وليمپيادانىڭ باستالۋىنا
7 كۇن قالدى
جەتى كۇن. تۋرا ءبىر اپتا. قۇداي قالاسا, ەندى ءبىر جەتىدەن كەيىن ءبىز ريو اسپانىندا جارقىراپ جانعان الاۋدى دا, سونىڭ الدىندا باستالاتىن جاھاندىق جارىستاردى دا كورەتىن بولامىز. بۇل – ءتورت جىلدىق تسيكلدەن تۇراتىن كەزەكتى وليمپيالىق ويىنداردىڭ بۇگىنگى كۇننىڭ شىندىعىنا اينالعانىن كورسەتىپ بەرەدى. ءبىزدىڭ بۇل وليمپيادادان دا كۇتەرىمىز كوپ. سوندىقتان, قازاق ەلىنىڭ نامىسىن قورعاعالى بارا جاتقان سپورتشىلارىمىزعا ساتتىلىك تىلەيمىز.
مىرزاعالي ايتجانوۆ:
«مەجەمىز – ەكى التىن مەدال»
بەيسەنبى كۇنى تاڭ سىبىرلەپ اتقاندا, بوكستان قازاقستان ۇلتتىق قۇراماسى وليمپيادا ويىندارىنا اتتاندى. الىس ساپار الدىندا قۇرامانىڭ باس جاتتىقتىرۋشىسى مىرزاعالي ايتجانوۆپەن كەزدەسىپ, سوزگە تارتىپ ەدىك.
– مىرزاعالي قۇلان ۇلى, ەل سەنىمىن مويىندارىڭىزعا «جۇكتەپ», ءتورت جىلدا ءبىر وتەتىن ءدۇبىرلى دوداعا اتتانعالى وتىرسىزدار. اۋەلى دايىندىقتان باستاساق. ءيسى قازاق ءۇمىت ارتقان جۇرەكتى دە بىلەكتى جىگىتتەرىمىزدى سپورتتىق باپتارىنا كەلتىرۋ وڭاي ءىس ەمەس ەكەندىگىن بىلەمىز.
– دايىندىق بەكىتىلگەن جوسپار بويىنشا ءوتتى. بۇل – بىرنەشە كەزەڭنەن تۇراتىن, جۇيەلى تۇردە جوسپارلانعان, ۇزاق مەرزىمدى جۇمىس. قازىر سوڭعىسىن, ياعني ءادىس-ايلا, ءتاسىل-تاكتيكا دايىندىقتارىن جەتىلدىرۋ جۇمىستارىن اياقتاپ قالدىق. بۇعان دەيىن الاتاۋ باۋرايىندا, ياعني تاۋلى جەردە, تازا اۋادا كۇش-قۋات تولىقتىرۋ جۇمىستارىن وتكىزىپ كەلدىك. استاناعا كەلگەن سوڭ بىزگە قانات يسلام باۋىرىمىز الىپ كەلگەن كاسىپقوي بوكسشىلار قوسىلدى. سولارمەن بىرگە جاتتىعىپ, سپاررينگتىك كەزدەسۋلەر وتكىزدىك.
جالپى, دايىندىق جۇمىستارىنىڭ ءبارى دە ويداعىداي ءوتتى. جىگىتتەردىڭ كوڭىل-كۇيلەرى جاقسى. ءبارى دە جاۋاپكەرشىلىك جۇگىنىڭ قانشالىقتى ماڭىزدى دا اۋىر ەكەندىگىن بىلەدى. ريوعا بارىپ, ءبىر اپتاداي دايىندىعىمىزدى پىسىقتاپ, ەڭ باستىسى, جىگىتتەردى جەرگىلىكتى كليماتقا جەرسىندىرىپ الۋدى جوسپارلاپ وتىرمىز. جىگىتتەردىڭ ءبارى 5 تامىزدا تارازىعا تۇسەدى. سودان سوڭ – جەرەبە.
– ەندىگى ماسەلە – جوسپار. ەكى التىن الامىز دەپ جۇرگەندەرىڭىزدى ەل بىلەدى...
