كوپ سالالى كورشىلىك

قازاقستانمەن دوستىق ىنتىماعى جاراسقان, مادەني, رۋحاني بايلانىسى نىعايعان كورشى ەلدەردىڭ ءبىرى – رەسەي. بىرىڭعاي ەكونوميكالىق وداق كەڭىستىگى تۇزىلگەلى قىزىلجار ءوڭىرىنىڭ دە شەكارالاس ايماقتارمەن قارىم-قاتىناسىنىڭ جاندانا تۇسكەنىن اڭعارۋ قيىن ەمەس. جۋىردا ايماق باسشىسى ەرىك سۇلتانوۆ باسقارعان ارنايى دەلەگاتسيا اۋىلى ارالاس, قويى قورالاس قورعان وبلىسىندا بولىپ, ەكىجاقتى مەموراندۋمدارعا قول قويدى. بىرقاتار پايدالى كەلىسىمدەرگە قول جەتكىزدى. وسىندا سولتۇستىكقازاق­ستاندىقتاردىڭ اۋىل شا­رۋا­شىلىعى جارمەڭكەسى ۇيىم­داستىرىلىپ, قورعان­دىقتار «سولتۇستىك قازاق­ستاندا جاسالعان» بەلگىسى بار ونىمدەرگە ەرەكشە قىزى­عۋشىلىق تانىتتى. ساۋدا ورىندارىنا پەتروپاۆل قالاسى مەن اۋدانداردان 12 توننادان استام ءونىم تۇرلەرى قويىلىپ, ىلەزدە ساتىلىپ كەتتى. ولاردىڭ اراسىندا ەت, ءسۇت, جۇمىرتقا, ۇن, بال, شۇجىق, ماكارون, جارما, كونديتەرلىك ونىمدەر ۇلكەن سۇرانىسقا يە بولدى. گۋبەرناتور الەكسەي كوكورينمەن كەزدەسۋدە ەرىك حامزا ۇلى ەلباسىنىڭ سىرتقى الەۋمەتتىك-ەكونوميكالىق وڭ ۇردىستەردى قامتاماسىز ەتۋگە باعىتتالعان سىندارلى ساياساتىنا ەكپىن ءتۇسىرىپ, وڭىردە وندىرىلگەن تاۋارلار مەن ونىمدەردى الىس-جاقىن نارىققا شىعارۋ شەكارالاس ىنتىماقتاستىقتى تەرەڭدەتۋدى كوزدەيتىنىن, ەركىن باسەكەلەستىكتىڭ باستى ولشەمى بولىپ تابىلاتىن ساپا ماسەلەسى ۇنەمى نازاردا ۇستالىناتىنىن, شەكارالاس ايماقتارداعى ساۋدا-ساتتىق اينالىمى جىل باسىنان بەرى 31 ميلليارد تەڭگەنى قۇراپ وتىرعانىن جەتكىزدى. گۋبەرناتور ءوز سوزىندە ءبىر­لەسكەن كاسىپورىندار قۇرۋعا دايىن ەكەندىكتەرىن, وعان ەكى تاراپتىڭ تاجىريبەسى دە, الەۋەتتىك مۇمكىندىگى دە جەتەتىنىن اتاپ ءوتتى. «ارالاسپاسا, اعايىن دا جات». وسىنداي كەزدەسۋ-جۇزدەسۋلەردىڭ پايدالى, تا­عىلىمدى ۇلگىلەرىن «كۋر­گانستالموست» جابىق اكتسيو­نەرلىك قوعامىنىڭ تىنىس-تىرشىلىگىنەن انىق اڭعارۋعا بولادى. ەۋروپا ەلدەرىنە تىرەۋىش مەتالل قۇرىلعىلارىن جەتكىزەتىن بىرەگەي كاسىپورىن قازاقستان نارىعىندا دا تانىمال. ونىڭ وندىرىستىك تسەحتارىندا 2 مىڭ ادام جۇمىس ىستەيدى. «باۋەر» اتتى ەنشىلەس