اتاكاسىپكە العاش رەت ەسكەرتكىش قويىلدى

ەلىمىزدە العاش رەت شوپان اتاعا ارنالعان ءمۇسىن قويىلدى. تاۋەل­­سىزدىكتىڭ 25 جىلدىعىنا وراي, بەس­قاراعاي اۋدانىنىڭ ورتالى­عىندا, ومبى-مايقاپشاعاي كۇرە جولىنىڭ بويىندا ورنالاسقان ەسكەرتكىشكە زەر سالساڭىز, ءبىر قولىنا جاڭا تۋعان قوزىنى كوتەرىپ, ەكىنشى قولىنا تاياعىن ۇستاعان قاراپايىم ەڭبەك ادامىنىڭ بەينەسىن كورەسىز. الدىنا جايىلىپ جۇرگەن ورىستەگى قويلارى مەن ونى كۇزەتكەن ءيتىنىڭ جايعاسۋى دا شىنايى شىققان كومپوزيتسيالىق شەشىم. بۇل – عاسىردان-عاسىرعا جالعاسىپ, اتادان بالاعا مۇرا بولىپ كەلە جاتقان بابا كاسىبىنە دەگەن قۇرمەت. تاس تۇعىرىنا « ۇلى دالا ەڭبەك­كەرلەرىنىڭ داڭقى ارتا بەرسىن!» دەگەن ءۇرانسوز جازىلعان ەسكەرتكىشتىڭ بوي كوتەرۋىنە وسى ءوڭىردىڭ تۋماسى, مەتسەنات قايرات يتەمگەنوۆ دەمەۋشىلىك كورسەتكەن ەكەن. بۇل كۇنى اتىمتاي ازامات سونىمەن بىرگە اۋدان ورتالىعىندا سوڭعى جىلدارى جەمىستى جۇمىس ىستەپ كەلە جاتقان اۋماقتىق وڭالتۋ ورتالىعىنا شەتەلدىك شاعىن اۆتوبۋستى سىيعا تارتتى. – بەسقاراعايلىقتار ءۇشىن قوي شارۋاشىلىعى تاڭسىق ەمەس. كە­زىندە بۇل ولكەدە 200 مىڭنان استام قوي وسىرىلگەن. اتاكاسىپتىڭ داڭقىن اسىرعان اتاقتى شوپاندارىمىز دا بولدى. قاراپ تۇرساق, ەلىمىزدە مەتاللۋرگتەر مەن كەنشىلەرگە, مەحا­نيزاتورلارعا, باسقا دا ماماندىق يەلەرىنە ارنالعان ەسكەرتكىشتەر بولعانىمەن, شوپاننىڭ ءمۇسىنى ەش جەردە بوي كوتەرمەپتى. سوندىقتان, دالا توسىندە مىڭعىرتىپ مال وسىرگەن ەڭبەككەرلەرىمىزدى قۇرمەت­تەۋ – ءبىزدىڭ پارىزىمىز, – دەدى اۋدا­ن اكىمى نۇرجان توقسەيىتوۆ. اۋدانداعى قوعام بەلسەندىسى, زەينەتكەر ۆلاديمير كازينسكي قا­زاقتىڭ دارحان دالاسىن ايگىلەگەن شوپاندارعا قۇرمەت كورسەتۋ ەلباسى ساياساتى مەن ەلدىڭ بەرەكە-ءبىرلى­گىنىڭ جەمىسى ەكەنىن اتاپ ءوتتى. اتالعان شارا اياسىندا اۋدان ورتا­لى­عىندا مەرەكەلىك كونتسەرت, اۋىل­شارۋاشىلىق ونىمدەرىنىڭ جارمەڭكەسى ءوتتى. دۋمان اناش, «ەگەمەن قازاقستان» شىعىس قازاقستان وبلىسى, بەسقاراعاي اۋدانى