– قۇداي قالاسا, ەكى التىن مەدال الامىز دەپ وتىرمىز. بىراق ءبىز عانا ەمەس, وليمپيادا شارشى الاڭىندا باق سىنايتىن وزگە ەلدىڭ بوكسشىلارى دا ساف التىندى ارماندايدى. مۇنى دا ۇمىتپاۋىمىز كەرەك. ءوزى 10 التىن عانا. تۋرا سونشا كۇمىس پەن 20 قولا ساراپقا سالىنادى. ال بوكسشىلار سانى – 250. ءبارى دە مەدالدان دامەلى. وسىنىڭ ءبارىن ەسەپكە الىپ, ءوزىمىزدىڭ شاما-شارقىمىزدى ەسكەرىپ, ەكى التىن جۇلدە الامىز دەگەن ويىمىز بار. بىراق بۇل ءبىزدىڭ مۇمكىندىكتەرىمىزدىڭ شەگى ەمەس. التىن سانىن ەكەۋ دەپ جۇرگەنىمىزبەن, اتا-بابالارىمىز ايتىپ كەتكەندەي, ارىق ايتىپ سەمىز شىعۋدى ويلاپ ءجۇرمىز.
– ال جالپى مەدال سانى قانشا بولادى دەپ جوبالاپ وتىرسىزدار؟
– ءتورت-بەس مەدال, ونىڭ ەكەۋى – التىن.
– وسى جۇلدەلەردى جەڭىپ الۋعا قاي بوكسشىلارىمىزدىڭ مۇمكىندىكتەرى مول؟
– بوكسشىلارىمىزدىڭ سوڭعى كەزدەردەگى كورسەتكىشتەرىنە قاراپ, قول جەتكىزگەن جەتىستىكتەرىن ەسكەرە وتىرىپ, قايسىسىنىڭ مۇمكىندىگى مولىراق ەكەندىگىن ايتۋعا بولادى. بىراق سونىڭ وزىندە ەشكىمدى دە بولە-جارا ايتقىمىز كەلمەيدى. نەگە؟ سەبەبى, بارلىعى بىردەي جۇمىس اتقارىپ جاتىر. ءارى بۇل – وليمپيادا. ال مۇندا ءارتۇرلى جاعدايلار بولادى. «التىن الادى» دەپ, سەنىم ارتىپ وتىرعان جىگىتتەردىڭ جولدارى بولماي, باسقا بوكسشىلاردىڭ ايى وڭىنان تۋىپ, چەمپيون بولىپ جاتادى. سوندىقتان, بۇل سۇراعىڭىزعا «كىمنىڭ باعى مەن بابى قاتار شابادى, سول التىن الادى» دەپ جاۋاپ بەرگىم كەلەدى.
– جاتتىعۋ جۇمىستارىندا تەك قازاقشا سويلەيسىز. از دا بولسا, قۇراما ساپىندا وزگە ۇلت وكىلدەرى دە بار عوي. سولارعا تۇسىنىكتى بولسىن دەپ, ورىسشا دا سويلەمەيسىز بە؟
– بۇل قازاق ەلىنىڭ ۇلتتىق قۇراماسى ەمەس پە؟! سوندىقتان, قازاقشا سويلەيمىن. جاتتىعۋ جۇمىستارىنىڭ ءبارىن دە قازاق تىلىندە جۇرگىزەمىن. ءبىز قازاقتىڭ نامىسىن قورعايمىز. باسقا ەلدىڭ ەمەس! سول سەبەپتى, انا تىلىمىزدە سويلەيمىز. ءبارى دە تاربيەدەن باستالادى دەيدى. تاڭەرتەڭ تۇرعان بەتتە ساپقا تۇرىپ, ءانۇرانىمىزدى شىرقايمىز. ءبارى دە جاتقا بىلەدى. ەڭ اۋەلى, ءبىر-ءبىرىمىزبەن قازاقشا امانداسامىز.
– «وسى جىگىتتىڭ جولى بولمادى-اۋ, وليمپياداعا بارا المايتىن بولدى» دەپ, وكىنىش بىلدىرەتىن ەلدە كىم قالاتىن بولدى؟ ءسىز ءۇشىن «قاپ, اتتەگەن-اي» دەپ, قىنجىلاتىن بىرەۋ-مىرەۋ بار ما؟
– جوق. ۇزدىكتەردىڭ ءبارى دە – ۇلتتىق قۇراما ساپىندا. وليمپيادا جولداماسىن ناعىز ۇزدىك بوكسشىلارىمىز جەڭىپ الدى.
