قازاقستاندىق اتقىشتار ۇزدىك اتاندى

كەشە قازاقستاننىڭ «گۆاردەيسك» پوليگونىندا «ارتيللەريالىق وق اتۋ شەبەرلەرى» – «تۇنگى سپرينت» بايقاۋىنىڭ ەكىنشى كەزەڭى باس­تالدى. ارميا ويىندارى شەڭبەرىندە بۇل تۇنگى ۋاقىتتا وتكىزىلگەن العاشقى سايىس. تارتىس كۇردەلى بولدى.  جاۋىن­گەرلىك قالىپتا تۇنگى كورۋ پريبورلارىمەن جۇرگىزۋ, مينا­ات­قىشتان, گراناتااتقىش پەن اۆتو­مات­تان نىسانالارعا ءدوپ تيگىزۋ – مۇنىڭ بارلىعىن قازاقستان, رەسەي, قىتاي, قىرعىزستان جانە ۆەنەسۋەلانىڭ اتقىشتارىنا العاش رەت تۇنگى مەزگىلدەگى بايقاۋدا ورىنداۋعا تۋرا كەلدى. اسكەري قىزمەتشىلەر 2ب11 مينا­ات­قىشىنان, تۇنگى كوزدەۋىش­تەرى بار رپگ-7ۆ جانە اك-74-تەن وق اتتى. مي­نااتقىشتان وق اتۋ راديۋسى 15 مەتر جەكە قۇرامعا ارنالعان تاسالارى بار ارنايى دايىن­دالعان وردان جۇرگىزىلدى. مەجەگە ءدوپ تيگىزۋ ءۇشىن ءاربىر كومانداعا ءۇش مي­نادان بەرىلدى.  اربىر ءمۇلت كەتكەن وققا ءبىر ايىپ شەڭبەرى قوسىلىپ وتىردى. وق اتۋلار نىسانانى ۇزدىكسىز جارىقتاندىرۋ ءۇشىن بەلگىلەنگەن قارقىنمەن «وڭتۇستىك» وڭىرلىك قول­باسشىلىعىنىڭ 85395 اسكەري ءبو­لىمىنىڭ د-30 122 مم گاۋبيتسالارىنىڭ اتىس ەسەپتوپتارىمەن جۇرگىزىلدى. تۇنگى جاعدايدا وق اتۋ ءۇشىن قاتىسۋ­شى­لارعا قازاقستاندىق «اسەلسان» ءوندىرىسى­نىڭ تۇنگى كورۋ كوزدەۋىشتەرى ۇسىنىلدى. وپتيكا مەرگەندەرگە تۇنگى ۋاقىتتا وق اتۋعا, سونىمەن قاتار, سايىستىڭ كەيبىر ساتتەرى­نىڭ ءتۇسىرىلىمىن جۇرگىزۋگە مۇمكىندىك بەر­دى. بيىلعى جىلى ويىندار قازاقستان رەسپۋبليكاسى قورعانىس مينيسترلىگىنىڭ رەسمي سايتى ارقىلى العاش رەت تىكەلەي ەفير­دە كورسەتىلگەنى دە ەرەكشە بولدى. قازاقستاننىڭ مينااتقىش ەسەپ­توپ­تارى تۇنگى جاعدايدا بار­لىق كە­دەرگىلەردى ويداعىداي ەڭسەرىپ, بارىنشا جىلدامدىقتا مارە سىزىعىنا جەتتى. بايقاۋدىڭ ەكىنشى كەزەڭىنىڭ قو­رىتىندىسى بويىنشا قازاقستاننىڭ كومانداسى ۇزدىك اتاندى. ەكىنشى ورىن­عا رەسەي تۇراقتادى, ءۇشىنشى ورىندى قىرعىزستاننىڭ كومانداسى ەنشىلەسە, ءتورتىنشى ورىندى ۆەنەسۋەلا مىسە تۇتتى. قازاقستاننىڭ كومانداسى جەت­كىلىكتى دەڭگەيدە دايىندال­عانىن ايتا كەتكەن ءجون. بايقاۋدىڭ باسىنان باستاپ قا­زاق­ستاندىق ارتيللەرياشىلار جوعارى ناتيجەلەر كورسەتىپ, بارلىق سىناقتاردا وزدەرىن سەنىمدى ۇستاۋدا.  «ەگەمەن-اقپارات» سۋرەتتەردى تۇسىرگەندەر اقادىل رىسماحان, التىنبەك قارتاباي