اق مارجاندى القاپتا قاۋىرت قيمىل باستالدى

سوناۋ كوكتەمنەن باستالعان شارۋانىڭ تىنىمسىز ەڭبەگى اقتالاتىن ساتكە تايادى. بەلى بۇگىلىپ, كەتپەنى كۇنمەن شاعىلىسىپ ەڭبەك ەتكەن ديقان قاۋىمى ەگىنگە وراق سالدى. ناپاقاسىن جەردەن ايىرىپ, ەلدىڭ يگىلىگى ءۇشىن جۇمىس ىستەپ جاتقان جانداردىڭ باراقاتتى كەزى بۇل. ريزىق-نەسىبەلەرىن شاشپاي-توكپەي جيناپ الىپ, قامباعا قۇيىپ, جۇرتتىڭ پايداسىنا اسىرسا, ودان اسقان باقىت جوق. وتكەن اپتادا ايماق باسشىسى قىرىمبەك كوشەرباەۆ سىرداريا اۋدانىنا جۇ­مىس ساپارىمەن باردى. ال­دى­مەن «اقجارما» شارۋا قوجالىعىندا بولعان وبلىس اكىمى ەگىنگە وراق سالۋ راسىمىنە قاتىسىپ, سىرداريالىق دي­قان­داردىڭ قۋانىشىنا ور­تاقتاستى. ديقاندار ەڭبە­گىنىڭ جەمىسىن كورەتىن ايتۋلى شارادا سوتسياليستىك ەڭبەك ەرى ءساليما جۇمابەكوۆا باتا بەرىپ, ەگىنگە وراق سالۋ ءراسى­مىنىڭ لەنتاسىن قيدى. بيىل «اقجارما» شارۋا قوجالىعى بويىنشا 2300 گەكتار جەرگە كۇرىش, 151 گەك­تار جەرگە ارالاس بيداي جانە 189 گەكتارعا جوڭىشقا ەگىلگەن. شارۋاشىلىق باسشىسى مارات بيسەنوۆ ەگىننىڭ بىتىك شىققانىنا قاراپ, ديقانداردىڭ ەڭبەگى ەسەلەنىپ قايتادى دەپ سەنىم ارتۋدا. بيىلدىڭ وزىندە 151 گەكتار جەرگە ەگىلگەن بيدايدىڭ ءار گەكتارىنان 20 تسەنتنەردەن ءونىم الدى. شارۋاشىلىقتىڭ وندىرىستىك قۋاتىن ارتتىرۋ ماقساتىندا 2012-2016 جىلدار ارالىعىندا 574 ميلليون 25 مىڭ تەڭگە قاراجاتقا تەحنيكالار الىنعان. ماتەريالدىق-تەحنيكالىق بازاسى جاقسارعان شارۋاشىلىق بۇگىندە ەگىن جيناۋ ناۋقانىنا 100 پايىز دايىن. ەگىنشىلىكپەن قا­تار شارۋاشىلىقتا مال ءوسى­رۋ جۇمىستارى دا قولعا الىن­عان. بۇگىندە 260 باس اسىل تۇقىمدى ءىرى قارا كۇتىمگە الىنىپ, تاۋلىگىنە 400 ليتر ءسۇت وندىرىلۋدە. وسى جىلى شا­رۋاشىلىق مال بورداقىلاۋ الاڭىندا 9235 توننا ەت ءوندىرىلدى. ىرگەلى شارۋاشىلىقتىڭ قۋانىشىنا ورتاقتاسقان قىرىمبەك ەلەۋ ۇلى مۇنان سوڭ «دالا كۇنى-2016» وب­لىستىق سەمينار-كەڭەستىڭ پلەنارالىق ماجىلىسىنە قا­تىستى. ايماقتىڭ بار­لىق اۋداندارىنان اۋىل شا­رۋاشىلىعى سالاسىنىڭ ماماندارى ەگىستىكتىڭ باسىندا وتكەن سەمينار-كەڭەسكە جينالىپ, تاجىريبە الماستى. جيىندا ءوڭىر باسشىسى بارشا شارۋالاردى ەگىن جيناۋ ناۋقانىنىڭ باستالۋىمەن قۇتتىقتادى. – بيىل وبلىس بويىنشا بارلىعى 168,5 مىڭ گەكتار جەرگە ءدان ەگىلدى. بۇگىنگى تاڭدا بيداي, جوڭىشقا جينالىپ بولدى. اتالعان داقىلداردان وتكەن جىلعا قاراعاندا مول ءونىم الدىق. بيىل كۇرىشتەن دە گەكتارىنان 55 تسەنتنەردەن ءونىم الامىز دەپ جوسپارلاۋدامىز. كۇزدىك بيدايدىڭ ءار گەكتارىنان – 