اڭگىمەلەسكەن
نۇرعازى ساساەۆ
استانا
وليمپيادا قالاشىعى اشىلدى
وتكەن اپتانىڭ سوڭىندا ريو-دە-جانەيرودا وليمپيادا قالاشىعى رەسمي تۇردە اشىلدى. بۇعان ارنالعان سالتاناتتى ءراسىمدى ريو-2016 ۇيىمداستىرۋشى كوميتەتى جۇرگىزىپ, كوماندالار وكىلدەرىنە قالاشىقتى تانىستىردى.
جاڭادان سالىنعان اۋداندا وليمپياداعا كەلگەن سپورتشىلار مەن ولاردىڭ جاتتىقتىرۋشىلارى, سونداي-اق سپورت دەلەگاتسياسىنىڭ مۇشەلەرى ورنالاسادى. قازىردىڭ وزىندە مۇندا سپورتشىلاردىڭ الدىڭعى لەگى كەلىپ ۇلگەردى. دەگەنمەن, ولاردىڭ بىرقاتارى قالاشىق ۇيلەرىنە كوڭىلدەرى تولمايتىندارىن جەتكىزىپ تە جاتىر. بۇعان كەيبىر قۇرىلىس نىساندارىنىڭ تولىق بىتە قويماعانى سەبەپ بولعان سياقتى. سول سەبەپتى, بارعان تۋريستەر مەن ماماندار اراسىندا مۇندا ورنالاسۋدان باس تارتىپ جاتقاندارى دا بار كورىنەدى.
ايتۋلى الامانعا الەمنىڭ تۇكپىر-تۇكپىرىنەن كەلگەن سپورت دەلەگاتسياسىنىڭ دەمالىپ, تىنىعۋىنا ارنالعان قالاشىقتا بارلىعى 31 نىسان بوي كوتەرگەن. ويىندار كەزىندە مۇندا 18 مىڭ ادامعا دەيىن جايعاسا الادى. ولارعا شامامەن 13 مىڭ ادام قىزمەت كورسەتەدى. مۇندا سپورت زالى, دەمالىس ايماعى, سۇلۋلىق سالونى مەن ءدىني ورتالىقتار جانە زاماناۋي ۇلگىدە جابدىقتالعان مەديتسينالىق ورتالىق پەن 5 مىڭ ادامعا ارنالعان اسحانا بار.
سەرىك ءپىرنازار,
«ەگەمەن قازاقستان»
نيدجاتتىڭ نيەتى
ەل نامىسىن ءتۇرلى حالىقارالىق سايىستاردا قورعايتىن اۋىل اتلەتتەر قاتارىنا قوسىلعان ءزىلتەمىرشىنىڭ ءبىرى – نيدجات راگيموۆ. بۇرىن-سوڭدى ەل سپورتشىلارى اراسىندا اتى ەستىلمەگەن بۇل اتلەت كىم ەدى؟ ارينە, وسى ساۋالعا جاۋاپ ىزدەگەندە, الدىمەن ونىڭ ازەربايجاننىڭ استاناسى – باكۋدە تۋىپ-وسكەنىن العا تارتۋعا بولادى. ساناۋلى كۇندەردەن كەيىن, ياعني 13 تامىزدا جاسى 26-عا تولادى. اۋىر اتلەتيكامەن اينالىسۋدى ءوزىنىڭ كىندىك قانى تامعان ەلدە باستاپتى. ءوزىنىڭ ايتۋىنا قاراعاندا, ازەربايجان قۇراماسىنىڭ ساپىندا بولعاندا اكەسى اليدەن ءتالىم الىپتى. وسى قۇرامادا ءجۇرىپ, الەمدىك دوداداعى العاشقى جەڭىسىنە جەتكەن. ناقتىلاي ايتقاندا, 2010 جىلى سينگاپۋردا وتكەن ءجاسوسپىرىمدەردىڭ وليمپيالىق ويىندارىندا توپ جارىپ, التىن جۇلدەگە يە بولعان. سول كەزدە ول 69 كيلوعا دەيىنگى سالماقتا باق سىناعان.