كومپانياسى گاز-مۇناي, قۇرىلىس سالالارىنا قۇرال-جابدىقتار شىعارۋعا ماماندانعان. يليزاروۆ اتىن­داعى «تراۆماتولوگيالىق قايتا قالپىنا كەلتىرۋ جانە ورتوپەديا» رەسەي عىلىمي ورتالىعى دەسە, ەلەڭ ەتپەيتىن جان كەمدە-كەم شىعار. «جاق­سىنىڭ جاقسىلىعىن ايت, نۇرى تاسىسىن» دەمەكشى, اتاقتى اكادەميكتىڭ شاراپاتىن العاندار قازاقستاندا دا جەتىپ ارتىلادى. جىل باسىنان بەرى وسىندا 150 وتانداسىمىز ەمدەلىپ شىقسا, قازىر 13 ناۋقاس شيپا قابىلداۋدا. جىلىنا 10 مىڭعا جۋىق ادام قارالادى ەكەن. بيىل «اكادەميك يليزاروۆ جىلى» رەتىندە جاريالانىپ, مارقۇمنىڭ 95 جىلدىعىن كەڭ كولەمدە اتاپ ءوتۋ بەلگىلەنگەن. سولتۇستىكقازاقستاندىق كاسىپكەرلەر دە بارلىق كۇش-جىگەر, العى ماقسات ساپا كور­سەتكىشىنە باعدارلانعانىن ىسپەن دالەلدەي ءبىلدى. ماسە­لەن, جارمەڭكەگە قىزىل­جار اۋدانىنا قاراستى «الەكري» جشس-ءنىڭ جان-جاق­­تى دايىندىقپەن كەلگەنى بايقالدى. فيرمانىڭ ات­قا­­رۋ­شى ديرەكتورى ليۋد­ميلا مۋحامەدوۆانىڭ ايتۋىنشا, جىلىنا 120 ميلليو­ن جۇمىرتقا ىشكى-سىرتقى نا­رىققا جونەلتىلەدى. بارلىق قوندىرعىلار اۆتوماتتى جۇيەگە كوشىرىلگەن. جىل اياعىنا دەيىن تاۋىقتاردىڭ سانىن ءبىر ميلليونعا دەيىن جەتكىزۋ كوزدەلگەن. «زەنچەنكو جانە ك» كومانديتتىك سەرىك­تەستىگى شەكارالاس وبلىس تۇر­عىندارىن 2,5 توننا ەكولو­گيالىق تازا ءارى تابيعي ءسۇت ونىمدەرىمەن اپتاسىنا ءۇش رەت قامتاماسىز ەتىپ وتىر. ءوز ونىمدەرىن ماسكەۋگە دەيىن جەتكىزەتىن «ۆيكوس» جشس قورعاندىق «ماگنيت», «مەتروپوليس» سەكىلدى ساۋدا جۇيەلەرىمەن تىعىز ارىپتەستىك ورناتقان. سولتۇستىكقازاقستاندىق دە­­لەگاتسيانىڭ جۇمىس ساپارى 16 مەموراندۋمعا قول قويۋ راسىمىمەن قورىتىندىلاندى. سونداي-اق, ونەركاسىپ, اۋىل شارۋاشىلىعى, ءبىلىم, عىلىم, تۋريزم جانە سپورت, دەنساۋلىق ساقتاۋ سالالارىندا ءوزارا ءىس-قيمىل بويىنشا «جول كارتاسىنا» ەرەكشە باسىمدىق بەرىلدى. قورعان وبلىسىندا 15 مىڭعا جۋىق قانداسىمىز تۇراتىنىن ەسكەرسەك, شەك-ارالاس ايماقتاردا دوستىق تامى­رىنىڭ تەرەڭ تۇسىنىستىك دارەجەدە ورنىعۋىنىڭ ماڭى­زى زور. ءومىر ەسقالي, «ەگەمەن قازاقستان» سولتۇستىك قازاقستان وبلىسى سۋرەتتەردى تۇسىرگەن تالعات تىنىباەۆ