۇش بولمەلى پاتەردىڭ كىلتىن سىيلادى.
قىمبات دوسجانوۆا
قوستاناي
الەكساندر سەرگەەۆيچ زايچيكوۆ
اۋىر اتلەت. حالىقارالىق دارەجەدەگى سپورت شەبەرى.
قىزىلوردا قالاسى
1992 جىلى 17 تامىزدا بەلارۋستىڭ ۆيتەبسك وبلىسى, لەپەل اۋدانى, زاسلونوۆ سەلوسىندا تۋعان.
– وليمپيالىق ويىنداردىڭ قولا جۇلدەگەرى (ريو-دە-جانەيرو, 2016), 105 كگ;
– الەم چەمپيونى (حيۋستون, 2015), 105 كگ.
جاتتىقتىرۋشىسى: ارمان ابدراەۆ.
قىزىلوردادا ۇزدىك ۇلاندارى ۇلكەن جارىستاردا سىنعا ءتۇسىپ جاتقاندا, ولاردىڭ ونەرىن بۇكىل ەل بولىپ كورىپ, جانكۇيەرلىك ەتۋ ءۇردىسى باياعىدان بار. بۇرىنعى وليمپيادالاردا اقمەشىت اتىرابىنىڭ ازاماتتارى يليا يلين مەن الماس وتەشوۆ سايىسقا تۇسەتىن كۇنى ورتالىق الاڭعا جينالىپ, ۇلكەن ەكراننان تاماشالايتىن. بۇل ءۇردىس الەكساندر زايچيكوۆكە كەلگەندە دە ۇزىلگەن جوق. اۋىر اتلەت جارىس جولىنا شىعاتىن كۇنى قالا جاستارى الەۋمەتتىك جەلى ارقىلى «مۇز ايدىنىنا» جينالىپ, سپورتشىعا قولداۋ كورسەتۋگە ۇندەۋ تاستادى. ءسويتىپ, تۇنگى ساعات 3:00-دەن جاستار مەجەلى جەرگە قاراي اعىلدى.
اقىرىندا سارايدا 300-گە جۋىق ادام ا.زايچيكوۆتىڭ ونەرىن دەمىن ىشىنە تارتىپ كوردى. سپورتشى باعىندىرعان سالماقتى وزدەرى كوتەرىپ جاتقانداي سەزىنىپ, ونىڭ ءاربىر ارەكەتىن ەكران ارقىلى كىرپىك قاقپاي باقىلادى. جۇلقا كوتەرۋدەن 193 كيلو زىلتەمىردى باسىنان اسىرىپ تاستاعانىندا تۇتاس زال شۋلاپ كەتتى. ءبىرىن-ءبىرى قۇشاقتاپ, زايچيكوۆتىڭ جەتىستىگىمەن قۇتتىقتاپ مارە-سارە بولىستى. سەرپە كوتەرۋدەن العاشقى تاپسىرىسىن 223 كيلو دەپ كورسەتكەندە, جانكۇيەرلەر الەكساندردىڭ ءجۇلدەلى ورىنعا ۇمتىلعانىن انىق بايقادى. العاشقى تاپسىرىستى ءمىنسىز ورىنداعاندا, جيىلعان جۇرتشىلىق ءدۇر ەتە قالدى. ال ەكىنشى تاپسىرىستى ورىنداي الماعاندا, تۇتاس زال دۇرلىگىپ كەتتى. الايدا, ءۇشىنشى تالپىنىسىندا 227 كيلونى باعىندىرعاندا, تورەشىلەر ونىڭ بۇل تالپىنىسىن ەسەپتەمەي تاستادى. جانكۇيەرلەردىڭ كوڭىلى سۋ سەپكەندەي باسىلدى. دەگەنمەن, زايچيكوۆ قوسسايىستىڭ ناتيجەسىندە 416 كيلونى باعىندىرىپ, قولا جۇلدەگە يە بولعاندا, جانكۇيەرلەردىڭ قۋانىشىندا شەك جوق ەدى. ويتكەنى, ەكى ءبىردەي ساڭلاعىن وليمپياداعا قوسا الماي, ىشتەي بۋلىعىپ جۇرگەن جۇرتشىلىققا زايچيكوۆ يەلەنگەن «قولانىڭ» قادىرى «التىنمەن» پارا-پار بولاتىن.
