سۋ سپورتىنداعى سەرپىن

ريو-دە-جانەيرودا وتكەن وليمپيالىق ويىنداردا جالعىز عانا جامپوزى وزا شاپقانىمەن, قازاقستان ءۇشىن ايرىقشا تاريحي ورىن بەلگىلەپ بەرگەندەردىڭ ءبىرى ءجۇزۋ جارىسى بولدى. وسىنداعى جان الىپ, جان بەرىسكەن سايىستا دميتري بالاندين كۇتپەگەن جەردەن 200 مەتر­گە براسس ادىسىمەن ءجۇزىپ جارىسۋدا الدىنا جان سالمادى. الماتىلىق 21 جاسار اقبەرەن وسىمەن بىرگە قازاقستاننىڭ كۇللى سۋ سپورتى تۇرلەرىنەن وليمپيادا چەمپيونى بولعان ءبىرىنشى ساڭلاعى اتاندى. مىنە, ديمانىڭ وسى تابىسى ەندى شىن مانىندە دە ەلىمىزدە سۋدا ءجۇزۋ سپورتىنا ۇلكەن سەرپىن بەرەتىن ءتۇرى بار. وتانداستارى دميتري ءبالانديننىڭ بۇل تولايىم تابىسىن ۇلكەن قۋانىشپەن قارسى الدى. سونىڭ ءبىر ايعاعى بولار, ول ريو تورىندە ەلدىڭ گيمنىن ويناتىپ جاتقان كۇندەردە اقمولا وبلىسىنداعى ءبىر ەلدى مەكەندە ورنالاسقان سپورت باسسەينىنە ونىڭ اتىن بەرۋ تۋرالى ۇسىنىس جاسالىپ جاتتى. ال جاقىن بولاشاقتا ەلىمىزدىڭ باسقا وڭىرلەرىندە دە بالاندين اتىنداعى سپورت كەشەندەرى اشىلىپ جاتسا, ءبىز ەشقانداي تاڭ قالماعان بولار ەدىك. الەم سپورتسۇيەر قاۋىمى سۋدا ءجۇزۋشى دميتري ءبالانديننىڭ ەسىمىن ءبىرىنشى رەت 2014 جىلى وڭتۇستىك كورەيانىڭ ينچحون قالاسىندا وتكەن جازعى ازيا ويىندارى كەزىندە ەستىدى. وسىندا براسس ادىسىمەن ءۇش قاشىقتىق بويىنشا التىن مەدال جەڭىپ العان ول 2015 جىلى وسى ەلدىڭ كۆاندجۋ شاھا­رىندا كەرۋەن كەرگەن جازعى ۋني­ۆەرسيادا بارىسىندا ءبىر التىن, ءبىر قولا مەدالدى ولجالاپ قايتتى. ال وليمپيالىق ويىنداردا توپ جارىپ شىعا كەلۋى ديمانىڭ ەندى ۇزاققا شاباتىنىن ايعاق ەتىپ تۇرعانداي. لايىم, سولاي بولسىن. ەگەر سپورت شەجىرەسىن قايتا ءبىر قوپارىپ, كوز سالا كەلسەك, قازاق­ستاننان شىققان العاشقى سۋدا ءجۇزۋشىنىڭ 1956 جىلى مەلبۋرندا وتكەن وليمپيالىق ويىندارعا ءاتىزىن سالعانىن بايقار ەدىك. سول ويىنداردا الماتىدا تۋىپ-وسكەن گەننادي نيكولاەۆ 4ح200 مەترلىك ەستافەتاعا قاتىسىپ, قولا جۇلدە الدى. بىراق بۇل وقيعانىڭ رەسپۋبليكا تاريحىنا كىرمەي جۇرۋىنە سپورتشىنىڭ جارىسقا ماسكەۋ قالاسى اتىنان قاتىسۋى سەبەپ بولعانعا ۇق­سايدى. بۇدان