اتى جوق ىندەت

اتىراۋ وبلىسىندا 1400 سيىر بەلگىسىز اۋرۋعا شالدىققان اتىراۋداعى شالعاي ءارى كورشىلەس رەسەيمەن قوڭسى اۋداننىڭ ءبىرى – قۇرمانعازى. ءدال قازىر وسى اۋداندا 1400-دەي سيىر ازىرگە اتاۋى بەلگىسىز ىندەتكە شالدىعىپ تۇر. بۇل اۋرۋ نەدەن شىعۋى مۇمكىن؟ وسىعان بايلانىستى نەندەي شارا قولعا الىندى؟ ءبىز اتالعان دەرەكتى انىقتاۋ جانە ساۋالدارىمىزعا جاۋاپ الۋ ماقساتىمەن قۇرمانعازى اۋداندىق اۋىل شارۋاشىلىعى ءبولىمىنىڭ باسشىسى ءالىمباي ابدراحمانعا حابارلاسقان ەدىك. الايدا, ول ناقتى مالىمەتتى ۆەتەرينارلىق باقىلاۋ جانە قاداعالاۋ كوميتەتى اتىراۋ وبلىستىق اۋماقتىق ينسپەكتسياسى باسشىسىنىڭ ورىنباسارى سۇلۋحيا بيسەنوۆادان الۋىمىز قاجەتتىگىن ەسكەرتتى. باسشى ورىنباسارىمەن تەلەفون ارقىلى سويلەستىك. – قۇرمانعازى اۋدانىندا جە­كە يەلىكتەگى سيىرلاردان اۋرۋ بەل­گىلەرى 30 ماۋسىمدا بەلگىلى بو­لا باستاعان. الايدا, مالدارى اۋىرعان تۇرعىندار جەرگىلىكتى ۆەتەرينارلارعا 4 شىلدەدە عانا حابارلاعان, – دەپ تۇسىنىك بەردى ۆەتەرينارلىق باقىلاۋ جانە قا­داعالاۋ كوميتەتى اتىراۋ وبلىس­تىق اۋماقتىق ينسپەكتسياسى باس­شى­سىنىڭ ورىنباسارى سۇلۋحيا بيسەنوۆا. – ءبىز مال اۋرۋى تۋرالى سول كۇنى ۆەتەرينارلىق باقىلاۋ جانە قاداعالاۋ كوميتەتىن حابار­دار ەتتىك. 5 شىلدەدە كوميتەتتەن جانە ۆەتەريناريا جونىندەگى ۇلتتىق رەفەرەنتتىك ورتالىقتىڭ وكىلدەرى كەلدى. اۋرۋ مالداردان ارنايى سىنامالار الىندى. ازىرگە مال اۋرۋىنىڭ ناقتى دياگنوزى قويىلعان جوق. – اۋىرعان مالدان قانداي بەلگىلەر بايقالدى؟ – سيىر تەرىسىنىڭ استىندا ءتۇيىن­شەكتەر پايدا بولىپ, بەز وسكەن. مالدىڭ قىزۋى دا كوتەرىلىپ, مۇرنى­نان سىلەكەي اققان. ءشوپ جەمەي, قوڭى كۇرت تومەندەگەن. – اۋرۋ قاي وكرۋگتەردە انىق­تالدى؟ – الدىمەن ماقاش, ەڭبەكشى, ورلى, نۇرجاۋ اۋىلدىق وك­­رۋگ­­­تەرىندەگى جەكە يەلىكتەگى سيىرلاردان شىققانى بەلگىلى بولدى. سونىمەن بىرگە, «قۇباشەۆ» شارۋا قوجالىعىنىڭ مالى دا اۋرۋعا شال­دىقتى. – مال شىعىنى بار ما؟ – بار. قازىر 40-قا جۋىق سيىر ءولدى. – ەمدەۋ شارالارى قولعا الىن­دى ما؟ – ارينە, قازىر اۋىرعان سيىر­لارعا ارنايى ۆاكتسينا سالىنىپ جاتىر. اۋرۋعا شالدىققان مال­دىڭ ىشىنەن 274-ءى جازىلىپ, ورىسكە شىعىپ كەتتى. – بۇل اۋرۋدىڭ نەدەن بولۋى مۇمكىن؟ – ازىرگە نەدەن ەكەنىن تاپ باسىپ ايتۋ قيىن. بۇل – ۆيرۋستىق اۋرۋ, بالكىم, بۇل كورشى ەلدەن ءتۇرلى قانسورعىش جاندىكتەردىڭ ۇشىپ كەلۋى ارقىلى جۇعۋى مۇمكىن... قۇرمانعازى اۋدانىنداعى ءمۇيىزدى ءىرى قارانىڭ بەلگىسىز دەرتكە شال­دىعۋى تۋرالى دەرەكتەر وسىنداي. اۋدان اكىمى بيبوز شاياح­­مە­توۆ­تىڭ ايتۋىنشا, اۋرۋعا شالدىققان سيىرلاردى ەمدەۋ ءۇشىن بيۋدجەتتەن 1 ميلليون 930 مىڭ تەڭ­­گە ءبولىنىپ, ۆاكتسينا سالۋ قولعا الىنعان. قالاي دەگەنمەن دە, تۇرعىندار مال اۋرۋىنىڭ دياگنوزى تەزىرەك انىقتالعانىن قالاپ وتىر. جولداسبەك شوپەعۇل,  «ەگەمەن قازاقستان» اتىراۋ وبلىسى