ەرجان بايتىلەس,
«ەگەمەن قازاقستان»
قىزىلوردا
وتگونتسەتسەگ گالبادراح
دزيۋدوشى. سپورت شەبەرى.
شىمكەنت قالاسى
1992 جىلى 25 قاڭتاردا موڭعوليا استاناسى – ۇلان-باتىر قالاسىندا تۋعان.
2015 جىلدىڭ قاڭتارىنان بەرى قازاقستان رەسپۋبليكاسىنىڭ ازاماتى.
– وليمپيالىق ويىنداردىڭ قولا جۇلدەگەرى (ريو-دە-جانەيرو, 2016), 48 كگ;
– الەم كۋبوگىنىڭ كۇمىس جۇلدەگەرى (تاشكەنت, 2012), 48 كگ;
– الەم كۋبوگىنىڭ قولا جۇلدەگەرى (تاشكەنت, 2011), 48 كگ;
– ەۋروپا اشىق چەمپيوناتىنىڭ كۇمىس جۇلدەگەرى (براتيسلاۆا, 2013), 48 كگ.
جاتتىقتىرۋشىسى: ەنحباتار داشجامتس.
دزيۋدوشى وتگونتسەتسەگ گالبادراح قازاقستان قۇراماسىنىڭ ريو-دە-جانەيروداعى وليمپيالىق ويىندارداعى ناعىز اقجولتاي سپورتشىسى بولدى. تاتاميدەگى تايتالاسقا 48 كيلوعا دەيىنگى تارلاندار اراسىندا قوسىلعان ول جارىستىڭ ءبىرىنشى كۇنى قورجىنىنا العاشقى مەدال سالدى. سول-اق ەكەن, وتگونتسەتسەگتىڭ قولا مەدالىن ارتىنشا ەلدوس سمەتوۆ كۇمىس مەدال ەتىپ قايتاردى.
24 جاستاعى دزيۋدوشى قىز قازاقستانعا وسى وليمپيالىق ويىندارعا قاتىسۋ ماقساتىندا كەلدى. سەبەبى, ونىڭ ەلىندە بۇل سالماقتا ۋرانتسەتسەگ مۋنحبات ەسىمدى مىقتى پالۋان بار ەدى. سوندىقتان 2015 جىلعى ماۋسىمدا قازاقستان ازاماتتىعىن الدى. 2016 جىلعى اقپاننىڭ باسىندا پاريجدە وتگونتسەتسەگ ءىرى حالىقارالىق «ۇلكەن دۋلىعا» تۋرنيرىندە سەنساتسيالىق جەڭىسكە قول جەتكىزدى. سول ايدىڭ ورتاسىندا ديۋسسەلدورف (گەرمانيا) قالاسىندا الەمدىك گران-پري كەزەكتى كەزەڭىندە كۇمىس مەدال الدى. بۇدان بۇرىن 2015 جىلعى قاراشادا ول تسينداو قالاسىندا دزيۋدو بويىنشا كەزەكتى گران-ءپريدىڭ كۇمىس جۇلدەگەرى اتانعان.
ريو-دە-جانەيرو قالاسىندا گالبادراح ءۇشىنشى ورىن ءۇشىن كۇرەستە كۋبالىق مەسترە الۆارەستى يپپون ادىسىمەن جەڭىپ, جەڭىستى جولدى باستاپ بەردى. ول ەكىنشى بەلدەسۋىندە جاپون امي كوندودان ايلاسىن اسىرا الماعان. وسىلايشا ول باس جۇلدە ءۇشىن تالاسقا ءتۇسۋ مۇمكىندىگىنەن ايىرىلىپ قالعان. ال ءبىرىنشى اينالىمدا وتگونتسەتسەگ گۆينەيا-بيساۋلىق تاسيانا ليمانى ايقىن باسىمدىقپەن ۇتقان ەدى.
