قوعامنان وقشاۋلانبايدى

«اردوس-جۇرەك» مۇگەدەكتەر بىرلەستىگىنىڭ باستاماسىمەن «ينك­ليۋزيۆتى ءبىلىم – بولاشاققا باستار جول» جوباسىنىڭ تۇساۋى كەسىلدى. قالالىق دەمالىس ورىندا­رىنىڭ بىرىندە ورنالاسقان وقۋ-دامىتۋ لاگەرىندە بۇگىندە 50-گە جۋىق ءجۇرىپ-تۇرۋى قيىن بالالار ءتۇرلى پايدالى ىستەرمەن شۇعىل­دانادى. قازاقستاننىڭ ءبىرىنشى پرەزيدەنتى قورىنىڭ قولداۋىنا يە بولعان جوبانى جۇزەگە اسىرۋ­شىلاردىڭ ءبىرى – «اردوس-جۇرەك» مۇگەدەكتەر ۇيىمىنىڭ جەتەكشىسى اقجان كارىمنىڭ ايتۋىنشا, باعدارلامانى قارجىلاندىرۋعا 2 ميلليون تەڭگە گرانت جۇمسالىپ, ونىڭ اياسىندا ينتەراكتيۆتى سەمينارلار, ترەنينگتەر, مۋزىكالىق, ارت جاتتىعۋلار, ويىن تەراپيالارى جۇمىس ىستەيدى. اقجان ءوزىنىڭ ءتۋابىتتى مۇگەدەكتىگىنە قاراماستان قيمىلى شيراق. – اياق-قولى ءبۇتىن, دەنساۋلىعى جاق­سى قاتارلاستارىنا قاراعاندا, مۇمكىندىگى شەكتەۋلى بالالار وزدەرىن كەم سەزىنىپ, جا­سقان­شاقتاپ تۇراتىنى جاسىرىن ەمەس. وسىنداي الەۋمەتتىك تەڭسىز­دىكتەرگە جول بەرمەس ءۇشىن ينك­ليۋزيۆتى ءبىلىم بەرۋدىڭ ارتىق­شىلىقتارىن پايدالانۋ, ەڭ باستىسى, كىشكەنتاي تۇلعانىڭ جان-جاعىنا قىزىعۋشىلىق, قورشاعان ورتاعا بەيىمدەلۋ سياقتى قابىلەت-قارىمدارىن اشىپ, قالىپتاستىرۋ – باستى ماق­ساتىمىز, – دەيدى پسيحولوگ مامان عاليا بايازيتوۆا. وسىندا ەكى ۇلىن ەرتىپ اكەلگەن اتا-انالاردىڭ ءبىرى تاتيانا پيپۋس قوعامدىق ۇيىمعا دەگەن ريزا­شىلىعىن جاسىرمايدى. قىزىلجار وڭىرىندە قولعا الىنعان قاناتقاقتى باعدارلامانى ۇيىمداستىرۋشىلار كەلەشەكتە مەكتەپ باعدارلاماسى شەڭ­بەرىندە ۇيدە ءبىلىم الاتىن ءمۇم­كىندىگى شەكتەۋلى بالالاردى ونلاين وقىتۋ جۇيەسىمەن قامتۋدى كوزدەپ وتىر. مۇنداي ساناتتاعى بال­دىر­عانداردىڭ سانى 150-گە جۋىق. ءومىر ەسقالي, «ەگەمەن قازاقستان» سولتۇستىك قازاقستان وبلىسى