اسىق اتقان قاريالار

كوكشەتاۋ قالالىق ارداگەرلەر كەڭەسى ۇلتتىق سپورت تۇرلەرى مەن سالاماتتى ءومىر سالتىن ناسيحاتتاۋ ماقساتىندا «اسىق اتۋ» جانە «بەس تاس» ءى جالپىقالالىق جارىسىن وتكىزدى. بۇل باسەكەنىڭ ەرەكشەلىگى مەن ارتىقشىلىعى – وعان وتىزدان استام اقساقالدىڭ قاتىسۋىندا دەر ەدىك. جارىستى ۇيىمداستىرعان «قازاق ءتىلى جانە مادەنيەتى» وبلىس­تىق ۇيىمىنىڭ, «ميراس» كەڭەسىنىڭ جانە «نۇر وتان» پارتياسى وبلىستىق فيليالىنىڭ وكىلدەرى اتالار ۇلگىسى ۇلتتىق ويىندى وسىلايشا جاڭعىرتۋدى ءجون ساناپتى. – ءبىز قۇرمەتتى ەڭبەك دەمالىسىندا جۇرسە دە اتالارىمىز بەن اجەلەرىمىزدىڭ سالاماتتى ءومىر سالتىن ناسيحاتتاۋداعى, جاستاردىڭ بويىنا ۇلتتىق داستۇرلەرىمىزدىڭ تالىمدىك مارجاندارىن ۇيالاتۋداعى بەلسەندى قىزمەتىنە ريزاشىلىق بىلدىرەمىز. قازىنالى قارتتارىمىز ءوز ۇلگىسىمەن وسكەلەڭ ۇرپاقتى اسىل ويلار مەن بيىك ماقساتتارعا جەتەلەي بەرەتىندىگى قۋانىشتى. بويلارىڭىزدان قۋات كەتپەي, اقىلشىمىز بولىپ جۇرە بەرى­ڭىزدەر, – دەدى جارىستىڭ اشىلۋ سالتاناتىندا كوكشەتاۋ قالاسى اكىمىنىڭ ورىنباسارى التىناي امىرەنوۆا. ەرەجە تالاپتارىنا سايكەس  «اسىق اتۋعا» قاتىسۋشىلار جار­قىراعان سۇيەكتەردى شەڭبەردەن مۇمكىندىگىنشە كوبىرەك شىعارۋى قاجەت. جۇزدەرى شات قاريالاردىڭ قولىنداعى اسىقتار ۇرشىقشا ءيىرىلىپ, اۋىر سوققىمەن ءدوپ ءتيىپ جاتقانىنا كورەرمەن دۇركىرەتىپ شاپالاق ۇرۋمەن بولدى. – ارينە, بالا كەزىمىزدە بارلى­عىمىز اسىق وينادىق. بۇل ەڭ قىزىقتى داۋرەن ەدى. وقۋدان قولى­مىز بوساسىمەن اشەكەيلى دوربا­مىزداعى قورعاسىن قۇيىلعان ساقا­لارمەن جەردىڭ شاڭىن شىعا­راتىنبىز. ودان بەرى دە قانشاما ۋاقىت ءوتتى, بۇگىنگى جارىس كورىگىن قىزدىرعان شالدار بالالىق شاققا ورالعانداي كۇي كەشۋى قانداي عانيبەت, – دەيدى بىزبەن تىلدەسكەن ۇقك باستاۋىش ارداگەرلەر كەڭە­سىنىڭ توراعاسى, وتستاۆكاداعى پولكوۆنيك سايلاۋباي ىبىراەۆ. وسىدان بولسا كەرەك, جارىسقا قاتىسۋشىلاردىڭ بارلىعى شەبەر ويىن كورسەتىپ, جەڭىسكە دەگەن جىگەر تانىتتى. ارينە, بالالىق شاقتىڭ «رەكوردتارىن» قايتالاماسا دا  مەرگەندىگىمەن كوزگە تۇسكەندەرگە قىزىعا قاراۋشىلار كوپ بولدى. تارتىستى جارىستا قالالىق ارداگەرلەر كەڭەسىنىڭ توراعاسى شياپ اليەۆ ءبىرىنشى, ال حابيبوللا عازيزوۆ پەن جۇماعالي جۇرىمباەۆ جۇلدەلى ورىنداردى ەنشىلەدى. اجەلەر اراسىنداعى «بەس تاس» باسەكەسىنىڭ قىزىعى ءبىر توبە ەدى. مۇندا جىبەك بالابەكوۆا الدىنا جان سالمادى. قازىلار القاسىنىڭ شەشىمىمەن كۇلماش ساماەۆا ەكىنشى, كەنجەباي سماعۇل ءۇشىنشى ورىندى ەنشىلەدى. جارىسقا قاتىسۋشىلاردىڭ بارلىعى كورەرمەندەرگە قۋا­نىش سىيلاۋمەن قاتار, سىي-سىيا­پاتتارعا يە بولدى. جارىستى ۇيىم­­داستىرۋشىلار بۇل باسە­كەنىڭ ءداستۇرلى سيپات الاتىنىن اتاپ ءوتتى. باقبەرگەن امالبەك, «ەگەمەن قازاقستان» كوكشەتاۋ