وسى جەڭىستەن سوڭ جاس اتلەت ءۇش جىلعا دەيىن الەمدىك سايىستارعا قاتىسا قويعان جوق. بالكىم, بۇعان ونىڭ ءوز سالماعىن ۇلعايتقانى سەبەپ بولعان سەكىلدى. ول وسى ءۇش جىل ىشىندە 77 كيلوعا دەيىنگى سالماققا اۋىسۋدى ۇيعارىپتى. راس, بۇل وعان وڭايعا تۇسە قويعان جوق. مۇنداي قادامعا ول ءوز قالاۋىمەن دە, ءتىپتى, جاتتىقتىرۋشىلارىنىڭ كەڭەسىمەن دە بارۋى مۇمكىن. قالاي دەگەندە دە, ول 2013 جىلى جاستار اراسىنداعى الەم چەمپيوناتىندا كۇمىس جۇلدەنى ەنشىلەپتى.
الايدا, 2014 جىلى نيدجات راگيموۆتىڭ ومىرىندە ۇلكەن ءوزگەرىستەر ورىن الدى. ءدال سول ۋاقىتتا ازەربايجان اۋىر اتلەتيكا قۇراماسىندا 18 سپورتشى دوپينگ داۋىنا ىلىگىپ, ەۋروپا چەمپيوناتىنىڭ مەدالىنەن ايىرىلدى. ءوز ەلىنىڭ سپورتشىلارى حالىقارالىق سايىستاردان شەتتەتىلگەن تۇستا جاس زىلتەمىرشى شەتەلگە كەتۋدى ويلاستىرىپتى. تاڭداۋىندا بىرنەشە ەل بولعانمەن, قازاقستان تۋى استىندا باق سىناۋعا بەل بۋىپتى. ءسويتىپ, ول ءبىزدىڭ ەلدىڭ نامىسىن 2015 جىلدان باستاپ قورعاۋعا قادام جاسادى. قازاقستان قۇراماسىنا قاتىسقان العاشقى حالىقارالىق سايىستا باعى جاندى. اقش-تىڭ حيۋستون قالاسىندا وتكەن الەم چەمپيوناتىندا قارسىلاستارىنىڭ ءبارىن قاپى قالدىردى. سول سىندا ونىڭ جۇلدىزى جانارىنا ەشكىم ءباس تىكپەگەن ءتارىزدى. ويتكەنى, ونىڭ سالماعىندا مىقتى قارسىلاستار كوپ ەدى. اسىرەسە, لوندون وليمپياداسىنىڭ جۇلدەگەرى قىتايلىق ليۋي سياوتسزيۋن, سولتۇستىككورەيالىق كيم كۆونگ سونگ جانە ارمەنيالىق اندرانيك كاراپەتيان بۇعان دەيىن مۇنداي الەمدىك دودالاردا توپ جارىپ, مول تاجىريبە جيناعان.
جاھاندىق جارىستا ءدال وسى اۋىر اتلەتتەر جۇلقا كوتەرۋ سايىسىندا العاشقى لەكتەن كورىنىپ, 165 كيلونى توبەسىنەن اسىرعان ن.راگيموۆتى ءتورتىنشى ورىنعا سىرعىتىپ جىبەرگەن ەدى. الايدا, وسى ءتورت زىلتەمىرشى سەرپي كوتەرۋدە تارتىستى ودان ءارى قىزدىردى. بۇل سايىستا ليۋي سياوتسزيۋن 201 كيلو تارتاتىن ءزىلتەمىردى ءۇش مۇمكىندىگىندە دە تارتا العان جوق. ال كيم كۆونگ سونگ قانا 201 كيلونى كوتەردى. قازاقستان نامىسىن قورعاعان اۋىر اتلەت باستاپقىدا 195 كيلونى وڭاي باعىندىردى. ەكىنشى مۇمكىندىگىندە وعان 200 كيلونى باعىندىرۋ جۇكتەلگەنىمەن, باس باپكەر الەكسەي ني تاپسىرىستى 202 كيلوعا اپاردى. ودان سوڭ وتانداسىمىزعا 207 كيلونى كوتەرۋ مىندەتى قويىلدى. راس, بىردەن بەس كيلوعا كوبەيگەن ءزىلتەمىردى ىرىققا كوندىرۋ وڭاي ەمەس. دەگەنمەن, نيدجات راگيموۆ وزىنە ۇلكەن ءۇمىت ارتىلعانىن ءتۇسىنىپ, ۇدەدەن كورىنە ءبىلدى.