مۇرات ايتقوجا
كارينا حاۆاجەۆنا گوريچەۆا
اۋىر اتلەت. حالىقارالىق دارەجەدەگى سپورت شەبەرى
تالدىقورعان قالاسى
قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتى.
1993 جىلى 8 ساۋىردە تالدىقورعان قالاسىندا تۋعان.
– وليمپيالىق ويىنداردىڭ قولا جۇلدەگەرى (ريو-دە-جانەيرو, 2016), 62 كگ;
– ۋنيۆەرسيادانىڭ كۇمىس جۇلدەگەرى (قازان, 2013), 63 كگ.
جاتتىقتىرۋشىسى: ۆيكتور الەكسەەۆيچ ني.
جەتىسۋ جەرىنىڭ 23 جاستاعى تۇلەگى كارينا گوريچەۆا 63 كيلوعا دەيىنگى سالماقتا ريو تۇعىرىندا قولا مەدالعا قول جەتكىزگەندە, مۇنداعى كوپشىلىك ونى ءبىر جاعى زاڭدىلىق سانادى. ولاي دەيتىنىمىز, اۋىر اتلەتيكاعا كەشتەۋ, 15 جاسىندا كەلگەن ءجاسوسپىرىم قىز سودان كەيىن كوپ ۇزاماي ءوزىن ءىرى جارىستاردا تانىتا باستاعان ەدى.
كارينا زىلتەمىردى قاقپاقىلداي باستاعانىنا ءۇش جىل بولعاندا, 2011 جىلى جاسوسپىرىمدەر اراسىنداعى الەم چەمپيوناتىندا كۇمىس مەدال الدى. كەلەسى جىلى قولا مەدالدىڭ يەگەرى اتاندى. ال 2013 جىلى ۋنيۆەرسيادانىڭ كۇمىس مەدالىنە قول جەتكىزدى. وسى جىلى الەم بىرىنشىلىگىندە 107+135=242 كيلو كورسەتكىشپەن ءتورتىنشى ورىننان تابىلدى. سودان كەيىن 2014 جىلى الەم چەمپيوناتىندا جۇلقا كوتەرۋدە التىن مەدالدى يەلەندى. 2015 جىلعى الەم چەمپيوناتىندا ۇزدىك ۇشتىكتىڭ قاتارىنا ەندى.
ەندى, مىنە, وسىدان كەيىن ريو وليمپيالىق ويىندارىندا ۇشتىكتىڭ قاتارىنان تابىلۋى ونىڭ وسى جولداعى باعىتىنىڭ دۇرىس ەكەنىن كورسەتىپ بەردى.
نۇربول الدىباەۆ,
«ەگەمەن قازاقستان»
تالدىقورعان
داريعا ورالقىزى شاكىموۆا
بوكسشى. سپورت شەبەرى
الماتى قالاسى
1988 جىلى 20 قاراشادا پەتروپاۆل قالاسىندا تۋعان.
– وليمپيالىق ويىنداردىڭ قولا جۇلدەگەرى (ريو-دە-جانەيرو, 2016), 75 كگ;
– ازيا چەمپيونى (استانا, 2010) 75 كگ.
جاتتىقتىرۋشىسى: ۆيكتور ەدۋاردوۆيچ پريسياجنيۋك.
قازىر الماتى قالاسىنىڭ اتىنان سىنعا ءتۇسىپ جۇرسە دە, بوكسشى داريعا شاكىموۆانى سولتۇستىك قازاقستان وبلىسىنىڭ جۇرتشىلىعى ءوز ادامىنداي كورەدى. سەبەبى, ول پەتروپاۆل قالاسىندا تۋىپ-وسكەن. وسىندا مەكتەپتە وقىپ جۇرگەن كەزىندە بوكس سەكتسياسىنا بارعان. الدىمەن كيكبوكسينگپەن اينالىسىپ كورىپتى.