كەيىن الماتىلىق ۆيكتور ابوي­موۆ دەگەن جۇلدىزىمىز شىعىپ, 1972 جىلى ميۋنحەندە كۇمىس مەدالعا قول جەتكىزدى. بۇدان بولەك, 1973 جىلى جازعى ۋنيۆەرسيادادا چەمپيون اتانىپ, سول جىلى الەم چەمپيوناتىنان كۇمىس جۇلدەمەن ورالدى. ال سەرگەي پيچۋگين دەگەن جۇزگىشىمىز 1986 جى­لى ىزگى نيەت ويىندارىندا – كۇمىس, ەكا­تەرينا ەرماكوۆا 1987 جىلى قولا مەدال الدى. سۋعا سەكىرۋ سپورتىنان الماتىلىق سەرگەي نەمتسانوۆ 1980 جىلى ماسكەۋ وليمپياداسىندا چەمپيوندىق تۇعىرعا كوتەرىلدى. سول ويىنداردا ۆاتەرپولشى سەرگەي كوتەنكو دا چەمپيوننىڭ القاسىن تاقتى. ول 1988 جىلى سەۋلدە قولا جۇلدەنى ەنشىلەدى. بۇلاردان بولەك, ءبىزدىڭ تاۋەلسىزدىك العان جىلدارىمىزدا سۋ دوبىنان ايەلدەر قۇراما كومانداسى 2000 جىلى سيدنەيدە, 2004 جىلى افينادا وتكەن وليمپيالىق ويىندارعا قاتىستى. ونىڭ ەكەۋىندە دە تارازدىق اسەل جاقاەۆا كوماندا كاپيتانى بولىپ ويىندارعا بارىپ قايتتى. كەزىندە كەڭەس وداعى قۇراماسى ساپىندا ەرلان اياپبەرگەنوۆ, اسقار ورازالينوۆ, نۇرلان مەڭدىعاليەۆ سىندى قازاقستاندىق ۆاتەرپولشىلار دا وينادى. مۇنىڭ ءبارىن تىزبەلەپ ايتىپ وتىرعان سەبەبىمىز, سۋ سپورتى تۇرلەرى ءبىزدىڭ رەس­پۋبليكامىز ءۇشىن دە تىم بوتەن ەمەس ەكەندىگىن ءبىلدىرۋ ەدى. ەندى دميتري ءبالانديننىڭ كەرەمەت جەڭىسىنەن كەيىن بۇل سالادا دا سەرپىن بولا تۇسەتىنىنە سەنگىمىز كەلەدى. اقيقاتىن ايتقاندا, بۇل وتە كەرەك نارسە. سەبەبى, جەڭىل اتلەتيكا سىندى سۋدا ءجۇزۋ سپورتى دا كەز كەلگەن وليمپيالىق ويىندار باعدارلاماسىنداعى جۇلدەنى كوپ تاراتاتىن سايىستار ءتۇرى بولىپ تابىلادى. وسى ويىنداردا اقش, ۇلىبريتانيا جانە اۆستراليا سپورتشىلارى وزدەرى العان مەدالداردىڭ ايتارلىقتاي بولىگىن وسى سالادان جينادى. سونىڭ ناتيجەسىندە قورىتىندى كەستەدە الدىڭعى ەكى ەلدىڭ سپورتشىلارى ءبىرىنشى-ەكىنشى ورىندارعا ورنالاسسا, سوڭعىسى وندىقتى تۇيىقتادى. مۇنىڭ ءوزى بۇل سالانىڭ بەرەكەلى ەكەنىن كورسەتەدى. سوندىقتان ەندىگى جەردە ءبىزدىڭ ەلىمىزدە دە سپورتتىڭ وسىنداي جۇلدەنى كوبىرەك اكەلەتىن تۇرىنە قاراي شۇعىل بەتبۇرىس جاسالسا, ابدەن دۇرىس بولار ەدى. سەرىك ءپىرنازار, «ەگەمەن قازاقستان»