15,7 تسەنتنەردەن, كوكتەمگى بيدايدىڭ ءار گەكتارىنان – 14,9 تسەنتنەردەن, ال جوڭىشقانىڭ ءار گەكتارىنان – 14,7 تسەنتنەردەن ءونىم جينالدى. مۇنىڭ بارلىعى الا جازدايعى شارۋالاردىڭ ەڭبەگىنىڭ جەمىسى, – دەدى وبلىس اكىمى. باسقوسۋدا وبلىستىق اۋىل شارۋاشىلىعى باس­قار­ما­سىنىڭ باسشىسى باقىت جاحانوۆ اعىمداعى جىلى اۋىل شارۋاشىلىعى بويىن­شا وڭىردە اتقارىلعان جۇ­مىستارعا توقتالدى. سون­داي-اق, سىرداريا, شيەلى, قازالى اۋدانىنىڭ اكىمدەرى ەگىن جيناۋ ناۋ­قانىنا داي­ىندىق بارىسى تۋرالى بايان­دادى. ايتا كەتەيىك, بيىل اي­ماقتا كۇرىش ەگۋ كولەمى وتكەن جىلمەن سالىستىرعاندا 4,4 مىڭ گەكتارعا كەمىگەنىمەن, باسقا  داقىلداردى ەگۋ كولەمى ارتىپ وتىر. اعىمداعى جىلى 79,6 مىڭ گەكتار جەرگە ەگىلگەن كۇرىشتىڭ 60,5 مىڭ گەكتارى جاقسى, ال 16,7 مىڭ گەكتارى ورتاشا دەپ باعالاندى. قازىرگى تاڭدا بارلىق كۇ­رىش القاپتارى ءونىمدى جي­ناۋعا دايىن. جيىندا «اگرو­حولدينگ بايقوڭىر» جشس ديرەكتورى سامۇرات كوپەشوۆ قايتا قۇرىلعان جالاعاش ەلەۆاتورىن كەڭەيتۋ جانە قالپىنا كەلتىرۋ جۇ­مىستارىنىڭ اياقتالۋعا جا­قىن ەكەنىن جەتكىزدى. اتال­عان نىسانعا كۇردەلى ءجون­دەۋ جۇمىستارىن جۇرگىزۋ, استىق تازالايتىن اگرەگاتتار مەن ماشينالار جانە جاڭارتۋ قۇرال-جابدىقتارىن ساتىپ الۋ ماقساتىندا 232 ميلليون 912 مىڭ تەڭگە قاراجات بەرىلىپ, يگەرىلدى. سونىمەن قاتار, وبلىستاعى 27 شارۋاشىلىقپەن جالپى قۇنى 1 ميلليارد 300 ميلليون 215 مىڭ تەڭگەنى قۇرايتىن 22076 توننا كۇرىش سالىسىن ساتۋ جانە ساتىپ الۋ كەلىسىمشارتتارى جاسالدى. بۇگىننىڭ وزىندە استىق تاپسىرۋعا بىرقاتار اۋدانداردان ۇسىنىس كەلىپ وتىر. سەمينار سوڭىندا وبلىس اكىمى ەگىن جيناۋ ناۋقانىمەن قاتار, كەلەسى جىلعى ەگىن ەگۋدىڭ دايىندىق جۇمىستارىن نازاردان تىس قالدىرماۋ كەرەك ەكەنىن جەتكىزدى. سونداي-اق, جيىندا ايماق باسشىسى ەگىن جيناۋ جۇمىستارىن قىركۇيەك ايىنىڭ سوڭىنا دەيىن, ال 2017 جىلدىڭ اۋىل شارۋاشىلىعى داقىلدارىن ورنالاستىرۋ سىزباسىن 1 قاراشاعا دەيىن اياقتاۋدى تاپسىردى. سەمينار-كەڭەستەن كەيىن «اقجارما جانە ك» شارۋا قوجالىعىنىڭ كۇرىش اقتاۋ زاۋىتىن ارالاعان قى­­رىم­­­بەك ەلەۋ ۇلى ونىڭ جۇمى­سىنا جوعارى باعا بەردى. ءدال وسى كۇنى اقجارما اۋىل­دىق وكرۋگىندە كۇرىششى, قو­عام قايراتكەرى بولات نۇرسەيىتوۆ­تىڭ اتىنا الاڭ اشىلىپ, اۋىل­دا مەرەكەلىك شارا ۇيىمداس­تىرىلدى. كۇرىششىلەر بريگاداسىن باسقارعان ول 15 جىل قا­ت­ارىنان مول ءونىم جيناپ, اي­ماقتىڭ اۋىل شارۋا­شىلى­عىن دامىتۋعا زور ۇلەس قوسقان ەدى. ەرجان بايتىلەس, «ەگەمەن قازاقستان» قىزىلوردا وبلىسى