الەم چەمپيوناتىنداعى قوسسايىس ناتيجەسىندە كيم كۆونگ سونگ پەن نيدجات راگيموۆتىڭ كورسەتكىشى تەڭ ءتۇستى. ەكەۋىندە دە 372 كيلو. دەگەنمەن, قارسىلاسىنىڭ سالماعى نيدجاتتان ءبىر كيلوعا اۋىر بولىپ شىقتى. وسىلايشا, قازاقستان ازاماتتىعىن قابىلداعان ازەربايجان جىگىتىنىڭ باعى جانىپ, الەم چەمپيونى اتاندى.
– الەم چەمپيوناتىنداعى جەڭىسىمنەن كەيىن وليمپيادا ويىندارىنا دايىندىقتى باستادىم. راس, بۇل سايىسقا دەيىن كوپ ۋاقىت جاتتىعۋدان قول ءۇزىپ قالىپ ەدىم. ءوزىمدى قايرادىم, باپكەرلەردىڭ كەڭەسىن كوڭىلگە ءتۇيدىم, – دەيدى جاقىن كۇندەرى برازيلياعا اتتانعالى وتىرعان نيدجات راگيموۆ. – قازاقستانداعى اۋىر اتلەتتەر مەكتەبىندە شىڭدالىپ جۇرگەنىمە قۋانىشتىمىن...
قازىر نيدجات راگيموۆكە قازاقستاندىقتار تۇگەل ءۇمىت ارتىپ وتىر. «ەل ءۇمىتىن اقتاۋعا تىرىسامىن» دەيدى تاۋ كوتەرگەن تولاعايداي بۇلا كۇشتىڭ يەسى.
جولداسبەك شوپەعۇل,
«ەگەمەن قازاقستان»
اتىراۋ
ەسكەك ەسۋدە دە ەسەمىز بار
بايداركا مەن كانوە ەسۋدەن جاسىنداي جارق ەتە قالعان تيمۋر حايداروۆتىڭ ەسىمى گەرمانيانىڭ دۋيسبۋرگ قالاسىندا وتكەن الەم كۋبوگى جارىسىندا بەلگىلى بولعان. دۇنيە جۇزىندەگى 63 مەملەكەتتەن جينالعان 600-دەن استام سپورتشىنىڭ دوداسىنا العاش رەت قاتىسقانىنا قاراماستان قازاقستان قۇراماسى قولا مەدال جەڭىپ الدى.
500 مەترلىك قاشىقتىقتا ءتاجىريبەلى ەسكەك ەسۋشى سەرگەي ەمەليانوۆ الەم كۋبوگىنىڭ قولا مەدالىن قازاقستان قورجىنىنا سالعان. وڭتۇستىك قازاقستان وبلىسىنان شىققان جاس تالانت تيمۋر حايداروۆ 200 مەترلىك قاشىقتىقتا بايداركا مەن كانوەدا جالعىز ەسۋدەن ۇزدىك بەستىككە كىردى. كەلەسى قاشىقتىقتا تيمۋرمەن جۇپتاسقان مەرەي مەدەتوۆ ەكەۋى قولا مەدالعا سىنىق سۇيەم جەتپەي قالدى.
الەم كۋبوگىنىڭ ەكىنشى كەزەڭى چەحيانىڭ راچيتسا قالاسىندا وتكەندە تيمۋر 200 مەترلىك قاشىقتىقتا قارسىلاستارىنا ەش مۇمكىندىك قالدىرماي, مارەگە جەكە دارا كەلدى. دۋيسبۋرگتە كەتكەن ەسەنى مەرەي مەدەتوۆ ەكەۋى قايتارىپ, كۇمىس مەدالدى جانە جەڭىپ الدى. سودان سوڭ قازاقستان قۇراماسى سپورتشىلاردى تىنىقتىرۋ ءۇشىن الەم كۋبوگىنىڭ ءۇشىنشى كەزەڭىنەن باس تارتقان.
قۇراما ريو-دە-جانەيرو وليمپياداسى الدىنداعى سوڭعى وقۋ-جاتتىعۋ جيىنىن بەلارۋس جەرىندە وتكىزدى. بۇدان سوڭ چەحيانىڭ راچيتساسىندا كەم-كەتىكتى تاعى ءبىر پىسىقتاپ, ريوعا جارىس باستالاردان ءۇش كۇن بۇرىن كەلەدى.
