استاناداعى «جاس ۇلان» رەسپۋبليكالىق اسكەري مەكتەبىندە وقۋعا ءتۇسۋ ءۇشىن تالاپ كۇشەيدى. قازىر اسكەري بولعىسى كەلەتىن بوزبالالار كۇن سايىن كەزەڭ-كەزەڭنەن وتۋدە. بيىلعى جىلى وقۋعا ءتۇسۋ ءۇشىن ءبىر ورىنعا 10 ادام ۇمىتتەنىپ وتىر.
2016 جىلى «جاس ۇلان» رەسپۋبليكالىق مەكتەبىنە 52 ادام قابىلدانادى. مەكتەپ باستىعىنىڭ وقۋ جۇمىستارى جونىندەگى ورىنباسارى, پودپولكوۆنيك حاميت بايكەنوۆتىڭ ايتۋىنشا, قازىر 500-تەن اسا بوزبالا قۇجات تاپسىرعان. ەندى ولار ىرىكتەۋدىڭ ءتورت كەزەڭىنەن مۇدىرمەي وتۋلەرى قاجەت. تالاكەرلەر الدىمەن كاسىبي پسيحولوگيالىق, لوگيكالىق ويلاۋ بويىنشا تەستىلەۋدەن وتەدى. سودان كەيىن ولاردىڭ دەنە دايارلىعى مەن دەنساۋلىعى تەكسەرىلەدى. وسىلاردىڭ بارىنەن وتسە, تالاپكەر مانداتتىق كوميسسيانىڭ شەشىمىمەن وقۋعا قابىلدانادى.
سونىمەن بىرگە ول جەتىم بالالارعا, قىزمەتتىك مىندەتتەرىن ورىنداۋ بارىسىندا قازا بولعان اسكەري قىزمەتشىلەر مەن 10 جىلدان استام ۋاقىت اسكەردە قىزمەت ەتىپ كەلە جاتقان ادامداردىڭ بالالارىنا, حالىقارالىق, رەسپۋبليكالىق, پرەزيدەنتتىك وليمپيادالار مەن ءارتۇرلى بايقاۋلاردىڭ جەڭىمپازدارىنا, ۇزدىك ديپلومى, سپورتتىق دارەجەلەرى بار بالالارعا وقۋعا ءتۇسۋ ءۇشىن جەڭىلدىكتەردىڭ جاسالاتىنىن ايتتى.
بىلتىر «جاس ۇلان» مەكتەبىنە قابىلداۋ ەرەجەلەرى وزگەرتىلدى. سول كەزدەن بەرى ورتا مەكتەپتە 9-سىنىپتى بىتىرگەن بالالار قابىلدانىپ كەلەدى. ساعادات نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىنەن 15 جىلدا 600-دەن اسا تاربيەلەنۋشى تۇلەپ شىقتى. بۇگىنگى تاڭدا «جاس ۇلان» مەكتەبىنىڭ كوپتەگەن تۇلەكتەرى شەتەلدىڭ جوعارى اسكەري وقۋ ورىندارىنا ءتۇسىپ, ەلىمىزدىڭ رەسەي فەدەراتسياسى مەن باسقا دا ەلدەردىڭ الەۋەتتى قۇرىلىمدارىندا قىزمەت ەتىپ جاتىر. ولاردىڭ كوبىسى ەلىمىزدىڭ قارۋلى كۇشتەرى اسكەري بولىمدەرىنىڭ كومانديرلەرى. جوعارى وفيتسەرلىك اتاقتارى مەن مەملەكەتتىك ناگرادالارى بار.
داستان كەنجالين
