اۋىلدا تاۋار وندىرۋشىلەر 71,1 ملرد. تەڭگە قارجى الادى

بيىل كوكتەمگى ەگىس جانە جيناۋ جۇمىستارىن قارجىلاندىرۋ ءۇشىن «قازاگرو» حولدينگىنە 60 ملرد. تەڭگە سوماسىندا بيۋدجەتتىك نەسيە بەرىلدى, ول حولدينگتىڭ ەنشىلەس ۇيىمدارى مەن ەكىنشى دەڭگەيلى بانكتەردىڭ اراسىندا ءبولىندى, دەپ مالىمدەدى ۇكىمەتتىڭ بۇگىنگى سەلەكتورلىق وتىرىسىندا «قازاگرو» حولدينگى» اكتسيونەرلىك قوعامىنىڭ ەگىن جيناۋ جۇمىستارىنا دايىندىق بارىسى تۋرالى بايانداعان اۋىل شارۋاشىلىعى ءمينيسترىنىڭ ءبىرىنشى ورىنباسارى قايرات ايتۋعانوۆ. ونىڭ ايتۋىنشا, «قازاگرو» حولدينگى اۋىل شارۋاشىلىعى تاۋارىن وندىرەتىن 3420 زاڭدى تۇلعانى بيۋدجەتتىك نەسيە قاراجاتى جانە بيۋدجەتتەن تىس قارجى كوزدەرىنىڭ ەسەبىنەن جالپى سوماسى 71,1 ملرد. تەڭگەگە  قارجىلاندىرعان. «مامانداندىرۋ جانە ەگىستىك الاڭىنا ءداندى داقىلدار ەگۋدەگى ۇلەس بويىنشا قاراجاتتى يگەرۋ كەزىندە سولتۇستىك قازاقستان, اقمولا جانە قوستاناي وبلىستارىنىڭ اۋىل شارۋاشىلىعى تاۋارىن وندىرۋشىلەر بەلسەندىلىك تانىتتى. «قازاگروقارجى» اكتسيونەرلىك قوعامىنىڭ جەلىسى بويىنشا اۋىل شارۋاشىلىعىنا قاجەت ەگىستىك تەحنيكالارىن ساتىپ الۋعا 15,2 ملرد. تەڭگەگە 954 قارجى ليزينگى شارتى جاسالىپ, 594 تراكتور, 131 تۇقىم سەپكىش جانە باسقا دا ەگىستىك تەحنيكاسى جەتكىزىلدى. 503 ورۋ-جيناۋ تەحنيكاسىن ساتىپ الۋ ءۇشىن 9,2 ملرد. تەڭگە جۇمسالدى, سونىڭ ىشىندە 7,3 ملرد. تەڭگەگە 160 بىرلىك كومباين ساتىپ الىندى», – دەدى ۆيتسە مينيستر. دينارا بىتىكوۆا