اناسى زەينەپپەن حابارلاسقانىمىزدا, ول مۇنىڭ الدىندا جاتتىقتىرۋشىلارى ايتقان اڭگىمەنى تۇگەلدەي راستاپ بەردى. وكىنىشتىسى, قىزىنىڭ وسىنداي داڭققا جەتىپ جاتقان كەزىن اكەسى ورال كورە الماي كەتىپتى.
داريعا وبلىس ورتالىعىنان شەتكەرىلەۋ ورنالاسقان «زارەچنىي» شاعىن اۋدانىنداعى № 13 مەكتەپتە وقىعان. ونى بىرگە وقيتىن قۇربىسى ليا شايدۋللينا ءبىر كۇنى كيكبوكسقا الىپ كەلىپتى. باسىندا دەنەسى تولىقشالاۋ قىزدى جاتتىقتىرۋشى دا قالاي قويماعانعا ۇقسايدى. بىراق ول تالاپتى شاكىرت بولىپ شىقتى. تالاپتى قىز 2003 جىلى كەلگەن بەتىنەن ءوزىن جاقسى جاعىنان كورسەتەدى. تىنىمسىز جاتتىعۋدىڭ, شۇمەكتەپ تەر توگۋدىڭ ارقاسىندا قيمىلى شيراپ, گۇرزى سوققىلارىمەن ەرەكشەلەنەدى. كەلەسى جىلى كيكبوكسينگتەن وتكەن وبلىستىق چەمپيوناتتا قارسىلاس شىداتپايدى. ال 16 جاسىندا قازاقستان بىرىنشىلىگىنە قاتىسىپ, ەكىنشى ورىنعا يە بولادى.
كەيىنىرەك, 2005 جىلى داريعا وزىمەن بىرگە جاتتىعىپ جۇرگەن 10 قىزبەن بىرگە سەرىك بەكتۇرعانوۆ جۇرگىزەتىن بوكسقا اۋىسادى. ول كوپ ۇزاماي مۇندا دا چەمپيون اتانا باستايدى. وسىلايشا 64, 69, 75 كيلو سالماق دارەجەلەرى بويىنشا ەلىمىزدىڭ 7 دۇركىن چەمپيونى اتانادى. ازيا تورىندە 1 رەت التىن جۇلدە السا, ءا.مولداعۇلوۆانى, م.مامەتوۆانى, ح.دوسپانوۆانى ەسكە الۋعا, سەرىك قوناقباەۆتىڭ ءجۇلدەسىنە ارنالعان حالىقارالىق تۋرنيرلەردە جاسىنداي جارقىلدايدى.
داريعا قىتايدىڭ ۋلانچاب قالاسىنا ءوز كۇشىنە سەنىپ باردى. باپكەرلەردىڭ تاپسىرمالارىن ويداعىداي ورىنداپ, 75 كيلو سالماق دارەجەسىندە قورجىنعا جالعىز التىندى سالدى. فينالدا قىتايلىق لي كيۋاندى 3:0 ەسەبىمەن جەڭىپ, ەكىنشى رەت «سارى قۇرلىقتىڭ» چەمپيونى ءتاجىن كيدى. قىزدار اراسىندا وليمپيادا ليتسەنزياسىن جەڭىپ العان العاشقى بوكسشى بولدى.
ريونىڭ جارتىلاي فينالىندا لوندون وليمپياداسىنىڭ, الەمنىڭ ەكى دۇركىن جەڭىمپازى اقش بوكسشىسى كلارەسسا شيلدسپەن قولعاپ ءتۇيىستىردى. جەكپە-جەك بارىسىندا ول ءوزىن اتاقتى ارىپتەسىمەن تەڭ دارەجەدە ونەر كورسەتە الدى.
ومىر ەسقالي,
«ەگەمەن قازاقستان»
پەتروپاۆل
ەلميرا انۋاربەكقىزى سىزدىقوۆا
بالۋان. سپورت شەبەرى
قاراعاندى قالاسى
قاراعاندى ەكونوميكالىق ۋنيۆەرسيتەتىنىڭ ستۋدەنتى.
