بەيبىت الەم باستاماسىن باعالادى

بىرىككەن ۇلتتار ۇيىمىنىڭ باس حاتشىسى پان گي مۋن سەمەي يادرولىق سىناق پوليگونىنىڭ جابىلۋىنا 25 جىل تولۋى قارساڭىندا ارنايى جولداۋ جاريالادى. جولداۋدىڭ ءماتىنى بۇۇ-نىڭ رەسمي سايتىندا ورنالاستىرىلعان. بۇۇ باس حاتشىسى 2016 جىلدىڭ 29 تامىزىندا بۇكىل الەمدە 2009 جىلى قازاقستاننىڭ باستاماسى بويىنشا بۇۇ باس اسسامبلەياسى قابىلداعان قارارعا سايكەس, يادرولىق سىناقتارعا قارسى ءىس-قيمىلدىڭ حالىقارالىق كۇنى اتاپ وتىلەتىنىن قاپەرگە سالادى. بۇل كۇنى بىرىككەن ۇلت­تار ۇيىمىن, وعان مۇشە ەلدەر­دى, ۇكىمەتارالىق جانە ۇكىمەتتىك ەمەس ۇيىمداردى, اكادەميالىق مەكە­مەلەردى, جاستار جەلىسى مەن بۇقا­رالىق اقپارات قۇرال­دارىن يادرولىق سىناقتارعا قاۋىپسىز الەم قۇرۋ جولىنداعى ماڭىزدى قادام رەتىندە تىيىم سالۋ قاجەتتىگىن اتاپ كورسەتەتىن اق­پا­رات­تىق جانە اعارتۋشىلىق ءىس-قيمىلدى بەلسەندى ەتە تۇسۋگە ۇندەيدى. ءوزىنىڭ جولداۋىندا بۇۇ باس حاتشىسى وسى كۇنى بۇكىل الەم سەمەي سىناق پوليگونىنىڭ – 450-دەن استام يادرولىق سىناقتار جاسالعان ورىننىڭ جابىلعانى­نا شيرەك عاسىر تولعانىن اتاپ وتەتىنىن ايتادى. – 2010 جىلى مەن سەمەيدە بولعان كەزىمدە ۋلانعان جەرلەردىڭ ءىزىن, سونداي-اق, سىناق قۇرباندارى مەن ودان زارداپ شەككەندەردىڭ شەشىمدى ءىس-قيمىلدارىن كوردىم. مەن ولاردىڭ يادرولىق قارۋدان ازات بەيبىت الەمگە ۇمتىلىسىن جاقسى تۇسىنەمىن. بارلىق يادرو­لىق سىناقتارعا تىيىم سالۋ وسى قاسىرەتتى مۇرانىڭ تامىرىنا بالتا شاباتىن بولادى, – دەپ مالىمدەيدى پان گي مۋن. – بۇل قارۋسىزدانۋ سالا­سىنداعى باسقا دا باستامالارعا ۇلكەن سەرپىن بەرۋگە جاعداي تۋعىزىپ, وسى باعىتتاعى كوپجاق­تى ىنتىماقتاستىقتى نىعايتا تۇسەتىنىنە سەنىمىم مول. سونداي-اق, تاياۋ شىعىستا يادرولىق جانە باسقا دا جاپپاي قىرىپ-جوياتىن قارۋ تۇرلەرىنەن ازات الەم قۇرۋ باستاماسىن قوسا العاندا, وڭىرلەر دەڭگەيىندە قابىلدانىپ جاتقان قاۋىپسىزدىك سالاسىنداعى قارىم-قاتىناسقا وڭ ىقپالىن تيگىزۋى ىقتيمال, – دەپ جالعايدى ءسوزىن باس ۇيىم باسشىسى. بۇۇ باس حاتشىسى باس اسسامب­لەيا وسىدان 20 جىل بۇرىن قابىل­داعان, بىراق, وكىنىشكە قاراي, ءالى دە كۇشىنە ەنبەي كەلە جاتقان يادرولىق سىناقتارعا جاپپاي تىيىم سالۋ تۋرالى شارتتى بارلىق ەلدەر مەن حالىقتاردىڭ جەدەل قول قويىپ, قابىلداۋى قاجەتتىگى ماسەلەسىن كەزەكتى مارتە كوتەرەدى. سوندا, دەيدى پان گي مۋن, ءبىز يادرو­لىق قارۋدان ازات الەمگە قاراي ىلگەرى قادام جاساي العان بولار ەدىك.