بۇگىن «ەگەمەن قازاقستان» گازەتىنىڭ رەداكتسياسىندا قىتاي حالىق رەسپۋبليكاسى تسزيانسۋ پروۆينتسياسىنان كەلگەن دەلەگاتسيا قوناقتا بولدى. باس باسىلىمنىڭ جۇمىسىمەن تانىسۋ ءۇشىن ارنايى اتباسىن بۇرعان ازاماتتاردىڭ ىشىندە اتالعان پروۆينتسيانىڭ ورتالىق تەلەارناسى باسشىسىنىڭ ورىنباسارى سيۋ گران فەن, تسزيانسۋ پروۆينتسياسىنداعى حالىق ۇكىمەتى ءباسپاسوز ورتالىعىنىڭ كەڭەسشىسى تان تسزيان, پروۆينتسياداعى جازۋشىلار اسسوتسياتسياسى توراعاسىنىڭ ورىنباسارلارى ە چجاو يان مەن چۋ فۋ تسزين, سونداي-اق سينحۋا گازەتىنىڭ, ليانيۋنگان قالالىق تەلەارناسىنىڭ جۋرناليستەرى بار ەكەن.
گازەت باسشىلىعىمەن كەزدەسكەن قىتايلىق دەلەگاتسيا «ەگەمەننىڭ» اقپارات كەڭىستىگىندەگى ورنى مەن ماڭىزىنا ايرىقشا قىزىعۋشىلىق تانىتىپ, الداعى ۋاقىتتا اقپاراتتىق ارىپتەستىك ورناتۋعا ىنتالى ەكەندەرىن ءبىلدىردى. «قازاقستانداعى «نۇرلى جول» مەن قىتايداعى «جاڭا جىبەك جولى» باعدارلامالارى اياسىندا ساۋدا-ەكونوميكالىق قارىم-قاتىناس دامىپ جاتىر. ءبىز سونىمەن قاتار, ەكى ەلدىڭ اراسىندا مادەني-رۋحاني بايلانىستاردى دا ىلگەرىلەتكىمىز كەلەدى. سول ماقساتپەن دەلەگاتسيا قۇرامىندا جۋرناليستەرمەن بىرگە تانىمال قىتاي جازۋشىلارىن دا الا كەلدىك», – دەدى سيۋ گران فەن. ول سونداي-اق ەكى ەل باسىلىمدارى اراسىندا بولاشاقتا تاجىريبە الماسۋ ماسەلەسىن جولعا قويۋعا بولاتىنىنا سەنىم ءبىلدىردى.
د.قىدىرالى كەزدەسۋ سوڭىندا قازاق ءباسپاسوزىنىڭ قارا شاڭىراعىنا ارنايى باس سۇققان شەتەلدىك قوناقتارعا العىس ايتىپ, شاعىن سىي-سياپات جاسادى.
ءلايلا ەدىلقىزى
سۋرەت: ەرلان وماروۆ