1992 جىلى 5 اقپاندا سولتۇستىك قازاقستان وبلىسى, ايىرتاۋ اۋدانى, كامەننىي برود اۋىلىندا تۋعان.
– وليمپيالىق ويىنداردىڭ قولا جۇلدەگەرى (ريو-دە-جانەيرو, 2016), 69 كگ;
– ازيا چەمپيوناتىنىڭ كۇمىس جۇلدەگەرى (دوحا, 2015), 69 كگ;
– ازيا چەمپيوناتىنىڭ كۇمىس جۇلدەگەرى (بانگكوك, 2016), 69 كگ;
– ازيا چەمپيوناتىنىڭ قولا جۇلدەگەرى (2014, استانا), 69 كگ.
جاتتىقتىرۋشىلارى: ۆلاديمير ستاروسەلسكي, ۆلاديسلاۆ سۋتورمين.
ريودا قاراعاندىلىق بالۋان قىز ەلميرا سىزدىقوۆا اۋەلى موڭعول وچيرباتىن ناسانبۋرمامەن بوز كىلەمگە شىقتى. اسا تارتىستى وتكەن كۇرەس 2:2 ەسەبىمەن تەڭ اياقتالدى. تورەشىلەر اقىلداسا كەلىپ, كىلەم ۇستىندە بەلسەندىلىگىمەن كوزگە تۇسكەن ءبىزدىڭ بالۋانعا ءبىر ۇپايدى ارتىق بەرىپ, جەڭىستى قولىنا ۇستاتتى. قارسى الدىنان جارق ەتىپ جۇلدىزى جانعان ەلميرا كۇشىنە ءمىنىپ, قولا مەدال ءۇشىن بولعان بەلدەسۋدە مىسىر ەلىنىڭ بالۋان قىزى ەناس موستافا يۋسسەف احمەدتى 7:4 ەسەبىمەن بەت قاراتپاي ۇتتى. ءسويتىپ, قاراعاندىنىڭ قايسار قىزى جەڭىس تۇعىرىنىڭ ءۇشىنشى ساتىسىنا كوتەرىلىپ, قازاق ەلىنىڭ جۇلدە قورجىنىنا 12-ءشى مەدالدى سالدى.
«باقىتتان باسىم اينالىپ تۇر. ماعان سەنگەن, قولداعان جۇرتتىڭ بارشاسىنا ايتار العىسىم شەكسىز! وليمپياداداعى بەلدەسۋلەردىڭ بارلىعى دا وتە اۋىر بولدى. اسىرەسە, مىسىر ەلىنىڭ بالۋانىمەن قولا مەدال ءۇشىن بولعان بەلدەسۋ قيىنعا سوقتى. بىراق جاتتىقتىرۋشىلاردىڭ تاكتيكالىق تۇرعىدا بەرگەن تاپسىرمالارىنىڭ ارقاسىندا مەن جەڭىپ شىقتىم. قازاق ەلىنە راحمەت», دەدى سول ساتتە جۋرناليستەرگە بەرگەن سۇحباتىندا ەلميرا سىزدىقوۆا.
ول ءوزىنىڭ 24 جاسىنا دەيىن كۇرەس الەمىندە تالاي بيىكتەردى باعىندىرىپ ۇلگەرگەن قىز. 2012 جىلى جاسوسپىرىمدەر اراسىندا ازيانىڭ چەمپيونى اتاندى. ارادا ءبىر جىل وتكەندە گولدەن گران-پري-2013 ءتۋرنيرىنىڭ كۇمىس جۇلدەگەرى بولدى. 2014 جىلى ەرەسەكتەر اراسىندا ازيا چەمپيوناتىندا باق سىناپ, جۇلدەلى ءۇشىنشى ورىن الدى. سول جىلى موڭعوليادا وتكەن گران-پري جارىسىندا قارسىلاستارىنىڭ ءبارىن جەڭىپ, التىن مەدالعا قول جەتكىزدى. ءبىر جىلدان كەيىن ازيا چەمپيوناتىندا فينالدا عانا قارسىلاسىنا جول بەردى.