ەسكەك ەسۋ – وڭاي سپورت ءتۇرى ەمەس. اۋا رايى, جەلدىڭ سوققان باعىتى قاتتى اسەر ەتەدى. كوبىنە ساتتىلىك كومەكتەسەدى. ماسەلەن, مەرەي مەدەتوۆ ەكەۋى جۇپتاسىپ ەسۋدە اقتىق سىنعا دەيىن ءبارى تاماشا بولعان. سوڭعى ستارتتا ەكەۋى بىردەن شىعىپ كەتە الماي, ءبىر مەترلىك قاشىقتىقتا وزگە قارسىلاستارىنان قايىق كورپۋسىنىڭ ورتاسىندا قالىپ كەتكەن. وڭ جاقتان ەسەتىن ەكەۋى بارىن سالىپ باسەكەلەستەرىن قۋىپ جەتكەنىمەن, العاشقى مەتردەگى ساتسىزدىكتىڭ ورنى تولماي, «كۇمىسكە» قاناعات ەتۋگە تۋرا كەلگەن.
قازىر تيمۋر حايداروۆ 200 مەترلىك قاشىقتىققا تىڭعىلىقتى دايىندالۋدا. الەم كۋبوگى جارىسىندا ول قىتاي جانە ۋكراين ەسكەكشىلەرىن ارتقا تاستاعان. ۋكراينداردىڭ بۇرىن وليمپيادا ويىندارىنىڭ جەڭىمپازى بولعانىن ەسكەرسەك, قازاقستان قۇراماسىنىڭ ەڭ جاس ەسكەك ەسۋشىسى ءۇشىن ۇلكەن موتيۆاتسيا بولارى داۋسىز.
قالاي دەگەندە دە, وڭتۇستىك قازاقستان وبلىستىق بايداركا مەن كانوە ەسۋدەن فەدەراتسيانىڭ پرەزيدەنتى, قازاقستانعا ەڭبەگى سىڭگەن جاتتىقتىرۋشى دەنيس جارمەنوۆ سەرگەي ەمەليانوۆ پەن تيمۋر حايداروۆقا ۇلكەن ءۇمىت ارتىپ وتىر.
باق تا, باپ تا قوسا شاپسا, وڭتۇستىكتىڭ بۇلا جىگىتتەرى الەمنىڭ جۇلدىزىنا اينالماق.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
تاتامي تارلانى
دزيۋدودان ۇلتتىق قۇرامانىڭ بەس وليمپيادادا العان جالعىز مەدالى بار. ول – اسحات جىتكەەۆتىڭ «كۇمىسى». قىزدار قۇراماسىنىڭ قورجىنىنان مەدال سىڭعىرى ءالى كۇنگە ەستىلگەن ەمەس. ريو تورىندەگى تاتاميدە وسى ولقىلىقتىڭ ورنى تولا ما, دەگەن ساۋالدىڭ جاۋابىن ىزدەپ, 63 كيلو سالماقتاعى ازيا چەمپيوناتىنىڭ قولا جۇلدەگەرى, الەم كۋبوگىنىڭ, الەمدىك گران-ءپريدىڭ قولا جۇلدەگەرى اتانعان ماريان ورداباەۆاعا حابارلاسقان ەدىك.
تەلەفون تۇتقاسىن كوتەرگەن ماريان جاڭا عانا جاتتىعۋدان كەلىپ, دەمالىپ وتىرعانىن ايتتى.
– ۇلتتىق قۇرامامەن بىرگە الماتىدا «باعاناشىل» كەشەنىندە جاتتىعۋ وتكىزىپ جاتىرمىز. وسى جەردەگى ون كۇندىك جاتتىعۋدى اياقتاعان سوڭ, برازيلياعا ۇشامىز. الدىمەن سان-پاۋلۋعا, ودان ءارى ريوعا بارامىز. جاتتىعۋ ويداعىداي ءوتىپ جاتىر, قۇرامانىڭ قىزدارى جاراقاتتان امان-ەسەن. پسيحولوگيالىق جاعىنان دا, دەنە كۇشى جاعىنان دا دايىنبىز دەپ ايتا الامىن. جالپى, پسيحولوگتىڭ كومەگىنسىز دە قۇراما مۇشەلەرىنىڭ كوڭىل كۇيى جاقسى, ورنىقتى دەپ ويلايمىن, – دەدى ول.
