مەديتسينالىق پويىزداردىڭ كومەگى كوپ

  كەشە ورتالىق كوممۋنيكاتسيالار قىزمەتىندە «دەنساۋلىق», «جاردەم» جانە «سالاماتتى قازاقستان»  مەديتسينالىق پويىزدارى جوباسىنىڭ ىسكە اسىرىلۋ بارىسى تۋرالى» تاقىرىبىندا ءباسپاسوز ءماسليحاتى بولىپ ءوتتى. «مەملەكەت باسشىسى جول­داۋىنىڭ كولىك مەديتسيناسىن دامىتۋ اتتى نەگىزگى باسىمدىعىن ىسكە اسىرۋ ماقساتىندا  جوعارىدا اتالعان  مەديتسينالىق پويىزداردى قر ءىىم توتەنشە جاعدايلار كوميتەتىنىڭ «اپاتتار مەديتسيناسى تەمىر جول گوسپيتالدارى» اكتسيونەرلىك قوعامى, «قازاقستان تەمىر جولى» ۇك» اكتسيونەرلىك قوعامى جانە قازاقستان رەسپۋبليكاسىنىڭ دەن­ساۋلىق ساقتاۋ جانە الەۋمەتتىك دامۋ مينيسترلىگى بىرلەسىپ ىسكە قوستى. مۇنداي الەۋمەتتىك جوبانى ىسكە اسىرۋداعى باستى ماقسات, مەديتسينالىق قىزمەتتەردىڭ وسى تۇرلەرىن الۋعا ءمۇم­كىندىگى جوق, شالعاي ەلدى مە­كەندەردىڭ تۇرعىندارى­نا كونسۋلتاتيۆتىك-دياگنوس­تي­­كا­لىق مەدي­تسينالىق كو­­مەك كورسەتۋ بولىپ تابىلادى. مەديتسينالىق پويىزدىڭ ۆاگوندارىندا دارىگەرلەردىڭ كابينەتتەرى, دياگنوستيكالىق كورپۋس, تىركەۋ ءبولىمى, تاماقتانۋ جانە دەمالۋ بلوكتارى  ور­نالاسقان. ستوماتولوگ, دەرماتولوگ, ۋرولوگ, ماممولوگ, گينەكولوگ, نەۆروپاتولوگ, كارديولوگ, تەراپەۆت, وتولارينگولوگ, پەدياتر, وكۋليست سياقتى ماماندارعا كەزەككە تۇرعاندار كوپ. پويىزدا ۋدز-دياگنوستيكالاۋ, تاڭۋ, ەمشارالىق كابينەتتەر جانە شاعىن حيرۋرگيالىق وتا جاسايتىن وپەراتسيالىق بلوك قاراستىرىلعان. بارلىق كابينەتتەر تولىقتاي كومپيۋتەرلەنگەن. ساندىق فليۋروگرافيالىق اپپارات رەنتگەن ءتۇسىرىلىمىن پاتسيەنتتىڭ جىلدام الۋىن قامتاماسىز ەتەدى, تاپ­سىرىلعان تالدامانىڭ ناتيجەسى دە كوپ كۇتتىر­مەيدى. وسى جىلى مەديتسي­نالىق پو­يىزدار ەلىمىز تاۋەلسىزدىگىنىڭ 25 جىلدىعىنا ارنالعان رەسپۋبليكالىق اكتسيا اياسىندا جۇمىس ىستەيدى», – دەدى ءىىم تج كوميتەتىنىڭ رەسمي وكىلى ر. يمانقۇلوۆ. «دەرتىنە شيپا تاۋىپ, دەنساۋلىعى جاقسارعان جاندار بىزگە كوپتەپ حات جازىپ, العىستارىن ايتىپ, اقجارما تىلەكتەرىن جولداپ جاتادى. مۇنىڭ ءوزى ەڭبەكتىڭ جانعانى ەمەس پە», – دەدى ول. راۋان قايدار, «ەگەمەن قازاقستان»