بيىلعى جىل ەلميرا ءۇشىن اسا تابىستى جىلداردىڭ ءبىرى بولدى. الدىمەن ول ي.يارىگيننىڭ جۇلدەسى ءۇشىن وتكەن گران-پري تۋرنيرىندە توپ جارسا, ودان كەيىن ازيا چەمپيوناتىندا تاعى دا كۇمىس جۇلدەگە يە بولدى. ال 18-20 ناۋرىزدا استانادا وتكەن ليتسەنزيالىق تۋرنيردە ءساتتى ونەر كورسەتكەن ەلميرا ريو-2016 وليمپياداسىنىڭ جولداماسىن جەڭىپ العان بولاتىن.
جالپى, ەلميرا 69 كيلو سالماقتا ەلىمىز بويىنشا ءوزىنىڭ مىقتىلىعىن كىلەم ۇستىندە تالاي مارتە دالەلدەگەن بالۋان. مىسالى, ول تاراز قالاسىندا وتكەن قازاقستان چەمپيوناتىندا ءوز سالماعىنداعى 14 بالۋاننىڭ ىشىنەن ۇزدىك شىققان بولاتىن.
ەلميرا سىزدىقوۆا سپورتپەن بىرگە ءبىلىمدى دە قاتار الىپ جۇرگەن اقىلدى قىزداردىڭ ءبىرى. ول ە.بوكەتوۆ اتىنداعى قارمۋ-دىڭ دەنە تاربيەسى جانە سپورت فاكۋلتەتىن تامامداعان. قازىر قاراعاندى ەكونوميكالىق ۋنيۆەرسيتەتىندە ەكىنشى جوعارى ءبىلىم ءۇشىن وقىپ ءجۇر.
بوس ۋاقىتىندا بالۋان قىز اس پىسىرگەندى, كىتاپ وقىعاندى جاقسى كورەدى ەكەن. وليمپياداعا اتتانار الدىنداعى سۇحباتىندا ول تۇرىك جازۋشىسى ورحان پامۋكتىڭ شىعارماشىلىعىنا قىزىعۋشىلىق تانىتىپ جۇرگەنىن ايتقان ەدى.
قايرات ءابىلدينوۆ,
«ەگەمەن قازاقستان»
قاراعاندى
فارحاد يبراگيم حاركي
اۋىر اتلەت. سپورت شەبەرى
اقتوبە قالاسى
الماتى تۋريزم جانە سپورت اكادەمياسىنىڭ ستۋدەنتى.
1991 جىلى 20 ساۋىردە قىرعىزستاننىڭ توقماق قالاسىندا تۋعان.
2008 جىلدىڭ قاڭتارىنان بەرى قازاقستان رەسپۋبليكاسىنىڭ ازاماتى.
– وليمپيالىق ويىنداردىڭ قولا جۇلدەگەرى (ريو-دە-جانەيرو, 2016), 62 كگ.
دۇيسەنبى كۇنى اقتوبە اۋەجايىندا جەرگىلىكتى تۇرعىندار وليمپيا ويىندارىنىڭ قولا جۇلدەگەرى, اۋىر اتلەت فارحاد حاركيدى قارسى الدى
. سپورتشىنى اۋەجايدان وبلىس اكىمى بەردىبەك ساپارباەۆ كۇتىپ الدى
.
كەشكى ساعات سەگىز شاماسىندا اۋەجاي الدىنداعى الاڭدا ءان ويناپ, مەرەكەلىك كوڭىل كۇي شارىقتاپ تۇردى. وليمپيادا جۇلدەگەرىنىڭ اقتوبەگە كەلۋىن جاتتىقتىرۋشىلار, سپورت ارداگەرلەرى, جاس سپورتشىلار مەن جانكۇيەرلەر اسىعا كۇتتى. جاستار پاتريوتتىق ناقىشتا جازىلعان پلاكاتتارىن كوتەرىپ: «العا, قازاقستان!», «فارحاد – چەمپيون!», دەپ ۇرانداتۋمەن بولدى.