63 كيلو – كۇرەستىڭ كوپ تۇرىندە باسەكەلەستىك وتە كۇشتى سالماق دارەجەسى ەكەندىگى بەلگىلى. بۇل تۋرالى ماريان بىلاي دەيدى:
– مەنىڭ سالماعىمدا سلوۆەنيالىق دزيۋدوشى تينا ترستەنياك الەمدىك رەيتينگتە كوشباسشى سانالادى. ول بىلتىر استانادا وتكەن الەم چەمپيوناتىندا التىن مەدال العانىن بىلەسىزدەر. جاقسى كۇرەسەدى, ۇنەمى بابىندا جۇرەتىندىگىنىڭ ارقاسىندا بىرنەشە جىلدان بەرى جاقسى ناتيجەلەرگە قول جەتكىزىپ ءجۇر. فرانتسيانىڭ 63 كيلودا كۇرەسەتىن دزيۋدوشىسى دا وتە كۇشتى. موڭعوليا, جاپونيا ەلدەرىنىڭ بالۋاندارى دا مىقتى. جالپى, مەنىڭ سالماعىمدا باسەكەلەستىك وتە كۇشتى. بىراق مەن قارسىلاستارىمنان قورىقپايمىن. وليمپيادادا بار كۇشىمدى سالاتىنىما سەنىڭىزدەر. قالعانىن تاتاميدە كورەمىز. باستى ماقسات – مەدال الۋ.
ماريان ايتىپ وتىرعان فرانتسۋز بالۋانى كلارەسس اگبەنەنۋ – قۇرلىق دودالارىندا جۇلدە الىپ جۇرگەن سپورتشى. ەرەسەكتەر اراسىنداعى دودالارعا قوسىلا سالىسىمەن, ولجا سالا باستاعان كلارەسس 2012 جىلى لوندون وليمپياداسىنىڭ جولداماسىن جەرلەسىنە ۇستاتۋعا ءماجبۇر بولعان-دى. بۇل جولى برازيلياعا تاجىريبەسى تولىسقان شاعىندا بارعالى تۇر. الايدا, ءوزى ايتقانداي, جەرلەسىمىزدى قارسىلاستارىنىڭ اتاق-داڭقى جاسقاندىرماۋعا ءتيىس.
مارياندى سپورتشىلار وتباسىندا تۋىپ-وسكەن دەۋگە بولادى. اكەسى قويان-قولتىق ۇرىس تۇرىنەن سپورت شەبەرى. اناسى كاسىبي سپورتشى بولماسا دا, فۋتبولمەن, ۆولەيبولمەن اۋەستەنگەن. تاتاميگە 11 جاسىندا اياق باسقان ماريان سودان بەرگى 15 جىلعا جۋىق ۋاقىتتا ءبىراز بەلەستەردى باعىندىرعانىن جانكۇيەرلەر بىلۋگە ءتيىس.
ايتپاقشى, الەۋمەتتىك جەلىدەگى پىكىرلەرگە قاراساق, جەرلەسىمىزدى قىرعىز قىزى دەپ ويلايتىندار بار ەكەن. جوق, مارياننىڭ ۇلتى قازاق. اكەسى دە, اناسى دا الماتىدا تۋىپ-وسكەن جەرگىلىكتى قازاقتار. 1987 جىلى وتباسى جۇمىس بابىمەن ۋاقىتشا قىرعىزستانعا بارىپ, كىندىك قانى ىستىقكول جاعاسىنا تامعانى بولماسا...
وليمپياداعا اتتانعالى وتىرعان بالۋان قىز «ەگەمەن قازاقستان» ارقىلى جانكۇيەرلەرگە:
– جارىس الدىندا بولجام جاساۋ ەڭ قيىن نارسە. اسىرەسە, دزيۋدودا جەڭىس نەمەسە جەڭىلىس ءبىر سەكۋندقا جەتپەيتىن ۋاقىت ىشىندە شەشىلىپ كەتۋى مۇمكىن, بارلىعىن تاتامي كورسەتەدى. ءبىز قولىمىزدان كەلگەنشە جوعارى ناتيجەگە ۇمتىلامىز. جەڭىسكە جەتىپ جاتساق, بۇل ەلىمىزدە دزيۋ-دو كۇرەسىنىڭ دامىعانى, گۇلدەنگەنى. جانكۇيەرلەردىڭ قولداۋىن كۇتەمىن, – دەدى.
ارنۇر اسقاروۆ,
«ەگەمەن قازاقستان»
