امەريكا ءباسپاسوزى اقش-تىڭ ۇستەمدىگى اياقتالعانىن مالىمدەدى

امەريكانىڭ بەدەلدى The National Interest باسىلىمى اقش-تىڭ رەسەي ۇستىنەن ۇستەمدىك قۇرىپ كەلگەن ءداۋىرىنىڭ اياقتالعانىن حابارلاپ, ۆاشينگتوننىڭ ءالى ەسكى كوزقاراستىڭ ىقپالىنان ايرىلا الماي وتىرعان جايىن كەلەكەگە اينالدىردى. گازەت مۇنى اقش-تىڭ قازىرگى تاڭداعى گەوساياسي كوشباسشىلىق رولىنە ۇمتىلۋشىلىق نيەتىن مازاق ەتكەن ماقالاسى ارقىلى جەتكىزدى. ماتەريالدىڭ باستى يدەياسى امەريكالىق ۇستەمدىكتىڭ اقىرى كەلىپ جەتكەنىن مالىمدەۋ بولىپ تابىلادى. «اقش ەندى رەسەي مەن قىتاي سياقتى باسقا ۇلى دەرجاۆالارمەن قاتار ءومىر ءسۇرۋدىڭ مۇمكىندىكتەرىن قاراستىرۋى ءتيىس», - دەپ اتاپ كورسەتەدى ماقالا اۆتورلارى. امەريكا ساياساتكەرلەرى جوعارى دەرجاۆالىق پوزيتسياسىن جوعالتىپ الىپ, سوعىستان كەيىنگى كەزەڭدى اڭساپ جۇرگەنىن ءالى كۇنگە مويىنداي الاتىن جاعدايدا بولا الماي وتىر, دەپ جازادى The National Interest ءوزىنىڭ «قارالى» حاباردى جەتكىزگەن ماقالاسىندا. ساراپشىلار قۇراما شتاتتار ساياسي باسشىلىعىنىڭ بۇل ەسكىرگەن كوزقاراسىنىڭ كوپ جاعدايدا ەكىنشى دۇنيەجۇزىلىك سوعىستان كەيىنگى قيراندىلار ۇستىندە جاتقان بۇكىل الەمگە اسكەري-ەكونوميكالىق جانە ساياسي سالالارداعى جاعىنان قولدان جاسالعان ۇستەمدىگىمەن بايلانىستى ەكەنىن اتاپ كورسەتەدى. ماقالادا ۆاشينگتوننىڭ سول جىلداردىڭ وزىندە ستراتەگيالىق ارىپتەستەر رەتىندە ساۋد ارابياسى جانە پاكىستان سەكىلدى ەلدەردى قاراستىرعانى جازىلعان. قۇراما شتاتتاردىڭ كۇللى الەمنىڭ قوجاسى سانالعان جىلدارعا دەگەن ساعىنىش ەلدىڭ باسشىلىعىنا تىنىشتىق بەرەر ەمەس. اقش-تىڭ كوممۋنيستىك پارتياعا قارسى كوتەرگەن يدەولوگياسى ءوزىنىڭ وزەكتىلىگىن جوعالتقان, افريكا مەن تاياۋ شىعىسقا تاڭعان دەموكراتيالىق قۇندىلىقتارى ءوزىن ءوزى اقتاماعان قازىرگى زاماندا امەريكا ۇستەمدىگىنىڭ دە اقىرى كەلىپ جەتتى, دەپ تۇيىندەيدى ماقالا اۆتورلارى. مۇرات ايتقوجا