«ءبىز وليمپيا ويىندارىندا سپورتشىلاردىڭ تارتىستى كۇرەسىن تاماشالاپ, ەلىمىزدىڭ قۇراماسىنا بىرگە جانكۇيەر بولدىق, – دەدى ايماق باسشىسى. – قازاقستان كومانداسى لايىقتى ناتيجە كورسەتىپ, ەكى ءجۇز مەملەكەتتىڭ ىشىنەن 22-ءشى ورىنعا قول جەتكىزدى. بۇل ۇلكەن جەتىستىك. اۋىر اتلەتيكادان قولا مەدالعا يە بولىپ, وبلىسىمىزدىڭ ابىرويىن اسقاقتاتقان فارحاد حاركيدىڭ جەڭىسىنە قاتتى قۋانىشتىمىز. بۇل جەڭىس ۇلكەن جەتىستىكتەردىڭ باستاماسى بولاتىنىنا جانە توكيوداعى كەلەسى وليمپيا ويىندارىندا اقتوبەلىكتەر كەرەمەت ناتيجە كورسەتەتىنىنە سەنەمىز. ءبىزدىڭ بالالارىمىز بەن جاستارىمىز فارحاد سەكىلدى سپورتشىلارىمىزعا ەلىكتەپ, كوبىرەك سپورتپەن شۇعىلدانىپ وليمپيادا, الەم, ەۋروپا جانە ازيا چەمپيوناتتارىندا توپ جارادى دەپ ۇمىتتەنەمىن».
سالتاناتتى شارا قازاقستاننىڭ تۇڭعىش پرەزيدەنتى اتىنداعى ورتالىق مادەنيەت جانە دەمالىس ساياباعىندا جالعاستى. ول جەردە سپورتشىنى قالا اكىمى قۇتتىقتادى.
«فارحادتى جانە اقتوبەلىكتەردىڭ بارلىعىن شىن جۇرەكتەن قۇتتىقتايمىن. وليمپيا ويىندارىندا قازاقستان قۇراماسى 17 مەدال يەلەندى. بۇل ەلىمىز ءۇشىن مەدال سانى جاعىنان رەكوردتىق كورسەتكىش. فارحاد حاركي سەكىلدى سپورتشىلاردىڭ ارقاسىندا ودان دا بيىك جەتىستىكتەرگە قول جەتكىزەمىز دەپ ويلايمىن», دەدى ءىلياس يسپانوۆ.
سونداي-اق, سپورت ارداگەرلەرى قادىرجان ىزعارين مەن ۆلاديمير كورەنكوۆ جانە وبلىستىق بەيبىتشىلىك پەن كەلىسىم كەڭەسى فيليالىنىڭ توراعاسى كەلدىباي ەسپاعامبەتوۆ وزدەرىنىڭ قۇتتىقتاۋ سوزدەرىن جەتكىزدى.
كورسەتىلگەن زور قوشەمەتكە قاراماستان, 25 جاستاعى وليمپيادا جۇلدەگەرى ءوزىن قاراپايىم ۇستادى, نيەت بىلدىرگەندەردىڭ بارلىعىمەن سۋرەتكە ءتۇسىپ, سۇراقتارعا ىنتالانا جاۋاپ بەردى.
«اقتوبەگە مەدالمەن ورالعانىما قاتتى قۋانىشتىمىن. تۋىستارىما, جاتتىقتىرۋشىلار مەن بارلىق جانكۇيەرلەرگە قولداۋ كورسەتكەندەرى ءۇشىن ۇلكەن العىس ايتامىن. بۇل سىزدەردىڭ جەڭىستەرىڭىز! العا, قازاقستان!», – دەپ ۇرانداتتى حالىقتىڭ ىستىق ىقىلاسىنا بولەنگەن سپورتشى.
ايدار ورىسباەۆ,
«ەگەمەن قازاقستان»
