اباقتىمەن قوشتاسۋعا اسىقپاپتى

ءىستى بولىپ, تەمىر توردىڭ ار جاعىنا تۇسكەندەردىڭ باستى ارمانى, ارينە, بوستاندىق بولسا كەرەك. دەگەنمەن, تار قاپاستان شىعۋدان باس تارتىپ, تۇرمە تورىندە كوبىرەك ءجۇرۋدى قالايتىن جاندار دا بارشىلىق ەكەن.   بالكىم, مۇنداي بەيعام جان­داردىڭ وتباسى, ورتاسى جوق, ءتىر­شىلىگىن تۇرمەمەن ءبىرجولاتا بايلانىستىرعان قانى بۇزىلعان قانىپەزەرلەر بولار دەپ ويلاپ وتىرعان بولارسىز. جوق, ءبىز اڭگىمە ەتكەلى وتىرعان ماقسات ىقىلاسوۆ – اتا-اناسى بار, كا­دىمگى تولىققاندى وتباسىنان شىققان جان. تاراز قالاسىنداعى تۇرمە­لەردىڭ بىرىندە جازاسىن وتەپ جۇرگەن ماقساتتىڭ وسىدان جەتى اي بۇرىن بوستاندىققا شىعۋعا مۇمكىندىگى بولىپتى. ياعني, جەر­گىلىكتى سوت ونىڭ مەرزىمىنەن بۇرىن بوساپ شىعۋ تۋرالى ءوتىنىشىن قانا­عاتتاندىرعان. بىراق ءدال وسى كەزدە سوتتالۋشىلاردىڭ ارا­سىندا فۋتبولدان چەمپيونات ءوتىپ جات­قان بولاتىن. دوپ دوداسىنىڭ ناعىز قىزعان كەزىندە كومانداسىن تاستاپ كەتۋگە ءداتى بارماعان ماقسات بوستاندىققا شىعۋدان باس تارتادى. مۇنى ەندى قاسىنداعى جولداستارىنا دەگەن ادالدىق دەيمىز بە, جوق, الدە جاي عانا دوپقا دەگەن قۇمارلىق دەيمىز بە, ايتەۋىر, ماقسات ءوز ماقساتىنا جەتتى. فينالدا اتوي سالعان ونىڭ كومانداسى ەڭ ۇزدىك اتانىپ, ءبىرىنشى ورىنعا يە بولىپتى. الەمدە فۋتبول فانات­تارى­نىڭ نەبىر قيتۇرقى ارە­كەتتەرى تۋرالى ەستىپ-ءبى­لىپ ءجۇرمىز. بىراق دوڭگەلەك دوپ ءۇشىن اباقتىدان شى­عۋعا اسىق­پاعان جاندار تەك شەتەل­دىڭ شىتىرمان كينولارىن­دا عانا كەزدەسسە كەرەك. پرو­كۋرورلار م.ىقى­لاسوۆتىڭ سوتقا مەرزىمىنەن ەرتە شىعۋ تۋرالى ءوتىنىشىن قايتا جولداپ, ناتيجەسىندە تۇرمە باس­شى­لىعى تاراپىنان مىنەز-قۇل­قى وڭ باعالانىپ, تەك ماقتاۋ ال­­­عان م.ىقى­­­لاسوۆ جاقىندا بوستاندىققا شىقتى. ورالحان ءداۋىت, «ەگەمەن قازاقستان» جامبىل وبلىسى