«استانا» – توپتىق كەزەڭدە!

سپورتسۇيەر قاۋىمعا ءسۇيىنشى جاڭالىعىمىز بار. قازاق فۋتبولشىلارى كارى قۇرلىقتىڭ بەلدى تۋرنيرىندە جىل سوڭىنا دەيىن دوپ تەبەتىن بولادى. كەشە, گازەت بەتى قاتتالىپ جاتقاندا فۋتبولدان ەۋروپا ليگاسى اياسىندا ونەر كورسەتەتىن «استانا» كومانداسى سىرت الاڭدا, بەلارۋستىڭ باتە فۋتبول كلۋبىمەن كەزدەسىپ, 2:2 ەسەبىمەن تەڭ ءتۇستى.  توپتىق كەزەڭگە جولداما بەرىلەتىن پلەي-وفف ويىنى بول­عاندىقتان, ەلوردالىق ۇجىم ءا دەگەن­نەن-اق بارىن سالىپ ويناۋعا تالپىنعان. ايتكەنمەن, ستانيمير ستويلوۆ شاكىرتتەرى ءبىرىنشى بولىپ ءوز قاقپالارىنا گول جىبەرىپ الدى. قاقپامىزعا گول سوققان – ميحايل گوردەيچۋك. ءبىر قىزىعى, بەلارۋس شابۋىلشىسى قاراعاندىنىڭ ساران قالاسىنىڭ تۋماسى. ول 18 جاسقا دەيىن اتالمىش قالادا فۋتبولدىڭ قىر-سىرىن مەڭگەرىپ العاننان كەيىن, بەلورۋسسياعا كوشىپ كەتكەن ەكەن. حوش, ەكىنشى كەزەڭدى «استانا» جىگىتتەرى شيراق باستادى. سەرىكجان مۇجىقوۆ, نەمانيا ماكسيموۆيچ جانە پاتريك تۆۋماسي سىندى شەبەرلەرىمىز الاڭ قوجا­يىن­دارىنىڭ قورعاۋ­شى­لارىن ءاب­دەن ساستىردى. سون­داي ۇرىمتال ءسات­تەردىڭ بىرىندە بۇرىشتامادان اسى­رىل­عان دوپ­قا بارىنەن بۇرىن جەت­كەن نەمانيا ماكسيموۆيچ ونى قار­سىلاستار قاقپاسىنا بۇلك ەتكى­زىپ, ەسەپتى تەڭەستىردى. بۇل ويىن­­نىڭ 50-ءشى مينۋتى بولاتىن. ال كەزدەسۋدىڭ 76 مينۋتىندا گانالىق لەگيونەرىمىز پاتريك تۆۋماسي شامامەن 25 مەتردەن سوققى جاسادى. ونىڭ شىرەنە تەپكەن دوبىنا قاقپاشى ارتەم سوروكو ۇلگەرە الماي, ءوز جانكۇيەرلەرى الدىندا پۇشايمان بولدى. ەسەپ – 2:1, «استانا» العا شىقتى. الايدا, ءوز جانكۇيەرلەرى الدىندا ۇياتقا قالماۋدى ويلاعان باتە ويىنشىلارى بارىن سالىپ,  89-مينۋتتا پەنالتي ارقىلى ەسەپتى تەڭەستىردى. يگور ستاسەۆيچ ەسەپتى 2:2 ەسەبىنە جەتكىزگەنىمەن, ارى قاراي ناتيجە وزگەرگەن جوق. وسىلايشا, ستانيمير ستويلوۆ باپتايتىن ەلوردالىق «استانا» ەۋروپا ليگاسىنىڭ توپتىق كەزە­ڭىنە جولداما الىپ, ەۋروكۋبوك جولىنداعى جارىسىن ودان ءارى جالعاستىراتىن بولدى. ايتا كەتەيىك, العاشقى ويىن 2:0 ەسەبىمەن «استانانىڭ» پايداسىنا شەشىلگەن بولاتىن. الماس ماناپ, «ەگەمەن قازاقستان»