باۋىرلاس ەلمەن بايلانىس بەكي تۇسەدى

پارلامەنت ءماجىلىسىنىڭ توراعاسى نۇرلان نىعماتۋلين تۇركيانىڭ قازاقستانداعى توتەنشە جانە وكىلەتتى ەلشىسى نەۆزات ۋيانىكپەن العاشقى رەسمي كەزدەسۋ وتكىزىپ, قازاقستان-تۇركيا ىنتىماقتاستىعىنىڭ وزەكتى ماسەلەلەرىن تالقىلادى, دەپ حابارلادى وسى پالاتانىڭ ءباسپاسوز قىزمەتى. تاراپتار ەكى مەملەكەت باس­شى­لارىنىڭ مەملەكەتتىك ساپار­لارى مەن كەزدەسۋلەرىنىڭ ارقا­سىندا ەكىجاقتى قارىم-قاتى­ناس­تىڭ جىل سايىن جوعارى دەڭگەيدە دامىپ كەلە جاتقانىنا توقتالدى. قازاقستان پرەزيدەنتى نۇر­سۇل­تان نازارباەۆ تۇركيادا ىسكە اسپاي قالعان اسكەري توڭكەرىس جاساۋ ارەكەتىنەن كەيىن العاشقى بولىپ انكاراعا رەسمي ساپارمەن باردى. نەۆزات ۋيانىك ءوز كەزە­گىندە بۇل ساپاردى تۇركيا حال­قى مەن ۇكىمەتىنىڭ وتە جوعا­رى با­عالاعانىن, سونىمەن قاتار, بۇل ساپار الەم الدىندا قازاق­ستاننىڭ قولداۋىن ايعاقتاي وتىرىپ, ناعىز دوستىق پەن باۋىر­لاستىقتى دالەلدەگەنىن ايتتى. ءماجىلىس سپيكەرىنىڭ ايتۋىنشا تۇركيا حالقى وسى كەزەڭدە ءوز باسشىلارىن قولداۋ ارقىلى دەموكراتيالىقتىڭ جوعارى ۇلگىسىن كورسەتىپ, اۋىر سىناقتان لايىقتى ءوتتى. سونىمەن قاتار, ءماجىلىس توراعاسى ەلشىگە جانە بۇكىل تۇركى حالقىنا جانتۇرشىگەرلىك لاڭكەستىك وقيعادان كەيىنگى قايعىلى جاعدايعا بايلانىستى كوڭىل ايتۋ ءبىلدىردى. «قازاقستان لاڭكەستىك ارەكەتتىڭ كەز كەلگەن ءتۇرىن قاتاڭ ايىپتايدى جانە وعان قارسى باتىل كۇرەس جۇرگىزە وتىرىپ, وسى باعىتتا حالىقارالىق قوعامداستىقپەن بەلسەندى ءىس-قيمىل جاسايدى», دەدى ن.نىعماتۋلين. ن.نىعماتۋلين قازاقستان پرە­زيدەنتىنىڭ رەسەي مەن تۇركيا ۇستانىمدارىن جاقىنداس­تىرۋ­داعى ماڭىزدى ءارى سىندارلى ءرولىن العا تارتىپ, قازاقستان ارقا­شاندا تۇركيانىڭ ستراتە­گيا­لىق سەنىمدى سەرىكتەسى ءارى دوسى بولىپ قالاتىنىن اتاپ كورسەتتى. ءوز كەزەگىندە ەلشى نۇرسۇلتان نازارباەۆتىڭ كورەگەن ءارى سا­لي­قالى ساياساتىنىڭ ناتيجەسىندە قازاقستاننىڭ 25 جىلدىق مەرەي­تويعا قارقىندى دامۋ تابىسىمەن كەلگەندىگى بارشا تۇركيالىقتى ءتانتى ەتەتىنىن العا تارتتى. پارلامەنتارالىق بايلانىس ماسەلەسىن دە نازاردان تىس قالدىرماعان كەزدەسۋ يەلە­رى ەكى ەل دەپۋتاتتارىنىڭ ىنتى­ماق­تاستىق جونىندەگى توپتار مەن حالىقارالىق پارلامەنتتىك ۇيىمدار ارقىلى بىرلەسە بەل­سەندى جۇمىس اتقارۋعا دايىن ەكەندىكتەرىن جەتكىزدى.